Sakari 14 - Nau Brah Ndu Ngơi 2023

Ƀon Yêrusalem jêh ri lĕ rngôch bri dak

¹ Aơ, nar Brah Yêhôva dăch tât, nôk bu mra tâm pă lĕ rngôch ndơ pit sŏk bơh may ta nklang may.

² Gâp mra rgum lĕ rngôch bri dak tâm lơh đah ƀon Yêrusalem. Bu mra sŏk gro ƀon toyh, bu pit in ngih vâl, phung bu ur bu mra nchâp gay bê̆ch ndrel; n'gul ƀon mra hăn ƀư bu nă, ƀiălah phung ƀon lan hôm e bu mâu mprơh ngluh ôh tă bơh ƀon.

³ Nôk nây, Brah Yêhôva mra hăn tâm lơh đah lĕ rngôch bri dak nây, nâm bu Păng hŏ lơh jêh tâm rnôk tâm lơh.

⁴ Tâm nar nây, jâng Păng mra dâk ta klơ yôk Ôlive, jêng yôk tâm tham ƀon Yêrusalem mpeh luh nar. Yôk Ôlive mra đang ta nklang, jêng rlŭng toyh ngăn bơh luh nar tât nhâp nar; n'gul yôk trơn tĭt mpeh pa lơ, n'gul ri trơn tĭt mpeh pa dâng.

⁵ Khân may mra nchuăt du tâm rlŭng ăp yôk Gâp, yorlah rlŭng yôk nây jong mra tât ta ntŭk Asal. Khân may mra nchuăt du nâm bu khân may hŏ nchuăt jêh nôk n'găr neh ntu tâm rnôk rô̆ Y-Usia hađăch n'gor Yuđa. Nôk nây, Yêhôva Brah Ndu gâp mra văch, jêh ri lĕ rngôch phung kloh ueh gŭ ndrel ma păng.

Brah Yêhôva chiă uănh

⁶ Ta nar nây, mâu mra geh nau ang đŏng ôh, âk mănh mbing nchrat ang mra nhâp êng khân păng nơm.

⁷ Êng ngăn tâm du nar nây knŏng Brah Yêhôva dơm mra gĭt; mâu di lĕ nôk nar, mâu lĕ di bri măng, yorlah bri măng ngo mra geh nau ang.

⁸ Ta nar nây, dak rêh mra hoch tă bơh Yêrusalem, n'gul hoch leo mpeh dak mƀŭt luh nar, jêh ri n'gul hoch mpeh dak mƀŭt nhâp nar, hoch ndăng tâm yan ta vai jêh ri yan puh.

⁹ Brah Yêhôva mra jêng hađăch ma lam neh ntu. Tâm nar nây, Brah Yêhôva mra jêng Nơm knŏng nguay, jêh ri amoh Păng mra geh knŏng nguay dơm.

¹⁰ Lĕ n'gor bri mra plơ̆ jêng neh lâng ntơm bơh Gêba tât ta Rimôn, mpeh pa dâng Yêrusalem. Ƀiălah Yêrusalem mra n'hao klơ gŭ ta ntŭk ơm păng, ntơm bơh mpông pêr Benjamin kŏ tât mpông pêr tal nguay jêh ri tât mpông pêr Njônh, jêh ri ntơm bơh vâl tŭm Hananel tât ta ntu păt ndrănh ma hađăch.

¹¹ Yêrusalem mra geh bunuyh gŭ, păng mâu mra geh nau rai đŏng ôh, ƀiălah mra gŭ đăp rmên ngăn.

¹² Aơ jêng nau rêh ni Brah Yêhôva ƀư gay phat dôih tâm rmal ma lĕ rngôch phung ƀon lan hăn tâm lơh đah Yêrusalem: Păng mra ƀư ma ăp nơm, dôl jâng khân păng hôm dâk nglay săk khân păng mra ôm, măt khân păng ôm tâm trôm ndăr măt, mpiăt khân păng ôm tâm trôm mbung păng.

¹³ Tâm nar nây, Brah Yêhôva mra ƀư nau rŭng răng toyh tâm khân păng; pôri ăp nơm mra kuăn phung chiau meng păng, jêh ri khân păng tâm lơh ndrăng khân păng nơm.

¹⁴ Nđâp ma phung Yuđa đŏng tâm lơh ta ƀon Yêrusalem, jêh ri mra sŏk lĕ rngôch drăp ndơ phung mpôl bunuyh chiau meng, geh mah, prăk jêh ri phung ao jâr âk ngăn.

¹⁵ Nau rêh ni nây kŏ tât đŏng ma phung seh, seh bri, seh samô, jêh ri lĕ rngôch mpô mpa tâm nkual tahan.

¹⁶ Jêh nây, lĕ rngôch phung hôm klen tâm lĕ bri dak tă lơh jêh ƀon Yêrusalem mra hăn hao ta nây ăp năm gay yơk mbah panăp măt Hađăch jêng Brah Yêhôva ma phung tahan, jêh ri văch râng kah gĭt nau rƀŭn Ngih Ndưp.

¹⁷ Tâm lĕ phung mpôl băl bunuyh ta neh ntu, mbu nơm phung mâu văch tât ôh ma ƀon Yêrusalem gay yơk mbah panăp măt Hađăch, jêng Brah Yêhôva ma phung tahan, pôri mâu mra geh ôh dak mih ma khân păng.

¹⁸ Tơlah phung Êjipt mâu hăn hao ôh jêh ri mâu văch yơk mbah tât ta nây pôri dak mih mâu geh ôh ma khân păng, jêh ri khân păng mra dơn nau rêh ni bơh Brah Yêhôva hŏ ƀư gay tâm rmal lĕ bri dak mâu hăn hao râng kah gĭt prăp nau rƀŭn Ngih Ndưp.

¹⁹ Nây jêng nau tâm rmal ma Êjipt jêh ri âk n'gor bri êng mra dơn, tơlah khân păng mâu hăn hao râng kah gĭt nau rƀŭn Ngih Ndưp.

²⁰ Ta nar nây mra geh nau nchih ta nteng neng seh: “KLOH UEH MA BRAH YÊHÔVA!” Lĕ glah tâm ngih Brah Yêhôva mra tâm ban ma ngan ta klơ nơng ƀư brah.

²¹ Lĕ rngôch glah tâm ƀon Yêrusalem jêh ri tâm n'gor Yuđa mra jêng ndơ kloh ueh prăp ăn ma Brah Yêhôva ma phung tahan. Gay ma mbu nơm nhhơr ndơ ƀư brah dơi văch, sŏk glah gâm. Tâm nar nây, mâu hôm geh bunuyh Kanaan ôh tâm ngih Brah Yêhôva ma phung tahan.