Titus 2 - Nau Brah Ndu Ngơi 2023

Nau kan ma phung bu ranh, phung mom, jêh ri phung oh mon

¹ Ƀiălah ma may, may nti hom lĕ nau tâm di ma nau nti sŏng.

² Ntĭm nti hom ma phung bu ranh gĭt di keh, ăn gŭ ngao ueh, blau mĭn, dơi nâp tâm nau chroh, tâm nau rŏng jêh ri nau srôih.

³ Bu ur ranh kơt nây đŏng, ăn gŭ ngao ma nau kloh ueh, mâu ngơi mhĭk, mâu vay nhêt ndrănh. Ăn khân păng gĭt ntĭm nti ntil nau ueh jêh ri nau di

⁴ gay ma sâm nti ma phung bu ur druh gĭt rŏng ma sai, rŏng ma phung kon,

⁵ di keh, kloh nglang, blau pah kan tâm ngih vâl, geh nuih n'hâm ueh, blau tông ma sai khân păng, gay nau chroh ma Brah Ndu mâu geh ôh bu ngơi djơh.

⁶ May đă hom ma phung bu klâu ndăm ăn gĭt blau mât njrăng săk.

⁷ Tâm lĕ rngôch nau, may jêng nơm leo trong tâm lĕ nau kan ueh jêh ri tâm mpơl nau di, ăn gŭ ngao ueh lah may ntĭm nti;

⁸ nau ngơi ăn di ngăn, mâu geh nau bu dơi nduyh, gay phung bunuyh tâm rdâng mra đit prêng, mâu geh du ntil nau dơi gay ma ngơi mhĭk he.

⁹ Ntĭm nti hom ma phung oh mon ăn tông ma kôranh khân păng, ƀư maak nuih n'hâm ma kôranh tâm lĕ rngôch ndơ, mâu dơi dăng bôk,

¹⁰ mâu ntŭng ôh, ƀiălah tâm mpơl ƀaƀơ nuih n'hâm răp jăp n'hêl nanê̆, gay ma tâm lĕ rngôch nau, khân păng dơi yơk ma nau ntĭm nti bơh Brah Ndu, Nơm Tâm Rklaih he, geh nau chrat ang.

Nau Yô̆ Brah Ndu

¹¹ Yorlah nau yô̆ tâm chuai tâm mpơl jêh tă bơh Brah Ndu prăp ma lĕ rngôch bunuyh.

¹² Nau yô̆ nây nti ma he mƀăr lơi nau mâu blau yơk jêh ri nau kơnh ŭch ta neh ntu gay gŭ rêh tâm di keh, nau sŏng srăng jêh ri klach yơk tâm rnôk aơ,

¹³ dôl gŭ kâp nau kâp gân ueh maak jêh ri nau tâm mpơl ma nau chrêk rmah Brah Ndu dŭt toyh, jêng Nơm Tâm Rklaih he đŏng jêng Brah Yêsu Krist,

¹⁴ jêng Nơm hŏ sân săk jêh yor ma he gay tâm chuai he bơh lĕ nau djơh mhĭk, jêh ri ƀư kloh he jêng du phung ƀon lan knŏng êng ma Păng nơm, jêng phung ƀon lan geh nau duh nđơr ƀư lĕ nau kan ueh.

¹⁵ May nti hom lĕ nau nây, sŏk nau dơi gay nti nkah jêh ri nduyh. Lơi ăn du huê bunuyh mưch rmot ma may.