Titus 3 - Nau Brah Ndu Ngơi 2023

Nau kan phung chroh

¹ Nkah hom ma phung chroh blau tông phung kôranh chiă uănh jêh ri phung geh nau dơi, ăn tông bâr jêh ri rơm ndrăp jêh ri ƀư lĕ kan ueh,

² mâu ngơi djơh ma bu ôh, der nau tâm lah tâm djrel, ƀiălah rdơ̆ rbăn hom jêh ri gŭ ngao ueh ma lĕ rngôch bunuyh.

³ Yorlah saơm ri he rluk mâl đŏng, mâu blau tông bâr, geh nau ndơm mƀruh, jêng dĭk ma ăp ntil nau kơnh ŭch jêh ri rŏng ma nau nglay săk ŭch, gŭ rêh tâm nau djơh mhĭk, mâu nach, bu tâm rmot ma he jêh ri mưch rmot ndrăng nơm.

⁴ Ƀiălah lah nau ueh jêh ri nau rŏng tă bơh Brah Ndu, Nơm Tâm Rklaih he, tâm mpơl jêh nau Păng rklaih he,

⁵ mâu di ôh yor kan sŏng he hŏ ƀư jêh, ƀiălah yor nuih n'hâm yô̆ nđach bơh Păng, tâm nau ƀư kloh bơh nau deh mhe jêh ri nau rgâl mhe bơh Brah Huêng Ueh,

⁶ jêng Nơm Brah Ndu nkhŭt jêh rmeh ler klơ he tă bơh Brah Yêsu Krist, Nơm Tâm Rklaih he,

⁷ gay ma he bơh nau Păng yô̆ dơi kơp sŏng srăng, jêng bunuyh dơn nau kâp gân ma nau rêh n'ho ro.

Phung chroh jêh ri nau ueh

⁸ Aơ jêng nau ngơi ngăn. Gâp ŭch ma may ƀư ngăn lĕ nau aơ, gay ma phung chroh jêh ma Brah Ndu mra nsrôih ƀư kan ueh jêh ri khlay ma lĕ rngôch bunuyh.

⁹ Ƀiălah der hom lĕ nau tâm rlăch rluk mâl, lĕ nau nkoch ma noi deh, lĕ nau mâu đăp mpăn jêh ri lĕ nau tâm rlăch ma nau vay; yorlah lĕ nau nây mâu khlay ôh jêh ri dơm dam da dê.

¹⁰ Lôch jêh nduyh ma nơm ƀư nau tâm nkhah mpôl du tơ̆ mâu lah bar tơ̆ pôri der ngai hom đah khân păng;

¹¹ yorlah may gĭt jêh bunuyh lĕ vĭ jêh ri ƀư tih tâm ban pônây, păng phat dôih jêh păng nơm.

Lĕ nau ntăm êng

¹² Tơlah gâp prơh Y-Artêmas mâu lah Y-Tikikus hăn văch ma may, srôih văch ro tâm mâp đah gâp ta ƀon Nikôpôlis, yorlah gâp mĭn ŭch gŭ ta nây dôl yan puh.

¹³ Nsrôih kơl hom ma bunuyh blau tâm mbơh dôih rnha Y-Sênas jêh ri ma Y-Apôlôs, dôl khân păng hăn, lơi ăn khân păng pưt du ntil ndơ.

¹⁴ Ăn phung chroh he nti nsrôih ƀư kan ueh, gay ma kơl ăn ma lĕ nau geh nau kan ndal, pôri lơi gŭ rêh du nau rêh mâu geh play.

¹⁵ Lĕ rngôch phung gŭ ndrel gâp njuăl nau mbah jô̆ khâl đah may. Ăn may mbah jô̆ khâl đah phung rŏng ma hên tâm nau chroh. Mbơh sơm dăn nau yô̆ gŭ ndrel ma lĕ rngôch khân may!