Sôphôni 1 - Nau Brah Ndu Ngơi 2023

Nau mbơh lor nduyh ma n'gor Yuđa

¹ Tâm rnôk Y-Jôsia, kon bu klâu Y-Amôn, hađăch n'gor Yuđa, geh nau Brah Yêhôva lah ma Y-Sêphania, kon bu klâu Y-Kusi, sau Y-Gêdalia, se Y-Amaria săn Y-Hêsêkia.

² Brah Yêhôva lah: “Gâp mra pih kloh lĕ rngôch ndơ tă bơh klơ neh ntu.

³ Gâp mra pih kloh lĕ kon bunuyh jêh ri mpô mpa, Gâp mra pih kloh lĕ sĭm klơ trôk jêh ri ka tâm dak mƀŭt; Gâp mra ƀư ma phung mhĭk chêh prah, Jêh ri ƀư rai lơi phung bunuyh bơh neh ntu.” Brah Yêhôva lah pônây.

⁴ “Gâp mra yơr ti tâm rdâng đah phung Yuđa Jêh ri lĕ rngôch phung gŭ ta ƀon Yêrusalem; Gâp mra ƀư rai lĕ tă bơh ntŭk aơ phung hôm e yơk mbah ma brah Baal, Jêh ri amoh phung kan ndơ ƀư brah ma rup brah nđâp phung kôranh ƀư brah.

⁵ Gâp mra nkhĭt lĕ phung chon mbah ta klơ chor ngih Jêh ri yơk mbah ma tahan tâm trôk, Phung yơk mbah jêh ri sơm ton đah Brah Yêhôva, Jêh nây sơm ton đŏng yor tă hađăch khân păng,

⁶ Nđâp phung lĕ chalơi jêh mâu tĭng Brah Yêhôva, Phung mâu ŭch joi Brah Yêhôva, jêh ri mâu ôp ôh Păng.

⁷ Gŭ klăk klêm hom tanăp Kôranh Brah Yêhôva! Yorlah nar Brah Yêhôva hŏ dăch tât jêh; Brah Yêhôva hŏ ndrăp nkra jêh du mlâm mpa ƀư brah, Prăp êng ma phung bu năch Păng lĕ jă jêh.

⁸ Tâm nar Brah Yêhôva nhhơr mpa ƀư brah, Gâp mra tâm rmal phung kôranh chiă uănh, phung kon bu klâu hađăch Jêh ri lĕ rngôch phung nsoh kho ao bu năch.

⁹ Ta nar nây tâm ban lĕ, Gâp mra tâm rmal Lĕ rngôch phung nsăt rlau mbong vâl, Jêh ri phung ƀư ma ngih kôranh khân păng Bêng ma nau djơh mhĭk jêh ri nau ndơm.”

¹⁰ Brah Yêhôva lah: “Tâm nar nây, Mra geh bâr nter huy bơh mpông pêr Ka, Nau nhĭm nter ta ntŭk Nkual Tal Bar, Nteh rlâm chah lĕ bơh phung yôk.

¹¹ Hơi phung gŭ tâm Ƀon Tâm Dâng, nhĭm nter hom! Yorlah lĕ rngôch phung tăch rgâl mâu hôm đŏng ôh, Jêh ri phung njing prăk lĕ rai yot jêh.

¹² Nôk nây, Gâp mra djôt ŭnh rdo sek joi ƀon Yêrusalem, Jêh ri mra tâm rmal phung geh nau mpay jêh nâm bu ndrănh djah dăch dŭt, Jêng phung lah êng pô aơ: ‘Brah Yêhôva mâu mra ăn nau ueh ôh, Mâu lĕ ăn nau mhĭk.’

¹³ Drăp ndơ khân păng bu mra sŏk pit, Ngih vâl bu mra chalơi rngot. Khân păng mra ndâk ngih ƀiălah mâu geh gŭ ôh, Tăm tơm krăk ƀâu ƀiălah mâu geh nhêt ôh dak ndrănh.”

Nar toyh bơh Brah Yêhôva

¹⁴ “Nar toyh bơh Brah Yêhôva lĕ dăch tât jêh, Dăch ngăn jêh, păng tât gơnh ngăn ro. Geh bâr nter lah rêh ni ngăn tâm nar Brah Yêhôva, Nôk nây phung janh mra nter nhĭm tâm ban lĕ.

¹⁵ Nar nây jêng nar nau ji nuih, Nar nau mhĭk tât jêh ri nar rêh ni, Nar ƀư rai jêh ri jêng rngol, Nar ngo klĕng jêh ri rngot ngăn, Nar geh ndâr tŭk jêh ri gui nkâm,

¹⁶ Nar geh bâr nŭng jêh ri nau nter tâm lơh Lĕ ƀon toyh pêr nâp jêh ri pôih tŭm prêh ta njônh mpêr ƀon.

¹⁷ Gâp mra leo nau rêh ni tât ma phung bunuyh; Khân păng mra chuat hăn nâm bu bunuyh chieh măt, Yorlah hŏ ƀư tih jêh đah Brah Yêhôva; Mham khân păng mra nkhŭt nâm bu neh muy, Jêh ri proch ôm hăch nâm bu ek.

¹⁸ Nđâp ma prăk mâu lah mah khân păng Kŏ mâu dơi đŏng tâm rklaih khân păng Tâm nar Brah Yêhôva ji nuih. Ƀiălah tâm lam neh ntu mra geh ŭnh ntôn bơh Păng su ntrŭt, Yorlah Păng mra ƀư rai lĕ rngôch phung gŭ ta klơ neh ntu Ma nau krit toyh ngăn!”