Sakari 1 - Nau Brah Ndu Ngơi 2023

Lĕ nau tâm saơ ( 1:1 – 6:15 ) Nau đă sĭt rmal nau tih

¹ Tâm khay pham, năm tal bar rnôk rô̆ Y-Darius chiă uănh, geh nau Brah Yêhôva ngơi ma nơm mbơh lor Y-Sakari, kon bu klâu Y-Bêrêkia, sau Y-Idô, pô aơ:

² “Brah Yêhôva nuih ngăn ma phung chô yau khân may.

³ Pôri, may lah hom ma khân păng pô aơ Brah Yêhôva ma phung tahan lah: ‘Plơ̆ hom ndrel ma Gâp.’ Brah Yêhôva ma phung tahan lah: ‘Jêh nây mơ Gâp mra plơ̆ sĭt ndrel ma khân may.’ Kơt ri Brah Yêhôva ma phung tahan lah.

⁴ Lơi ta ƀư nâm bu phung chô yau khân may, phung nơm mbơh lor kăl e hŏ kuăl jêh khân păng, Brah Yêhôva ma phung tahan lah: ‘Chalơi hom trong mhĭk jêh ri nau djơh janh khân may ƀư.’ Ƀiălah khân păng mâu iăt ôh, mâu lĕ ŭch gŭ mĭn ma Gâp. Pôri Brah Yêhôva lah.

⁵ Hŏ, ta ntŭk phung chô yau khân may gŭ? Bi phung nơm mbơh lor khân păng geh nau rêh n'ho ro lĕ?

⁶ Ƀiălah, lĕ nau Gâp ngơi jêh ri nau vay Gâp ƀư hŏ ntĭm jêh ma phung oh mon Gâp jêng phung nơm mbơh lor, mâu di bơh lĕ nau nây ban jêh ma phung chô yau khân may? Yor rĭ dĭng khân păng rmal nau tih jêh ri lah: ‘Lĕ rngôch nau Brah Yêhôva ma phung tahan hŏ ton mĭn jêh ma hên tĭng trong jêh ri kan pah bơh hên ƀư, pôri Păng hŏ nkra jêh ma hên di kơt nây.’”

Nau tâm saơ ma phung ncho seh

⁷ Ta nar bar jât ma puăn, khay jât ma nguay, jêng khay Sêbat, tâm năm tal bar rnôk rô̆ Y-Darius chiă uănh, geh nau Brah Yêhôva ngơi ma nơm mbơh lor Y-Sakari, kon bu klâu Y-Bêrêkia, sau Y-Idô.

⁸ Dôl bri măng, Gâp saơ geh du huê ncho seh chăng, dâk ta nklang lĕ tơm si mirtơ ta du ntŭk tâm rlŭng. Mpeh pakơi păng geh phung seh chăng, seh guh, seh nglang.

⁹ Gâp ôp tông mpăr dôl ngơi đah gâp: “Hơi kôranh gâp, mbu moh phung ncho seh nây?” Tông mpăr nsĭt lah: “Gâp mra ăn may gĭt moh khân păng jêng.”

¹⁰ Nơm dâk tâm nklang tơm si mirtơ plơ̆ lah: “Aơ jêng phung Brah Yêhôva đă hăn chop uănh lam neh.”

¹¹ Khân păng plơ̆ lah ma tông mpăr Brah Yêhôva dôl dâk tâm nklang tơm si mirtơ pô aơ: “Hên hŏ hăn nsong uănh lam neh jêh, jêh ri saơ lĕ rngôch ntŭk gŭ đăp mpăn da dê.”

¹² Nôk nây, tông mpăr bơh Brah Yêhôva lah: “Hơi Brah Yêhôva ma phung tahan, May hŏ ji nuih đah ƀon Yêrusalem jêh ri phung ƀon tâm n'gor Yuđa tâm pơh jât năm aơ jêh. Ndah hôm jŏ nau May mâu mra yô̆ ma khân păng?”

¹³ Brah Yêhôva sŏk nau ngơi ueh, nau ngơi bonh leng lah ma tông mpăr nơm dôl ngơi đah gâp.

¹⁴ Nôk nây, tông mpăr dôl ngơi ndrel gâp, lah ma gâp: “Mbơh hom pô aơ Brah Yêhôva ma phung tahan lah: ‘Gâp dŭt n'hâm ntôn khek ngăn yor ma ƀon Yêrusalem jêh ri Siôn.

¹⁵ Ƀiălah Gâp nuih ngăn phung mpôl bunuyh dôl gŭ đăp mpăn; yorlah Gâp knŏng ji nuih djê̆ dơm ma phung ƀon lan Gâp, ƀiălah khân păng hŏ ƀư ntop đŏng nau rêh ni.’

¹⁶ Yor nây, Brah Yêhôva lah: ‘Gâp mra plơ̆ yô̆ đŏng ma ƀon Yêrusalem. Ngih brah Gâp mra ndâk tay ta ntŭk nĕ, jêh ri rse veh di rnhuan mra nthăng tâm ƀon Yêrusalem.’ Brah Yêhôva ma phung tahan lah.

¹⁷ Mbơh hom du tơ̆ tay đŏng pô aơ Brah Yêhôva ma phung tahan lah: ‘Lĕ rngôch ƀon toyh Gâp mra ăn âk bêng ma drăp ndơ, Brah Yêhôva mra bonh leng yôk Siôn jêh ri săch tay đŏng ƀon Yêrusalem.’”

Nau tâm saơ puăn mlâm nke jêh ri puăn nuyh blau chiăr.

¹⁸ Jêh ma nây, gâp n'gơr măt uănh, jêh ri saơ, geh puăn mlâm nke.

¹⁹ Gâp ôp tông mpăr dôl ngơi đah gâp: “Moh phung nke nây jêng?” Păng plơ̆ lah: “Nây jêng phung nke hŏ ƀư rai pru pra jêh phung Yuđa, phung Israel jêh ri phung Yêrusalem.”

²⁰ Jêh nây, Brah Yêhôva mpơl ma gâp saơ puăn nuyh blau chiăr.

²¹ Gâp ôp: “Phung bunuyh aơ văch tât moh nau khân păng ƀư?” Păng plơ̆ lah: “Nây jêng phung nke hŏ ƀư rai jêh phung Yuđa pru pra, kŏ tât mâu geh ôh nuyh dơi n'gơr bôk. Ƀiălah phung bunuyh chiăr aơ văch gay ƀư krit khân păng, jêh ri gay njŭr lơi nke bơh phung bri dak nây, jêng phung bri dak hŏ n'hao nke tâm rdâng đah n'gor Yuđa gay ƀư ăn păng nchuăt rai pru pra.”