Sakari 9 - Nau Brah Ndu Ngơi 2023

Nar kăndơ̆ phung ƀon lan Israel ( 9:1 – 14:21 ) Phung rlăng đah Israel dơn nau phat dôih

¹ Aơ nau mbơh lor: Nau ngơi Brah Yêhôva tâm rdâng đah bri Hadrak, Nau ngơi nây tâm rdâng đŏng đah bri Damas. Yorlah măt lĕ rngôch bunuyh jêh ri noi deh Israel N'gơr uănh ma Brah Yêhôva da dê.

² Nau ngơi nây hŏ lah đŏng ma ƀon Hamat, dăch n'har bri đah ƀon Damas, Jêh ri lah ma ƀon Tyre, ƀon Sidôn, jêng ƀon geh nau blau mĭn ngăn.

³ Nđâp lah ƀon Tyre hŏ ƀư du mlâm pôih nâp ma păng nơm, Prăp nkrem prăk âk nâm bu ndruyh neh, Jêh ri nkrem mah nâm bu dak bŏk rŏ trong sâng.

⁴ Ƀiălah aơ, Kôranh Brah mra sŏk pit lĕ drăp ndơ păng, Nklơ̆ lơi nau dơi păng tâm dak mƀŭt, Bi păng nơm ŭnh mra sa.

⁵ Ƀon Askalôn mra saơ jêh ri klach; Ƀon Gaxa tâm ban lĕ dơn nau rêh ni; Ƀon Êkron tâm ban lĕ, yorlah nau păng kâp gân mra rai. Hađăch ƀon Gaxa mra khĭt, Ƀon Askalôn mâu mra geh ƀon lan gŭ ôh.

⁶ Phung mpôl băl tâm rlŭk mra gŭ tâm ƀon Asdôt; Gâp mra ngroh lơi nau sưr bơh phung Philistin.

⁷ Gâp mra jut kloh mham tă bơh trôm mbung păng, Jêh ri sŏk lĕ ndơ sa ƀơ̆ ƀơch luh bơh sêk păng; Păng mra nâm bu phung ƀon lan hôm klen ma Brah Ndu he Jêh ri mra jêng nâm bu du huê kôranh tâm noi deh Yuđa Bi phung Êkron mra jêng nâm bu phung Jêbusit.

⁸ Gâp mra ƀư pôih gay gak ngih Gâp, Gay njrăng ma bunuyh hăn nsong. Nơm tŭn jot mra mâu hôm tŭn jot phung ƀon lan Gâp đŏng ôh, Yorlah aƀaơ ri Gâp hŏ treng uănh đah trôm măt Gâp nơm.

Hađăch Siôn jŭr văch

⁹ Hơi kon bu ur ƀon Siôn, lĕ rngôch hâk răm hom! Hơi kon bu ur ƀon Yêrusalem, troh nter răm maak hom! Aơ, Hađăch may văch ma may; Păng jêng Nơm Sŏng Srăng jêh ri ăn nau tâm rklaih, Dêh rhêt jêh ri ncho seh bri, Du mlâm seh bri kon, jêng kon bơh seh bri me.

¹⁰ Gâp mra ƀư rai lơi ndeh seh bơh bri Êphraim Jêh ri seh tâm lơh tă bơh Yêrusalem; Hăr jêh ri na dŏng nôk tâm lơh bu mra nkê̆ch lơi, Jêh ri Păng mra mbơh nau đăp mpăn ăn ma lĕ bri dak; Nau dơi Păng chiă uănh mra n'hot ntơm bơh dak mƀŭt aơ tât ma dak mƀŭt ri, Ntơm bơh Dak Krong Me aơ tât ma bôl dŭt neh ntu.

Nau ndâk njêng tay phung ƀon lan Kôranh Brah

¹¹ “Bi ma may tâm ban đŏng, yorlah mham Gâp tâm rnglăp đah may, Pôri Gâp mra mƀơk phung bu nă may luh bơh ntu jru mâu geh ôh dak.

¹² Hơi phung bu krŭng geh nau kâp gân, plơ̆ sĭt hom ma pôih! Nar aơ ro, Gâp mra mbơh pô aơ Gâp mra mplơ̆ ăn khân may bar tơ̆ âk lơn.

¹³ Gâp mra van phung Yuđa nâm bu na gâp, Jêh ri Êphraim nâm bu hăr păng. Hơi ƀon Siôn, Gâp mra nsônh phung kon may Tâm rdâng đah phung kon Javan, Jêh ri Gâp mra ăn may jêng nâm bu đao phung tahan dăng tâm lơh.”

¹⁴ Nôk nây, Brah Yêhôva mra mpơl ăn phung ƀon lan păng saơ, Hăr Păng luh du nâm bu lơp nglaih; Brah Yêhôva mra uh nŭng, Păng hăn ndrel ma sial vănh blông mpeh pa dâng.

¹⁵ Brah Yêhôva ma phung tahan mra mât njrăng khân păng, Khân păng mra sa rvăn jêh ri jot lơi lĕ găr lŭ dŏng pănh na; Khân păng mra nhêt sa jêh ri ƀư drơu drơu nâm bu nhŭl ndrănh, Jêh ri mra bêng ler nâm bu tâm ngan rlŭ, Nâm bu ăp njônh nơng ƀư brah.

¹⁶ Ta nar nây, Yêhôva Brah Ndu khân păng mra tâm rklaih ƀon lan khân păng Nâm bu phung biăp Păng; Khân păng mra sol ang ta klơ neh Nâm bu lŭ khlay nchrat rêp ƀlêp ta klơ đon hađăch,

¹⁷ Ngăn yơh, ueh reh ngăn lĕ rngôch nau ueh! Ba mra ƀư ăn dăng phung mom ndăm, Jêh ri ndrănh mhe ƀư răm maak ma phung bu ur druh.