Sakari 8 - Nau Brah Ndu Ngơi 2023

Nau ton ndâk tay đŏng ƀon Yêrusalem

¹ Brah Yêhôva ma phung tahan ngơi đŏng ma gâp pô aơ:

² Brah Yêhôva ma phung tahan lah: “Gâp hŏ ntôn ngăn ma ƀon Siôn, Gâp bêng ma nau ntôn hâu ngăn yor ma păng.”

³ Brah Yêhôva lah: “Gâp mra plơ̆ sĭt đŏng ma Siôn jêh ri gŭ ta nklang ƀon Yêrusalem. Rnôk nây bu ntơ ƀon Yêrusalem jêng ƀon Nanê̆ Ngăn, yôk Brah Yêhôva ma phung tahan bu mra ntơ Yôk Kloh Ueh.”

⁴ Brah Yêhôva ma phung tahan lah: “Mra hôm e geh phung bu ranh bu ur, bu klâu gŭ rlu pâl tâm ăp nkual ntŭk pâl ta ƀon Yêrusalem, ăp nơm djôt mâng jra ta ti, yor păng lĕ ranh ngăn.

⁵ Ăp nkual ntŭk rlu pâl tâm ƀon toyh mra bêng phung bu klâu ndăm bu ur druh gŭ pâl rlưn ta nây.”

⁶ Brah Yêhôva ma phung tahan lah: “Tâm nar nây, nđâp lah phung ƀon lan hôm e klen aơ, uănh ma nau nây nâm bu hih rhâl, ƀiălah ma măt Gâp uănh mâu geh hih rhâl ôh?” Brah Yêhôva ma phung tahan lah.

⁷ Brah Yêhôva ma phung tahan lah: “Aơ, Gâp mra tâm rklaih phung ƀon lan Gâp ntơm bơh mpeh luh nar n'ho tât mpeh nhâp nar.

⁸ Gâp djôt leo khân păng sĭt, jêh ri khân păng mra gŭ ta nklang ƀon Yêrusalem. Khân păng mra jêng phung ƀon lan Gâp; bi Gâp mra jêng Brah Ndu khân păng tâm nau răp jăp jêh ri nau sŏng srăng.”

⁹ Brah Yêhôva ma phung tahan lah: “Tâm nar aơ, khân may jêng phung gŭ iăt lĕ nau ngơi tă bơh bâr mbung phung nơm mbơh lor, tâm nar jây Brah Yêhôva ma phung tahan, nâm bu ntĭt ngih brah, gay ƀư mbon ndâk njêng, pôri ăn khân may ƀư hom ma ti khân may nơm dơi dăng!

¹⁰ Yorlah lor panăp nar nây mâu geh ôh nau prăk nkhôm ma phung pah kan nđâp ma mpô mpa; yor ma phung rlăng hôm ŭch tâm rdâng, bunuyh nsong luh lăp mâu geh ôh đăp mpăn, yorlah Gâp hŏ ăn lĕ rngôch bunuyh tâm rdâng đah phung chiau meng păng.

¹¹ Ƀiălah aƀaơ ri Gâp mâu mra ƀư ôh ma phung ƀon lan hôm klen aơ nâm bu Gâp ƀư kăl e.” Brah Yêhôva ma phung tahan lah kơt nây.

¹² “Yorlah gŭ ta nây mra geh găr ntil đăp mpăn; tơm krăk ƀâu mra geh play jêh ri neh mra geh play âk tât yan păng, lĕ ndâr trôk mra ăn truh dak tŭk. Gâp mra ăn phung ƀon lan hôm klen dơi dơn lĕ ndơ aơ.

¹³ Hơi ngih Yuđa jêh ri Israel! Mâm jêng nau bu rak rtăp khân may tâm ăp bri dak, pôri Gâp mra tâm rklaih khân may, jêh ri ƀư ma khân may mra jêng du nau ueh uĭn tâm ban lĕ. Lơi klach ôh, ƀiălah ƀư hom ti khân may ăn jêng dăng!”

¹⁴ Yorlah Brah Yêhôva ma phung tahan lah: “Nâm bu Gâp hŏ ăn jêh nau mhĭk tât khân may, lah chô yau khân may nsônh nuih Gâp, Gâp mâu rgâl ôh nau mĭn,” Brah Yêhôva ma phung tahan lah kơt nây,

¹⁵ “pôri nar aơ tâm ban lĕ, Gâp hŏ mĭn tay ăn nau ueh yô̆ ma ƀon Yêrusalem jêh ri ma ngih Yuđa. Khân may lơi ta klach ôh!

¹⁶ Aơ jêng nau ăn khân may ƀư: Ăp nơm sŏk nau ngơi ngăn ma phung chiau meng păng; ta mpông ƀon khân may, phat dôih hom ăn nanê̆ ngăn, nau di jêh ri nau đăp mpăn;

¹⁷ lơi ta mĭn nau mhĭk tâm nuih n'hâm ŭch ƀư djơh ndrăng khân may nơm; jêh ri lơi ta rŏng nau ton mƀruh ôh, yorlah Gâp tâm rmot ma lĕ rngôch nau nây.” Brah Yêhôva lah kơt nây.

Ât sông sa tâm nau maak

¹⁸ Brah Yêhôva ma phung tahan ngơi đŏng ma gâp:

¹⁹ Brah Yêhôva ma phung tahan lah: “Lĕ nau ât sông sa ta khay puăn, ta khay prăm ta khay pơh, jêh ri khay jât mra jêng nau maak răm, jêh ri lĕ nar rƀŭn bêng ma nau maak ma Yuđa. Yor nây rŏng hom ma nau nanê̆ ngăn jêh ri đăp mpăn.”

Âk râk ntil mpôl bunuyh mra văch ma Yêrusalem

²⁰ Brah Yêhôva ma phung tahan lah: “Âk ntil mpôl bunuyh jêh ri phung gŭ tâm âk rplay ƀon toyh mra văch;

²¹ jêh ri phung gŭ tâm ƀon toyh aơ mra hăn jă ƀon toyh êng: ‘Aƀaơ, ăn he hăn văch gơnh ro gay vơl dăn nau yô̆ Brah Yêhôva jêh ri ŭch joi Brah Yêhôva ma phung tahan; gâp mra hăn tâm ban lĕ.’

²² Yor ri âk phung ƀon lan jêh ri phung ntil mpôl bunuyh ngăch dăng mra văch ta ƀon Yêrusalem, jêh ŭch joi Brah Yêhôva ma phung tahan jêh ri gay dăn nau ueh uĭn Brah Yêhôva.”

²³ Brah Yêhôva ma phung tahan lah: “Tâm âk nar nây, mra geh jât nuyh tă tâm ntil mpôl bunuyh nau ngơi êng êng, kuăn rdâng ta ntôr ao du huê Yuđa, jêh ri lah pô aơ: ‘Ăn hên hăn ndrel ma khân may, yorlah hên geh tăng pô aơ Brah Yêhôva gŭ ndrel ma khân may.’”