Sakari 6 - Nau Brah Ndu Ngơi 2023

Nau tâm saơ puăn mlâm ndeh seh

¹ Gâp n'gơr đŏng măt jêh ri uănh saơ, geh puăn mlâm ndeh seh luh tă bơh ta nklang bar mlâm yôk, lĕ yôk nây jêng yôk ma kông.

² Ndeh seh tal nguay geh phung seh chăng; ndeh seh tal bar, geh seh krăk;

³ ndeh seh tal pe, seh nglang; ndeh seh tal puăn geh seh êr rvanh.

⁴ Gâp ôp ma tông mpăr nơm dôl ngơi đah gâp: “Hơi kôranh gâp! Moh bu ntĭt lĕ ndeh nây?”

⁵ Tông mpăr plơ̆ lah: “Nây jêng puăn ntil sial ta klơ trôk luh du, lah lôch jêh mpơl khân păng nơm panăp măt Kôranh Brah lam bri neh ntu.

⁶ Phung ndeh seh krăk hăn tât ta n'gor mpeh pa lơ, jêh ri phung seh nglang hăn tĭng pakơi păng, jêh ri phung seh êr rvanh hăn tât ta n'gor mpeh pa dâng.”

⁷ Phung seh dăng nây luh jêh ri gơih ngăn ŭch hăn nsong uănh lam neh ntu. Tông mpăr lah ma khân păng: “Hăn nsong hom lam neh ntu.” Pôri khân păng hăn nsong lam neh ntu.

⁸ Jêh nây, tông mpăr kuăl gâp ma bâr huy jêh ri lah ma gâp: “Uănh hom, phung seh hăn tât bri mpeh pa lơ hŏ ƀư ăn ma Huêng Brah Gâp gŭ rlu tâm bri mpeh pa lơ.”

Nau ton ndâk tay ngih brah

⁹ Geh nau Brah Yêhôva lah ma gâp:

¹⁰ “Sŏk dơn hom prăk jêh ri mah tă bơh phung bu nă nâm bu Y-Hêldai, Y-Tôbia jêh ri Y-Jêdaya. Tâm nar nây, ăn may hăn hom rlet ma ngih Y-Jôsia, kon bu klâu Y-Sêphania, khân păng mhe plơ̆ sĭt tă bơh Babilôn.

¹¹ Ăn may sŏk dơn prăk jêh ri mah nây ƀư du mlâm đon hađăch, jêh ri ndô klơ bôk kôranh ƀư brah toyh lơn Y-Yôsuê, kon bu klâu Y-Jêhôsadak.

¹² Ăn may lah ma păng pô aơ Brah Yêhôva ma phung tahan lah: ‘Aơ geh du huê bunuyh amoh păng jêng Nkeh Nse mra chăt nse bơh ntŭk păng. Nơm nây mra ndâk ngih Brah Yêhôva.

¹³ Păng Nơm ro mra ndâk ngih Brah Yêhôva, păng nơm mra dơi geh nau rnam, gŭ chiă uănh ta klơ sưng hađăch păng, jêh ri ƀư kôranh ƀư brah gŭ klơ sưng hađăch păng; mra geh nau tâm rnglăp ăn đăp mpăn lĕ bar nau kan.’

¹⁴ Đon hađăch mra gŭ tâm ngih Brah Yêhôva jêng du ntil ndơ kah gĭt ma Y-Hêlem, Y-Tôbia, Y-Jêdaya jêh ri Y-Hen kon bu klâu Y-Sêphania.”

¹⁵ Phung gŭ ngai mra tât gay kơl ndâk ngih Brah Yêhôva; jêh ri khân may mra gĭt Brah Yêhôva ma phung tahan njuăl gâp hăn tât ma khân may. Tơlah khân may gơih srôih tông bâr Brah Yêhôva khân may, pôri nau nây mra tât ngăn.