Sakari 5 - Nau Brah Ndu Ngơi 2023

Nau tâm saơ ndrom samƀŭt ntâu mpăr

¹ Gâp n'gơr măt uănh jêh ri saơ geh du ndrom samƀŭt ntâu dôl mpăr.

² Tông păr ueh ôp gâp: “Moh ndơ may saơ?” Gâp plơ̆ lah: “Gâp saơ du ndrom samƀŭt ntâu dôl mpăr; jong păng klăp lah sĭn met, dĭ păng puăn met n'gul.”

³ Tông mpăr lah ma gâp: “Nây jêng nau rak rtăp lam bri neh. Mbu moh ntŭng bu mra ƀư rai tĭng nâm nau nchih mpeh du đah tâm samƀŭt aơ; jêh ri mbu moh ton mƀruh bu mra ƀư rai lơi tĭng nâm nau nchih đah ri tâm ndrom samƀŭt aơ.”

⁴ Brah Yêhôva ma phung tahan lah: “Gâp mra ƀư ma ndrom samƀŭt aơ hăn, păng mra lăp tâm ngih phung ntŭng, jêh ri tâm ngih phung ton mƀruh ma amoh Gâp. Păng mra gŭ ta nklang ngih vâl nây jêh ri su ƀư rai ngih vâl nây, nđâp ma kađar jêh ri lŭ.”

Nau tâm saơ ma bu ur gŭ tâm bĭ

⁵ Tông mpăr nơm ngơi đah gâp hăn rlet panăp jêh ri lah: “Aƀaơ ri n'gơr hom măt uănh leo klơ moh ndơ luh du aơ.”

⁶ Gâp ôp: “Moh ndơ nây?” Păng plơ̆ lah: “Nây jêng du mlâm bĭ dôl du luh.” Păng lah đŏng: “Nây jêng nau tih bơh ƀon lan lam bri neh.”

⁷ Jêh nây gâp saơ du mlâm ndrŭp bu ƀư ma ndrak dơi yơk leo klơ, jêh ri geh du huê bu ur gŭ tâm bĭ.

⁸ Tông mpăr lah: “Bu ur aơ tâm ntĭt ma nau mhĭk.” Jêh nây păng nklơ̆ bu ur nây tŭp tâm bĭ, jêh ri rdêl lơi đah ndrŭp bu ƀư ma ndrak ta bâr bĭ.

⁹ Gâp n'gơr uănh, jêh ri saơ mpơl bar hê bu ur, nting năr khân păng lĭ tâm sial; nting năr khân păng nâm bu nting năr klang kreo. Khân păng chông lơi bĭ vah vang trôk đah neh.

¹⁰ Gâp ôp tông mpăr dôl ngơi đah gâp: “Ta ntŭk khân păng chông leo bĭ?”

¹¹ Tông mpăr plơ̆ lah ma gâp: “Djôt leo tâm bri Sinar gay ma ƀư ngih vâl ma păng. Lah hŏ ƀư jêh, bu mra dơm bĭ ta ntŭk păng.”