Sakari 12 - Nau Brah Ndu Ngơi 2023

Nau mbơh lor ma ƀon Yêrusalem nau ndâk njêng tay

¹ Nau ngơi Brah Yêhôva mbơh lor ma phung Israel. Brah Yêhôva jêng Nơm pơk rvang lĕ ndâr trôk, ƀư mbon neh ntu, jêh ri njêng huêng tâm trôm săk bunuyh, Nơm nây lah pô aơ:

² “Aơ, Gâp mra ƀư ăn Yêrusalem jêng du mlâm kachok ndrănh ƀư vĭr măt ma lĕ rngôch phung ƀon lan gŭ jŭm păng; jêh ri lah bu nchueng jêh ƀon Yêrusalem pôri phung Yuđa bu ŭch hăn lơh đŏng.

³ Tâm nar nây, Gâp mra ƀư ăn ma ƀon Yêrusalem jêng du mlâm lŭ toyh jâk ngăn ăn ma lĕ rngôch ntil mpôl bunuyh; mbu moh chông păng mra geh nau sôt rmanh jru. Jêh ri lĕ rngôch bri dak ta klơ neh mra tâm rgum gay tâm rdâng đah păng.”

⁴ Brah Yêhôva lah: “Tâm nar nây, Gâp mra rmal, ăn lĕ rngôch seh geh nau klach, ăn ma bunuyh ncho seh geh nau brŭt ndrăng. Ƀiălah Gâp mra lin măt uănh klơ ngih Yuđa, nôk Gâp mbang lĕ rngôch seh ndơ tâm lơh bơh phung mpôl băl bunuyh, ƀư ăn khân păng chieh măt.

⁵ Rnôk nây, phung kôranh Yuđa mra lah tâm nuih n'hâm khân păng pô aơ: ‘Phung ƀon lan Yêrusalem jêng nau dăng ngăn ma gâp tâm Brah Yêhôva ma phung tahan, jêng Brah Ndu khân păng.’

⁶ Tâm nar nây, Gâp mra ƀư ma phung kôranh Yuđa tâm ban ma ŭnh năk dôl ŭnh hit ta nklang mbŭch long, nâm bu chiông ŭnh rdo hit ta nklang âk nchăp ba; khân păng mra su rai lĕ rngôch phung ƀon lan gŭ jŭm, nđâp mpeh pa ma jêh ri mpeh pa chiau. Ƀiălah phung ƀon lan Yêrusalem hôm e gŭ ta ntŭk ƀon păng nơm, nây jêng Yêrusalem.”

⁷ Brah Yêhôva mra tâm rklaih lor lơn phung vâl bok Yuđa gay ma nau chrêk ma lơp ngih Y-Đavit jêh ri nau chrêk ma lơp phung ƀon lan gŭ ta ƀon Yêrusalem mâu dơi rlau ôh nau chrêk rmah phung Yuđa.

⁸ Tâm nar nây, Brah Yêhôva mra ƀư Nơm king n'gang ma phung gŭ ta ƀon Yêrusalem. Nôk nây, phung ra ai ngăn tâm phung khân păng mra jêng nâm bu Y-Đavit; ngih Y-Đavit mra jêng nâm bu Brah Ndu, jêh ri mra jêng nâm bu tông mpăr Brah Yêhôva hăn lor panăp khân păng.

⁹ “Tâm nar nây, Gâp mra joi gay ƀư rai lĕ rngôch phung ntil mpôl bunuyh văch tât tâm rdâng đah ƀon Yêrusalem.”

Nhĭm vơl yor Nơm bu hŏ ntâp jêh

¹⁰ “Gâp mra nkhŭt huêng brah nau yô̆ jêh ri nau vơh vơl ta klơ ngih Y-Đavit jêh ri ma phung gŭ tâm ƀon Yêrusalem. Khân păng mra uănh Gâp jêng Nơm khân păng hŏ ntâp jêh, jêh ri khân păng mra nhĭm vơl ma Gâp, nâm bu nhĭm vơl ma kon bu klâu geh knŏng du huê, jêh ri khân păng klâng ma Gâp nâm bu klâng vơl ma kon bu deh ntơm bôk rah.

¹¹ Ta nar nây, nau nhĭm vơl tâm ƀon Yêrusalem mra jêng toyh, nâm bu nau nhĭm vơl Hadat-Rimôn tâm neh lâng Mêgidô.

¹² Bri dak aơ mra nhĭm vơl, ăp ntil mpôl nhĭm vơl êng êng: mpôl ngih Y-Đavit êng păng, phung ur kon khân păng êng đŏng; mpôl ngih Y-Nathan êng păng, phung ur kon khân păng êng êng đŏng;

¹³ mpôl ngih Y-Lêvi êng păng, phung ur kon khân păng êng đŏng; mpôl Y-Simei êng păng, phung ur kon khân păng êng êng đŏng;

¹⁴ lĕ rngôch phung mpôl hôm e, ăp mpôl êng êng jêh ri phung êng, jêh ri phung ur kon khân păng êng êng đŏng.”