Sakari 13 - Nau Brah Ndu Ngơi 2023

Nau ngluh lơi phung kôranh mbơh lor nklă. – Nau phat dôih jêh ri nau ton

¹ Ta nar nây, mra geh du n'hor dak pơk ma ngih Y-Đavit jêh ri phung gŭ tâm ƀon Yêrusalem, gay ƀư kloh nau tih jêh ri nau ƀơ̆ ƀơch.

² Brah Yêhôva ma phung tahan lah: “Tâm nar nây, Gâp mra ƀư kloh lĕ amoh lĕ rngôch rup brah tâm bri dak aơ, bu mâu mra hôm kah gĭt ôh ma khân păng. Gâp mra mprơh nsot lơi phung nơm mbơh lor jêh ri brah ƀơ̆ ƀơch du bơh bri aơ.

³ Tơlah hôm e geh bunuyh ngơi nau mbơh lor, pôri mbơ̆ jêh ri mê̆ jêng nơm hŏ deh jêh ăn păng, mra lah ma păng: ‘May mâu mra rêh đŏng ôh, yorlah may ngơi nau mƀruh tâm amoh Brah Yêhôva.’ Jêh ri mê̆ mbơ̆ jêng nơm hŏ deh jêh păng mra ntâp păng lah păng ngơi nau mbơh lor.

⁴ Ta nar nây, ăp nơm mbơh lor mra prêng ma nau păng tâm saơ nôk ngơi nau mbơh lor. Khân păng mâu hôm nsoh ôh ao jâr ma rsau gay ngơi ndơm đŏng ôh.

⁵ Ƀiălah khân păng mra lah pô aơ: ‘Gâp mâu jêng nơm mbơh lor ôh ƀiălah gâp jêng du huê bunuyh chuar lŏ sre, yorlah gâp hŏ ƀư dĭk ntơm bơh jê̆.’

⁶ Lah geh bu ôp: ‘Moh geh nau sôt may ta bar đah nting tur?’ Păng mra plơ̆ lah: ‘Nây jêng nau sôt gâp hŏ geh ƀư tâm ngih mĭt jiăng gâp.’”

Bu dong rmăk biăp jêh ri phung biăp chah rai

⁷ Brah Yêhôva ma phung tahan lah: “Hơi đao, kah rngăl hom may gay lơh rmăk biăp Gâp, Jêh ri lơh bunuyh ƀư mĭt jiăng đah Gâp. Lơh hom bunuyh rmăk biăp gay phung biăp nchah rai pru pra, Gâp mra rle ti Gâp lơh phung kon se jê̆.”

⁸ Brah Yêhôva lah: “Nau tât tâm lam bri, Bar kô̆ tâm pe bu mra ntlơi jêh roh rai, Ƀiălah du kô̆ tâm pe mra om rêh.

⁹ Gâp mra leo du kô̆ tâm pe nây lăp tâm ŭnh, Gâp mra krĕt khân păng ăn kloh nâm bu krĕt prăk, Rlong uănh khân păng nâm bu rlong uănh mah. Khân păng mra vơh vơl amoh Gâp, Jêh ri Gâp mra plơ̆ lah ma khân păng. Gâp mra lah pô aơ: ‘Khân păng jêng phung ƀon lan Gâp.’ Jêh ri khân păng mra lah: ‘Yêhôva jêng Brah Ndu hên.’”