Sakari 3 - Nau Brah Ndu Ngơi 2023

Nau tâm saơ ma kôranh ƀư brah Y-Yôsuê jêh ri Satan

¹ Brah Yêhôva tâm mpơl đŏng ma gâp saơ kôranh ƀư brah toyh lơn Y-Yôsuê dâk panăp tông mpăr Brah Yêhôva, jêh ri Satan gŭ mpeh pa ma păng ŭch phong păng.

² Brah Yêhôva lah ma Satan: “Hơi Satan, Brah Yêhôva geh nau dơi nduyh may! Brah Yêhôva, Nơm hŏ săch jêh ƀon Yêrusalem, nduyh may! Mâu di bơh nơm aơ jêng rlŭt ŭnh dôl hit bu rhuăt lơi tă bơh ŭnh?”

³ Nôk nây, Y-Yôsuê nsoh ao uk, dâk tra năp tông mpăr.

⁴ Tông mpăr nây lah ma phung dôl dâk tanăp păng: “Doh hom ao uk tă bơh nơm nây.” Jêh ri tông mpăr lah ma Y-Yôsuê: “Uănh hom, Gâp hŏ sŏk lơi jêh nau kue tă bơh may, jêh ri Gâp mra ăn may nsoh ao ueh.”

⁵ Nôk nây, gâp lah: “Dăn Kôranh Brah ndô môk kloh klơ bôk păng đŏng.” Pôri khân păng ndô klơ bôk môk kloh jêh ri bu ăn păng nsoh ao jâr; tông mpăr Brah Yêhôva dôl dâk êp ta nây.

⁶ Tông mpăr Brah Yêhôva ntĭnh ngăn ma Y-Yôsuê pô aơ:

⁷ “Brah Yêhôva ma phung tahan lah: ‘Tơlah may chuat hăn tâm trong Gâp, tông jêh ri djôt prăp nau Gâp ntĭm, ri mơ may dơi chiă uănh ngih Gâp, jêh ri dơi gak mpông pêr Gâp, jêh ri Gâp mra ăn ma may chuat lăp tâm nklang phung dâk pah kan jŭm Gâp.

⁸ Hơi Y-Yôsuê, kôranh ƀư brah toyh lơn, may jêh ri nđâp phung mĭt jiăng gŭ panăp măt may, iăt hom! Yorlah lĕ phung aơ jêng nau ntĭt ma nau mra tât pô aơ Gâp mra ăn ma phung oh mon Gâp jêng Nkeh Nse văch mpơl.

⁹ Yorlah aơ, glo lŭ Gâp dơm jêh panăp măt Y-Yôsuê, knŏng du glo lŭ ƀiălah geh pơh mlâm găr măt. Gâp mra tor chrăk rplay samƀŭt ta klơ păng jêh ri Gâp mra sŏk lơi nau djơh mhĭk tă bơh bri dak aơ tâm du nar.’” Brah Yêhôva ma phung tahan lah.

¹⁰ Brah Yêhôva ma phung tahan lah: “Tâm nar nây, ăp nơm tâm khân may mra jă bunuyh chiau meng păng gŭ tâm dâng tơm krăk ƀâu jêh ri tơm rvi.”