Yakơ 2 - Nau Brah Ndu Ngơi 2023

Lơi gŭ du ding

¹ Hơi phung oh nâu gâp, khân may chroh jêh ma Brah Yêsu Krist, Kôranh Brah he geh nau chrêk rmah, lơi gŭ du ding ôh.

² Nâm bu ntĭt geh du huê bunuyh dok rgên mah, ndơ nkrơ̆ ueh ngăn lăp tâm ngih rƀŭn khân may, jêh ri geh du huê bunuyh o ach, nsoh ao sat lăp đŏng;

³ khân may uănh ma bunuyh nsoh ao ueh jêh ri lah: “Gŭ hom ta ntŭk ueh aơ;” jêh ri lah ma bunuyh o ach pô aơ: “Dâk hom ta nĕ,” mâu lah, “Gŭ hom tâm dâng jâng gâp.”

⁴ Kơt nĕ, di lĕ khân may uănh jêng êng êng tâm phung khân may jêh ri phat dôih ma nau mĭn mhĭk nâm bu pônây?

⁵ Khân may iăt hom, hơi phung oh nâu gâp rŏng: Mâu di hĕ Brah Ndu săch jêh phung o ach ta neh ntu aơ gay ƀư ma khân păng jêng ndrŏng tâm nau chroh, jêh ri dơn ƀon bri hađăch Păng ton jêh ma phung rŏng ma Păng?

⁶ Ƀiălah khân may mưch rmot ma phung o ach. Mâu di phung ndrŏng hĕ tŭn jot khân may, têk khân may văch tanăp ntŭk ngih phat dôih?

⁷ Mâu di hĕ khân păng jêng nơm ngơi djơh tât amoh dŭt khlay khân may kuăl jêh?

⁸ Tơlah nanê̆ khân may tông ma nau vay Hađăch, tĭng nâm Nau Brah Ndu Ngơi: “Rŏng hom ma phung chiau meng nâm bu khân may nơm lĕ” khân may gŭ ngao di.

⁹ Ƀiălah tơlah khân may mpơl gŭ du ding, khân may ƀư tih, pôri nau vay tâm rmal khân may tâm ban ma du huê ƀư tih nau vay.

¹⁰ Yorlah mbu nơm djôt prăp lĕ rngôch nau vay, ƀiălah ƀư tih du ntil nau vay, jêng tâm ban ma bunuyh hŏ ƀư tih lĕ rngôch nau vay nây.

¹¹ Yorlah Nơm lah jêh: “Lơi ƀư tih nau văng tĭr ôh,” lah đŏng: “Lơi nkhĭt bunuyh ôh.” Pôri, tơlah may mâu ƀư tih nau văng tĭr, ƀiălah ƀư tih nkhĭt bunuyh, ăn may jêng bunuyh ƀư tih nau vay lĕ.

¹² Pôri khân may ngơi hom jêh ri ƀư hom nâm bu phung bunuyh bu mra phat dôih tĭng nâm ma nau vay bơh nau kon me.

¹³ Yorlah mbu nơm mâu tâm mpơl nuih n'hâm yô̆ nđach mra geh nau phat dôih tâm nau mâu yô̆ nđach; ƀiălah nau yô̆ dơi đah nau phat dôih.

Nau chroh jêh ri nau ƀư

¹⁴ Hơi phung oh nâu gâp, moh khlay tơlah du huê lah păng nơm geh nau chroh ƀiălah păng mâu geh kan? Nau chroh nĕ dơi tâm rklaih păng đŏng?

¹⁵ Tơlah tâm mâp đah du huê oh nâu mâu lah du huê oh ruh mâu geh ao nkŭm săk, pưt ndơ sông sa ăp nar,

¹⁶ ƀiălah du huê tâm phung khân may lah ma păng: “Hăn hom đăp mpăn, njâr ăn răm jêh ri sa ăn hơm,” ƀiălah mâu ăn ôh lĕ ndơ nsoh ma săk jăn păng, moh khlay nau nĕ?

¹⁷ Nau chroh nâm nđĕ lĕ, tơlah nau chroh mâu geh kan, păng mra khĭt yơh.

¹⁸ Ƀiălah geh bunuyh mra lah: “May geh nau chroh, jêh ri gâp geh kan.” Ntĭm hom ma gâp nau may chroh mâu geh kan, jêh nây gâp mra ntĭm nau gâp chroh geh kan.

¹⁹ May chroh geh knŏng du huê Brah Ndu, may chroh di jêh; nđâp phung brah mhĭk chroh đŏng tâm ban pônây jêh ri klach râm sâr.

²⁰ Hơi bunuyh rluk mâl ri, may ŭch gĭt lĕ ma nau chroh mâu geh kan jêng dơm dam?

²¹ Mâu di hĕ Y-Abraham, chô yau he, dơi kơp sŏng srăng yor ma kan tơlah păng nhhơr kon păng jêng Y-Isăk ta klơ nơng ƀư brah?

²² May saơ nau nây, nau chroh hăn ndrel ma nau kan, jêh ri bơh kan nau chroh jêng nŭm rĭng.

²³ Pôri, nau ngơi tâm Nau Brah Ndu Ngơi hŏ geh tât di ngăn: “Abraham chroh ma Brah Ndu, jêh ri tă bơh nĕ păng dơi kơp jêng sŏng srăng” jêh ri Brah Ndu kuăl păng jêng mĭt jiăng ma Păng.

²⁴ Khân may saơ nây, bunuyh dơi kơp sŏng srăng tă bơh nau păng kan, mâu di knŏng yor ma nau chroh ôh.

²⁵ Tâm ban kơt nây đŏng, mâu di hĕ bu ur văng tĭr H'Rahap dơi kơp sŏng srăng tă bơh nau păng kan, nôk păng vơt rom phung mbơh jêh ri njŭn khân păng hăn sĭt trong êng?

²⁶ Săk jăn mâu geh huêng mra khĭt, nau chroh mâu geh kan mra khĭt tâm ban pônây lĕ.