Titus 1 - Nau Brah Ndu Ngơi 2023

Nau mbah jô̆ khâl

¹ Y-Pôl, oh mon Brah Ndu jêh ri kôranh oh mon Brah Yêsu Krist, geh nau pah kan njŭn nau chroh jêh ri nau gĭt rbăng ma nau ngăn tât ta phung bunuyh Brah Ndu săch jêh, jêng nau tâm di ma nuih n'hâm klach yơk,

² tâm nau kâp gân ma nau rêh n'ho ro jêng nau rêh, Brah Ndu, Nơm mâu mâp mƀruh ôh, ton jêh bơh lor lĕ rngôch rnôk,

³ jêh ri tât di nôk nal, Păng tâm mpơl jêh nau Păng ngơi tâm nau mbơh nkoch Păng jao jêh ma gâp tĭng nau ntrŭnh bơh Brah Ndu, Nơm Tâm Rklaih he.

⁴ Samƀŭt njuăl ma Y-Tit, kon gâp ngăn ndrel tâm nau chroh: Mbơh sơm dăn Brah Ndu jêng Mbơ̆ jêh ri Brah Yêsu Krist, Nơm Tâm Rklaih he, ăn nau yô̆ jêh ri nau đăp mpăn ma may!

Nau gŭ rêh phung kôranh bu ranh

⁵ Gâp chalơi jêh may tâm n'gor Kret gay ma may dăp nkra lĕ nau kan ê hŏ lôch ôh, jêh ri sâm jao kan phung kôranh bu ranh tâm ăp ƀon tâm ban gâp ntĭm jêh ma may.

⁶ Kôranh bu ranh jêng mâu geh ôh nau nduyh; nguay ur nguay sai; phung kon khân păng chroh ma Kôranh Brah, mâu geh ôh nau bu phong ma nau ƀư blă blơ mâu lah mâu di đah nau vay.

⁷ Yorlah jêng nơm mât uănh ngih Brah Ndu, kôranh chiă uănh jêng bunuyh mâu geh ôh nau nduyh; bunuyh nây mâu sưr rlau, mâu gơnh nuih, mâu vay nhêt ndrănh, mâu janh ƀai jêh ri mâu lah hưp ndơ mâu di;

⁸ ƀiălah, ăn gĭt rom bu năch, rŏng nau kan ueh, gŭ di keh, sŏng, kloh ueh, blau mât njrăng săk,

⁹ djôt nâp nau khư rnơm nsing hŏ geh ntĭm nti jêh, gay dơi dŏng nau nti sŏng jêh ri ntĭm nti tâm ban đŏng mâu sŏk dơn ma phung tâm rdâng.

Nau rdja phung Kret

¹⁰ Geh âk phung bunuyh mâu di keh, lor lơn jêng phung bunuyh ŭch nau koh ntâu, phung vay ngơi âk nau mâu khlay jêh ri phung ndơm; ăn may ƀư ma khân păng gŭ rklăk.

¹¹ Yor ma drăp ndơ jê̆ jănh, khân păng hŏ ƀư lĕ nau mâu dơi nti, nau ƀư rai lĕ rnăk vâl bunuyh ƀa bă.

¹² Du huê tâm phung khân păng, du huê nơm mbơh lor khân păng nơm, lah jêh: “Phung Kret jêng phung mƀruh ƀaƀơ, phung mpa janh, lĕ bunuyh vay nhêt sa ƀiălah kơr ƀlao.”

¹³ Nau mbơh aơ jêng ngăn. Yor ri, ăn may ƀư ngăn nau nduyh nkra khân păng, gay ma khân păng geh nau ktang tâm nau chroh,

¹⁴ lơi mĭn ôh nau nkoch bri lă lêng phung Yuđa, tâm ban đŏng lĕ nau ntĭm nti tă bơh phung bunuyh dun nau ngăn.

¹⁵ Ma phung kloh, lĕ ntil ndơ jêng kloh da dê; ƀiălah ma phung bunuyh ƀư blă blơ jêh ri mâu chroh mâu geh ôh du ntil ndơ kloh. Ƀiălah, lĕ nau mĭn jêh ri nuih n'hâm sŏng khân păng nơm geh nau djơh mhĭk jêh.

¹⁶ Khân păng kơp êng khân păng nơm jêng gĭt năl Brah Ndu, ƀiălah nau kan khân păng ƀư jêng dun Păng. Khân păng khư tâm rmot, mâu tông bâr, mâu dơi ƀư du ntil kan ueh ôh.