Yakơ 3 - Nau Brah Ndu Ngơi 2023

Mât mpiăt

¹ Hơi phung oh nâu gâp, tâm phung khân may mâu dơi geh âk bunuyh ndâk êng kan nơm nti, yorlah khân may gĭt jêh yorlah jêng nơm nti, he mra dơn nau phat dôih ktang lơn.

² Lĕ rngôch he tih da dê tâm âk ntil nau. Mbu nơm mâu tih ôh tâm nau ngơi, păng jêng bunuyh rĭng jêh, mra dơi chiă uănh lĕ săk jăn păng nơm.

³ Tơlah he ntrŭp loih tâm trôm mbung seh gay nchâp păng tông bâr, nâm nđĕ mơ he dơi gai lĕ săk jăn păng.

⁴ Uănh hom lĕ kumpăn: Nđâp tơlah păng dŭt toyh jêh ri sial ktang rdu khân păng kđôi lĕ, ƀiălah knŏng du ndơ gai kumpăn dŭt jê̆ ăt tŏng nau gai păng tĭng nâm nau mĭn bunuyh gai kumpăn.

⁵ Tâm ban lĕ, mpiăt jêng ndơ jê̆ tâm săk jăn, ƀiălah păng ngơi hưn lĕ nau toyh. Du mprănh ŭch jê̆ mra hit dơi sa lĕ krŏng toyh!

⁶ Mpiăt ăt jêng ŭnh lĕ. Tâm lĕ kô̆ săk jăn he, mpiăt jêng neh ntu nau tih mhĭk, ƀư ƀơ̆ lĕ săk jăn, su lĕ nau rêh, jêh ri ŭnh tă bơh ndrung ŭnh ăt su păng.

⁷ Lĕ rngôch ntil mpô mpa jêh ri sĭm och, ntil mpa vơr jêh ri mpa rêh tâm dak mƀŭt, mra dơi chiă uănh, jêh ri phung bunuyh hŏ chiă uănh jêh;

⁸ ƀiălah mpiăt mâu geh nơm dơi blau buay păng ôh, du ntil ndơ djơh mhĭk mâu dơi njrăng, păng bêng ma dak kăch nkhĭt bunuyh.

⁹ He dŏng mpiăt mprơ mât ton tâm rnê ma Kôranh Brah, Mbơ̆ he, jêh ri sŏk đŏng mpiăt gay rak rtăp ma kon bunuyh, Brah Ndu rhăk njêng jêh tĭng rup Păng nơm.

¹⁰ Tă bơh trôm mbung lĕ luh nau mprơ mât ton nđâp ma nau rak rtăp lĕ ƀơh? Ơ oh nâu gâp, lơi ƀư pônây ôh.

¹¹ N'hong dak ntơm tă bơh du tu dak, mra dơi luh dak kah nđâp ma dak tăng lĕ ƀơh?

¹² Hơi oh nâu gâp tơm rvi dơi luh play ôlive mâu lah tơm krăk ƀâu dơi luh play rvi lĕ? N'hong dak chiăt mâu dơi đŏng luh dak kah.

Bar nau blau mĭn

¹³ Tâm phung khân may, mbu nơm jêng nơm blau mĭn jêh ri gĭt rbăng? Sŏk hom nau gŭ rêh ueh khân may nơm gay tâm mpơl lĕ nau khân may ƀư ntơm tă bơh nau dêh rhêt bơh nau blau mĭn.

¹⁴ Ƀiălah tơlah khân may geh nau tâm rmot ma nau rngot ngăn ngên jêh ri tâm djrel tâm nuih n'hâm, lơi ta rnê êng nơm mâu lah sŏk nau ngơi mƀruh tâm rdâng đah nau ngăn.

¹⁵ Nau blau mĭn nĕ mâu geh tât bơh klơ trôk, ƀiălah jêng ndơ bơh neh ntu, bơh nglay săk jêh ri bơh phung brah mhĭk.

¹⁶ Yorlah ta ntŭk geh nau tâm rmot jêh ri nau tâm djrel, ta nĕ geh nau uh ah jêh ri ăp ntil nau djơh mhĭk.

¹⁷ Ƀiălah nau blau mĭn tă bơh klơ trôk, lor lơn jêng kloh, jêh nây đăp mpăn, rdơ̆ rbăn, nuih n'hâm blau iăt nau bu, nuih n'hâm bêng ma nau yô̆ jêh ri kao play ueh, mâu geh nau ngơi bar mâu lah mƀruh ndơm ôh.

¹⁸ Phung bunuyh joi nau đăp mpăn mra rek kao play nau sŏng srăng hŏ srih jêh tâm nau đăp mpăn.