Sakari 4 - Nau Brah Ndu Ngơi 2023

Nau tâm saơ jâng ŭnh kađen ma mah jêh ri bar tơm play ôlive

¹ Tông mpăr plơ̆ văch ngơi tay ma gâp jêh ri rlay gâp, nâm bu rlay du huê bunuyh dôl hăk bê̆ch.

² Păng lah ma gâp pô aơ: “Moh ndơ may saơ?” Gâp plơ̆ lah: “Aơ, gâp uănh saơ, du mlâm jâng kađen bu ƀư đah mah, jêh ri du mlâm yăng dak ngi ôlive ta klơ păng; jâng kađen geh pơh mlâm ŭnh kađen, n'hanh ma pơh mlâm dĭng dak ngi ăn luh ăp ŭnh kađen gŭ ta klơ păng.

³ Kêng meng jâng kađen geh bar tơm play ôlive, du tơm play mpeh pa ma yăng dak ngi jêh ri du tơm play mpeh pa chiau.”

⁴ Nôk nây, gâp ôp tông mpăr dôl ngơi đah gâp: “Hơi kôranh gâp, moh nau bu ntĭt nau aơ?”

⁵ Tông mpăr nơm ngơi đah gâp plơ̆ lah: “May mâu gĭt moh nau ntĭt ndơ aơ?” Gâp lah: “Mâu gĭt ôh, hơi kôranh gâp.”

⁶ Păng lah ma gâp: “Aơ jêng nau ngơi bơh Brah Yêhôva lah ma Y-Sôrôƀaƀel: ‘Nau nây mâu di yor nau dơi ôh, kŏ mâu lĕ yor nau blau kan, ƀiălah yor Brah Huêng ueh Gâp.’ Brah Yêhôva ma phung tahan lah.

⁷ Hơi yôk toyh ri, mbu moh may jêng? Tanăp măt Y-Sôrôƀaƀel may mra jêng neh lâng. Păng mra djôt leo lŭ mbon ma bâr bu nter lah: ‘Ueh maak ngăn! Ueh maak ngăn!’”

⁸ Geh nau Brah Yêhôva ngơi tay ma gâp pô aơ:

⁹ “Ti Y-Sôrôƀaƀel hŏ ndâk jêh mbon ngih brah aơ, pôri ti păng đŏng mra ƀư lôch.” Jêh ri khân may mra gĭt Brah Yêhôva ma phung tahan hŏ njuăl gâp hăn tât ma khân may.

¹⁰ Yorlah mbu moh mưch rmot ma lĕ nau kan jê̆ lê̆ tâm nar ntơm mra gŭ maak lah saơ rse ndơ veh di rnhuan tâm ti Y-Sôrôƀaƀel. Pơh mlâm ŭnh kađen jêng găr măt Brah Yêhôva uănh lam bri neh.

¹¹ Gâp ôp ma tông mpăr: “Moh nau ntĭt bar tơm play ôlive gŭ êp mpeh pa ma jêh ri mpeh pa chiau jâng kađen ma mah nây?”

¹² Gâp ôp đŏng ma tông mpăr tơ̆ bar: “Moh nau ntĭt ma bar n'gĭng play ôlive gŭ ta meng bar mlâm dĭng dak ngi ƀư ma mah geh hoch dak ngi mah?”

¹³ Tông mpăr ôp tay ma gâp: “May mâu gĭt lĕ nau nây geh nau bu ntĭt lĕ?” Gâp lah: “Hơi kôranh, gâp mâu gĭt.”

¹⁴ Tông mpăr lah: “Nây jêng bar hê bunuyh hŏ tŏ dak ngi gay ma pah kan ăn ma Kôranh Brah tâm lĕ neh ntu.”