Sakari 11 - Nau Brah Ndu Ngơi 2023

Nau phat dôih phung rmăk biăp mâu răp jăp

¹ Hơi bri Liban, ăn may pơk lĕ mpông, Ăn ŭnh sa lĕ tơm si sêdar may!

² Hơi tơm n'ho, nhĭm vơl hom yorlah tơm si sêdar lĕ cha lôt jêh, Lĕ tơm si ueh lĕ bu ƀư rai jêh. Hơi tơm si guyh bri Basan, nhĭm vơl hom, Yorlah bri krŏng mbâl lĕ bu kăl jêh!

³ Iăt hom, geh bâr phung rmăk biăp nhĭm vơl! Yorlah nau chrat ang khân păng lĕ rai jêh; Geh bâr rđuh ngrông bơh phung yau mŭr kon! Yor nau sưr Yurdan hŏ rai jêh!

⁴ Yêhôva Brah Ndu Gâp lah: “Chiăp hom phung biăp dăch bu djôt ƀư puăch.

⁵ Phung rvăt biăp gay nkhĭt lơi mâu saơ ôh khân păng nơm geh nau tih, bi ma nơm tăch lah pô aơ: ‘Tâm rnê ma Brah Yêhôva, yorlah gâp hŏ jêng ndrŏng jêh!’ Pôri phung rmăk biăp mâu geh ôh nau yô̆ nđach djê̆ lê̆ ro ma khân păng.”

⁶ Brah Yêhôva lah: “Nanê̆, Gâp mâu mbeh ôh ma phung bunuyh ƀon lan gŭ tâm n'gor bri aơ đŏng. Ƀiălah aơ, Gâp mra jao ăp nơm tâm ti phung chiau meng păng jêh ri tâm ti hađăch păng. Khân păng mra jot plên bri neh, jêh ri Gâp mâu mra tâm rklaih ôh khân păng tă bơh ti phung nây.”

⁷ Pôri, Gâp chiăp phung biăp dăch bu sreh nkhĭt, jêng phung biăp rêh ni ngăn. Gâp dŏng bar mlâm mâng jra: du mlâm mâng bu ntơ jêng Nau Yô̆, du mlâm mâng bu ntơ Nau Tâm Rnglăp gay ma chiăp phung biăp.

⁸ Knŏng tâm du khay, Gâp hŏ mprơh jêh pe nuyh rmăk biăp, yorlah Gâp mâu hôm dơi nsrôih đah khân păng đŏng ôh, jêh ri khân păng tâm rmot ma Gâp tâm ban lĕ.

⁹ Nôk nây, Gâp lah: “Gâp mâu hôm chiăp phung biăp đŏng ôh. Moh biăp khĭt, ăn păng khĭt; moh biăp roh, ăn păng roh; bi ma phung biăp hôm e tâm kăp tâm sa ndrăng khân păng.”

¹⁰ Pônây, Gâp sŏk mâng jra Gâp ntơ Nau Yô̆ jêh ri nkê̆ch lơi păng, gay chalơi nau tâm rnglăp Gâp hŏ ƀư jêh đah lĕ rngôch phung ƀon lan.

¹¹ Pôri Păng ngroh lơi nau tâm rnglăp tâm nar nây ro, jêh ri phung biăp rêh ni ngăn tâm mpôl phung biăp tĭng ndô̆ Gâp gĭt pô aơ, nây jêng nau Brah Yêhôva ngơi.

¹² Gâp lah ma khân păng: “Tơlah khân may mĭn ueh, pôri ăn hom nau nkhôm ma Gâp; lah mâu di pha lah.” Pôri khân păng veh rnoh nkhôm nây ma Gâp pe jât rlat prăk.

¹³ Brah Yêhôva lah ma Gâp: “Sŏk hom rnoh prăk khân păng mĭn ŭch ăn ma Gâp nây, klŭp ma nơm mon!” Gâp sŏk pe jât rlat prăk klŭp ma nơm mon ta trôm ngih Brah Yêhôva.

¹⁴ Jêh nây Gâp nkê̆ch lơi mâng jra tal bar, jêng mâng jra Nau Tâm Rnglăp, gay tâm nkhah lơi nau jêng oh nâu ta nklang Yuđa jêh ri Israel.

¹⁵ Brah Yêhôva lah đŏng ma Gâp: “Sŏk hom ndô ndơ du huê rmăk biăp rluk ăn ma may.

¹⁶ Yorlah aơ, Gâp mra n'hao du huê rmăk biăp tâm bri neh aơ, nơm nây mâu mra chrê ôh ma biăp păng lĕ roh, mâu lĕ ŭch tĭng joi biăp păng nhhơt, kŏ mâu ŭch mât siăm đŏng biăp păng sôt rmanh; mâu ŭch mât siăm biăp păng ăn toyh lay. Ƀiălah păng sa gŭch biăp lay, jêh ri nkhak lơi nchop păng.

¹⁷ Rêh ni ngăn ma rmăk biăp dơm dam, Jêng nơm chalơi phung biăp păng! Ăn đao sreh ta nting tur păng Jêh ri ta trôm măt pa ma păng; Ăn nting tur păng siăr kro lĕ ƀhiau, Jêh ri trôm măt pa ma păng chieh lĕ n'ho ro.”