Sôphôni 2 - Nau Brah Ndu Ngơi 2023

Nau mbơh lor mbơh nau nduyh ma băl mpôl bunuyh êng

¹ Hơi mpôl băl bunuyh mâu gĭt ôh nau bêk prêng! Tâm rgum hom, tâm rgum hom,

² Êlor ăn tât ma nau ntĭnh, Nar mông rlau tât nâm bu lâk sial đô̆; Êlor nau Brah Yêhôva ji nuih Tât ma khân may; Êlor nar Brah Yêhôva ji nuih Tât ma khân may.

³ Hơi lĕ rngôch jêng phung dêh rhêt tâm bri neh, Jêng bunuyh mra ƀư tĭng nau Kôranh Brah ntăm, Joi hom Brah Yêhôva, Joi hom nau sŏng srăng, joi nau rdơ̆ rbăn; Klăp lah khân may mra dơi king n'gang Tâm nar Brah Yêhôva ji nuih.

⁴ N'hêl nanê̆ ngăn, bu mra chalơi ƀon Gaxa, Ƀon Askalôn mra jêng ntŭk rngot njăp; Bu mra mprơh ƀon Asdôt luh du ta nklang bôk nar, Jêh ri bu mra rôk lơi ƀon Êkron.

⁵ Rêh ni ngăn ma phung ƀon lan gŭ ta kơh dak mƀŭt, Nây jêng phung mpôl Kêrêthit! Hơi Kanaan jêng bri phung Philistin, Nau Brah Yêhôva hôm e tâm rdâng đŏng đah khân may; “Gâp mra ƀư rai lơi may Kŏ tât mâu hôm geh bunuyh gŭ đŏng ôh.”

⁶ Ta kơh dak mƀŭt mra jêng ndrêch gơ̆, Gay phung chiăp ƀư ntŭk chiăp biăp Jêh ri ƀư ndrung ma phung biăp.

⁷ N'gor nây mra jêng ăn ma phung ngih Yuđa hôm e klen; Khân păng mra chiăp biăp ta nây. Lah ngo, khân păng mra bê̆ch măng Tâm lĕ ngih ƀon Askalôn; Yorlah Yêhôva Brah Ndu khân păng mra chop khâl khân păng, Jêh ri leo phung tă ƀư bu nă ăn khân păng plơ̆ sĭt.

⁸ “Gâp hŏ tăng jêh nau Môap mưch rmot, Nau phung ƀon lan Ammôn suai rak; Khân păng mưch rmot phung ƀon lan Gâp, Ngơi sưr ma nau khân păng pit in bri dak phung ƀon lan Gâp.”

⁹ Yor nây, Brah Yêhôva ma phung tahan, Jêng Brah Ndu phung Israel lah pô aơ: “N'hêl nanê̆ tĭng nâm Gâp gŭ rêh mro mrăng! Môap mra jêng tâm ban Sôdôm Jêh ri phung ƀon lan Ammôn mra jêng tâm ban Gômôrơ; Khân păng mra jêng du ntŭk bêng ma pôm lok, Du ntu boh, du ntŭk rngol n'ho ro. Phung ƀon lan Gâp hôm e gŭ rêh mra ntŭng pit ƀư rai lơi khân păng, Phung ƀon lan Gâp hôm klen mra pit in bri neh khân păng ƀư drăp ndơn.”

¹⁰ Nây jêng nau khân păng har plơng ma nau sưr khân păng, Yor khân păng hŏ mưch rmot jêh ri ngơi sưr rlau Tâm rdâng đah phung ƀon lan Brah Yêhôva ma phung tahan.

¹¹ Ma đah khân păng, Brah Yêhôva ma nau krit klach dŭt n'hâm, Yorlah Păng mra ƀư rai lĕ rngôch phung brah ta neh ntu, Jêh ri ăp nơm mra yơk mbah ma Păng tâm ntŭk păng nơm, Lĕ rngôch gôl dak mƀŭt ma lĕ bri dak tâm ban pônây lĕ.

¹² “Bi khân may, hơi phung ƀon lan Kus! Khân may mra khĭt ma đao Gâp.”

¹³ Brah Yêhôva mra yơr ti rlet mpeh pa lơ, Păng mra ƀư rai bri Asiri, Jêh ri ƀư ma Ninive jêng du ntŭk rngol, Du ntŭk neh sơh nâm bu bri rdah.

¹⁴ Phung mpa rong mra kuen ta nklang ƀon; Lĕ rngôch ntil phung mpô mpa êng, Nđâp ma klang grât jêh ri blŏ, Gŭ ta ăp chiông meh gâng tâm ban lĕ, Nteh sĭm ndrau huy prot ta mpông bloh, Nau lĕ rngol ta ntŭk mbong mpông, Yorlah ăp ntil ndơ bu ƀư ma tơm si sêdar lĕ rơih lơi.

¹⁵ Ƀon toyh aơ răm maak hŏ gŭ jêh ma nau mpăn lah êng pô aơ: “Gâp aơ, padih gâp mâu hôm geh bunuyh êng ôh!” Ƀiălah aƀaơ păng lĕ jêng rngol jêh, Ƀư ntŭk ma phung mpô mpa bri bê̆ch kuen! Ăp bunuyh hăn rgăn gơm mưch rvêh ti nsŭch da dê!