Yakơ 1 - Nau Brah Ndu Ngơi 2023

Nau mbah jô̆ khâl

¹ Y-Yakơ, oh mon Brah Ndu jêh ri Kôranh Brah jêng Brah Yêsu Krist, nchih njuăl ma jât ma bar ndŭl mpôl dôl gŭ rêh nchah rai lam ntŭk. Ăn nau maak ma khân may!

Phung chroh jêh ri nau rlong uănh

² Hơi phung oh nâu gâp, ăn khân may kơp ma nau rlong uănh ăp ntil tât ma khân may tâm ban ma nau răm maak da dê,

³ yorlah khân may gĭt jêh nau rlong uănh ma nau khân may chroh njêng nau srôih.

⁴ Ƀiălah nau srôih ăn jêh nanê̆ kan păng, gay ma khân may yơh geh nau văch ma toyh, rah vah ngăn, mâu geh du ntil pưt ôh.

⁵ Tơlah mbu nơm tâm phung khân may pưt nau blau mĭn, vơh vơl hom ma Brah Ndu, Păng mra ăn ro, yorlah Brah Ndu jêng Nơm ăn ma lĕ rngôch bunuyh ma nuih n'hâm lŏng, mâu geh nau nduyh ôh.

⁶ Ƀiălah ăn păng mbơh sơm dăn ma nau chroh, mâu geh nau đing ôh, yorlah nơm vay đing tâm ban ma rbuh dak mƀŭt, sial đô̆ jêh ri rdu păng hăn aơ ri.

⁷ Bunuyh kơt nĕ lơi ntôn lah păng nơm mra sŏk dơn du ntil ndơ bơh Kôranh Brah ôh,

⁸ yorlah nây jêng du huê bunuyh geh nuih n'hâm bar, mâu geh nâp ôh tâm lĕ trong păng.

⁹ Mbu oh nâu gŭ tâm ntŭk tâm dâng, tâm rnê hom ma ntŭk toyh lơn păng nơm.

¹⁰ Ƀiălah bunuyh ndrŏng tâm rnê hom ma ntŭk dêh rhêt păng nơm, yorlah păng mra rlau lôch nâm bu kao gơ̆.

¹¹ Nar luh geh duh ktang ƀư ma gơ̆ kro, kao rŭng, nau ueh păng roh. Tâm ban pônây lĕ, bunuyh ndrŏng ăt mra hoănh kro ta nklang lĕ nau mĭn kan păng ƀư.

Nau rlong uănh jêh ri nau yô̆

¹² Ueh maak yơh ma mbu nơm nsrôih dơn nau rlong uănh; yorlah lôch jêh dơn nau rlong uănh, khân păng mra dơn đon hađăch nau rêh, Brah Ndu ton jêh ma phung rŏng ma Păng nơm.

¹³ Dôl geh nau ndơm, lơi ăn păng lah: “Brah Ndu yơh ndơm gâp”; yorlah nau mhĭk mâu dơi ndơm Brah Ndu ôh, jêh ri Brah Ndu mâu mâp ndơm bunuyh ôh.

¹⁴ Ƀiălah ăp nơm bunuyh geh nau ndơm, yor ma nau kơnh păng nơm têk leo jêh ri ndơm păng.

¹⁵ Jêh nôk kơnh păng ntreo jêh, păng deh nau tih; nau tih văch ma toyh, pôri păng njêng nau khĭt.

¹⁶ Hơi phung oh nâu gâp rŏng, lơi ăn bu ndơm mƀruh ma khân may:

¹⁷ Lĕ rngôch yô̆ ueh jêh ri lĕ ndơ ăn dŭt ueh ngăn tât bơh klơ trôk, jŭr tă bơh Mbơ̆ nau ang; tâm Păng mâu geh nau rgâl ôh, mâu lĕ geh gui nau rgâl.

¹⁸ Păng hŏ dŏng nau ngơi ngăn deh he tĭng nâm nau Păng mĭn gay ma he jêng du ntil play bôk yan tâm lĕ rngôch ndơ Păng njêng.

Ƀư tĭng nâm nau Brah Ndu ngơi

¹⁹ Hơi phung oh nâu gâp rŏng, khân may gĭt jêh nau aơ: Ăn lĕ rngôch bunuyh gơnh tâm iăt, ƀât ngăch ngơi, ngăch ji nuih ôh;

²⁰ yorlah nau kon bunuyh nuih mâu ƀư nau sŏng srăng Brah Ndu ôh.

²¹ Pôri, chalơi hom lĕ nau ƀơ̆ ƀơch jêh ri lĕ nau djơh mhĭk dôl geh lam ntŭk, ăn khân may geh nuih n'hâm rdơ̆ rbăn rom dơn nau ngơi tăm jêh tâm phung khân may, jêng nau ngơi dơi tâm rklaih huêng khân may.

²² Ƀư hom tĭng nâm nau ngơi, lơi knŏng iăt jêng tŏng gay ndơm mƀruh khân may nơm.

²³ Yorlah tơlah mbu moh iăt nau ngơi ƀiălah mâu ƀư tĭng nâm nau ngơi pôri tâm ban ma bunuyh uănh muh măt păng nơm tâm măt rchŏk,

²⁴ uănh jêh nây păng du ta ntŭk êng jêh ri chuêl ro muh măt păng nơm mâm jêng.

²⁵ Ƀiălah mbu nơm sek uănh nanê̆ nau vay di ngăn nây, jêng nau vay djôt leo nau jêng kon me, jêh ri nuih n'hâm srôih sek uănh, mâu di knŏng tăng jêh ri chuêl lơi, ƀiălah păng ƀư tĭng nâm nau nây, bunuyh nĕ mra geh nau ueh maak ngăn tâm kan păng nơm.

²⁶ Tơlah mbu moh mĭn păng nơm jêng bunuyh dơn nau chroh, mâu njrăng mpiăt păng nơm, ƀiălah ndơm êng nuih n'hâm păng nơm, pôri dơn nau chroh bunuyh nĕ jêng dơm dam.

²⁷ Nau chroh kloh ngăn, mâu ƀơ̆ ôh tanăp Brah Ndu, Mbơ̆ he, jêng jô̆ khâl phung kon đơi, phung bu ur ndrô dôl khân păng geh nau rêh ni, jêh ri mât mray khân may nơm bơh nau ƀơ̆ tă bơh neh ntu.