Sakari 7 - Nau Brah Ndu Ngơi 2023

Lĕ gưl ât sông sa ( 7:1 – 8:23 ) Nau nduyh ma nau ât sông sa

¹ Tâm năm tal puăn nôk hađăch Darius chiă uănh, tâm lơ puăn khay sĭn, jêng khay Kislêvơ, geh Brah Yêhôva ngơi ma Y-Sakari

² Nôk nây, phung ƀon lan Bêthel đă Y-Sarêser jêh ri Rêgem-Mêlek nđâp ma phung bunuyh tĭng khân păng hăn, gay ŭch dăn nau ueh maak bơh Brah Yêhôva.

³ Khân păng ôp ma phung kôranh ƀư brah tâm ngih Brah Yêhôva ma phung tahan jêh ri ma phung nơm mbơh lor pô aơ: “Di lĕ hên dơi nhĭm vơl jêh ri prăp êng hên nơm ăn kloh ueh tâm khay prăm nâm bu hŏ vay ƀư tâm ăp năm?”

⁴ Nôk nây geh nau ngơi bơh Brah Yêhôva ma phung tahan lah ma gâp pô aơ:

⁵ “Nkoch hom ma lĕ rngôch phung ƀon lan tâm n'gor jêh ri phung kôranh ƀư brah pô aơ: ‘Khân may ât sông sa jêh ri nhĭm vơl tâm khay prăm jêh ri khay pơh hŏ pơh jât năm aơ jêh, di lĕ yor ma Gâp ngăn, khân may ât sông sa nây?

⁶ Lah khân may nhêt sa, mâu di bơh yor ma khân may nơm dĭng nhêt mâu lah sa?

⁷ Nau nây mâu di tă nau ngơi Brah Yêhôva kuăl bơh phung nơm mbơh lor rnôk kăl e hăn mbơh, lah Yêrusalem jêh ri phung ƀon chiau meng gŭ jŭm păng hôm e geh phung ƀon lan gŭ jêh ri geh nau hao jêng, tâm ban ma bri Nêgep jêh ri bri Sêphêla geh phung ƀon lan gŭ lĕ?’”

Geh nau phat dôih yor mâu djôt prăp nau ngơi Brah Ndu

⁸ Jêh nây, geh nau Brah Yêhôva ngơi ma Y-Sakari:

⁹ “Brah Yêhôva ma phung tahan lah: ‘Phat dôih hom ma nau tâm di ngăn; ăp nơm sŏk hom nau ueh jêh ri nau yô̆ nđach gŭ ngao đah oh nâu nơm.

¹⁰ Lơi tŭn jot ôh phung kon đơi, bu ur ndrô, nơm gŭ njưh tâm n'gor, mâu lah nơm o ach. Lơi ta mĭn tâm nuih n'hâm ŭch ƀư nau mhĭk ma oh nâu nơm.’

¹¹ Ƀiălah khân păng dun mâu ŭch iăt, dăng bôk jêh ri ndôn kơi, nsêt lơi tôr khân păng nơm gay lơi ăn tăng ôh nau ngơi.

¹² Khân păng ƀư ăn nuih n'hâm jêng dăng nâm bu lŭ diamôn, gay mâu tăng nau vay jêh ri lĕ nau ngơi Brah Yêhôva ma phung tahan hŏ njuăl jêh ma Huêng Brah Păng ăn ma phung nơm mbơh lor kăl e ri. Yor nây Brah Yêhôva ma phung tahan geh nau ji nuih toyh ngăn.

¹³ Brah Yêhôva ma phung tahan lah: ‘Lah Gâp kuăl, khân păng mâu ŭch iăt ôh, pôri lĕ, lah khân păng kuăl dăn, kŏ Gâp mâu iăt lĕ.

¹⁴ Gâp ƀư ăn pru pra khân păng nâm bu sial vănh blông ta nklang lĕ rngôch ntil mpôl bunuyh khân păng mâu mâp gĭt năl ôh. Pôri bri neh pakơi khân păng kŏ tât jêng rngol mâu hôm geh ôh bunuyh brô̆ nsong. Khân păng hŏ ƀư ăn bri dak ueh maak jêng rngot.’”