Samƀŭt Pôl Njuăl Ăn Ma Phung Nsing Ta Ƀon Rôm 9 - Nau Brah Ndu Ngơi 2023

Nau tâm chuai đah phung Yuđa jêh ri phung bu năch ( 9:1 – 11:36 ) Brah Ndu jêh ri phung ƀon lan Kôranh Brah

¹ Gâp lah nau nanê̆ tâm Brah Krist, gâp mâu mƀruh ôh, nuih n'hâm sŏng gâp mbơh nau nây ma gâp tâm Brah Huêng Ueh

² pô aơ gâp rngot ngăn, nuih n'hâm gâp ji mro mrăng.

³ Yorlah gâp ŭch dơi suai rak gâp nơm jêh ri chalơi bơh Brah Krist ntrok an ma phung oh nâu jêng phung ndŭl mpôl gâp;

⁴ nâm bu ntĭt phung Israel, phung ƀon lan dơi dơn jêng kon mât rŏng, nau chrêk rmah, nau tâm rnglăp, nau vay, nau yơk mbah, jêh ri nau ton;

⁵ jêng phung ƀon lan luh tă bơh phung chô yau jêh ri ntơm bơh noi deh nây, tĭng nâm nglay săk, hŏ deh jêh Brah Krist, Nơm klơ lơn ma lĕ rngôch, jêng Brah Ndu khư dơn nau tâm rnê n'ho ro. Amen.

⁶ Ngơi tâm ban pônây mâu geh ntĭt jêng nau ngơi Brah Ndu jêng nau rai yot ôh. Yorlah mâu di lĕ rngôch luh bơh Israel jêng phung Israel.

⁷ Mâu di ôh lĕ rngôch phung jêng noi deh Y-Abraham jêng phung kon sau păng. Pô ri, tâm ban geh nchih: “Tă bơh Y-Isăk yơh, may mra geh du noi deh dơi rnha tĭng amoh may;”

⁸ nâm bu ntĭt mâu di ôh phung kon tĭng nâm nglay săk jêng phung kon Brah Ndu, ƀiălah phung kon tă bơh nau ton dơi kơp jêng noi deh ngăn.

⁹ Yorlah nau ngơi jêng nau ngơi ton: “Klăp lah yan aơ Gâp mra plơ̆ tay, jêh ri H'Sara mra geh du huê kon bu klâu.”

¹⁰ Mâu dơn nâm nĕ ôh, nôk H'Rêbêka bă kon bar tă bơh du huê nuyh jêng Y-Isăk, chô yau he;

¹¹ nđâp tơlah kon bar ê hŏ deh, ê mâp ƀư ueh mâu lah mhĭk — gay ma prăp nau ŭch Brah Ndu tâm nau săch, mâu di tĭng nau kan ôh, ƀiălah ma nau Nơm kuăl ŭch —

¹² geh nau ngơi lor ma H'Rêbêka pô aơ: “Nơm toyh mra pah kan ma nơm jê̆.”

¹³ Tâm ban hŏ geh nchih: “Gâp rŏng ma Y-Yakôp ƀiălah tâm rmot ma Y-Êsau.”

¹⁴ Pôri, moh nau he mra lah? Geh lĕ Brah Ndu mâu sŏng mâu lah mâu? Mâu mâp tâm ban pônây!

¹⁵ Yorlah Păng lah ma Y-Môis: “Gâp mra ƀư nau ueh ma mbu nơm Gâp ŭch ƀư nau ueh, Gâp mra yô̆ nđach ma mbu nơm Gâp ŭch yô̆ nđach.”

¹⁶ Pôri nau nây mâu tĭng bu ŭch mâu lah nau kon bunuyh ndil ndal, ƀiălah tă bơh nau Brah Ndu yô̆ nđach.

¹⁷ Yorlah Nau Brah Ndu Ngơi lah đŏng ma Pharaôn pô aơ: “Gâp hŏ dâk jêh may gay mpơl nau brah Gâp tâm may, gay ma amoh Gâp bu mbơh nkoch lam bri neh ntu.”

¹⁸ Nâm bu pônây, Brah Ndu ŭch yô̆ nđach ma mbu nơm Păng yô̆ nđach, Mbu nơm Păng ŭch ƀư dăng nuih n'hâm Păng mra ƀư.

Nau ji nuih jêh ri nuih n'hâm ueh Brah Ndu

¹⁹ Pôri khân may mra ôp gâp pô aơ: “Tơlah pônây mâm ƀư Brah Ndu hôm nduyh? Yorlah mbu nơm dơi tâm rdâng đah nau Păng ŭch?”

²⁰ Hơi mĭt jiăng, mbu may jêng dĭng may janh tâm rlăch đah Brah Ndu? Mâm ƀư ndô ndơ bu mon njêng lah đah nơm mon njêng păng pô aơ: “Mâm ƀư may mon gâp pô aơ?”

²¹ Di lĕ nơm mon glah geh nau dơi đah neh uk, gay tă bơh tâm du mbŭch neh păng mon njêng ntil yăng dŏng tâm nau khlay jêh ri ntil yăng ƀă dŏng tâm nau jê̆ jănh?

²² Tơlah Brah Ndu ŭch tâm mpơl nau ji nuih jêh ri mbơh nau brah Păng, Păng hŏ srôih ŭn nuih tâm lĕ yăng khư geh nau ji nuih prăp ma nau roh rai, mhâm hơh?

²³ Tơlah Păng ŭch tâm mpơl nau ndrŏng nau chrêk rmah Păng đah lĕ yăng khư yô̆ nđach, Păng hŏ ndrăp lor ma nau chrêk rmah,

²⁴ tâm nây geh he, jêng phung Păng kuăl jêh, mâu di knŏng bơh phung Yuđa dơm ôh, ƀiălah nđâp ma phung bu năch, mhâm hơh?

²⁵ Nâm bu Păng hŏ lah jêh tâm ndrom samƀŭt Y-Ôsê: “Gâp mra kuăl phung bunuyh mâu di phung ƀon lan Gâp jêng phung ƀon lan Gâp, Phung ƀon lan mâu rŏng jêng phung Gâp rŏng hâu ngăn ngên.”

²⁶ “Jêh ri tâm ntŭk Gâp lah ma khân păng: ‘Khân may mâu di phung Gâp ôh,’ Ta ntŭk nây bu mra kuăl khân păng jêng ‘Phung kon Brah Ndu gŭ rêh mro mrăng.’ ”

²⁷ Bi Y-Êsai hao ngơi ma phung Israel pô aơ: “Nđâp tơlah phung kon Israel âk tâm ban ma choih dak mƀŭt, knŏng du kô̆ hôm e klen mra dơi tâm rklaih;

²⁸ yorlah Kôranh Brah mra gơnh ro jêh ri ƀư nanê̆ nau Păng phat dôih ta neh ntu.”

²⁹ Y-Êsai hŏ mbơh lor jêh pô aơ: “Tơlah Kôranh Brah phung tahan mâu rong ma he bunuyh thoi noi deh, Pôri he hŏ jêng nâm bu ƀon Sôdôm jêh ri tâm ban ma ƀon Gômôrơ.”

Nau phung Israel mâu chroh

³⁰ Pôri mâm nau he mra lah? Phung bu năch mâu mâp joi ôh nau sŏng srăng, ƀiălah khân păng geh jêh nau sŏng srăng; nây jêng nau sŏng srăng tă bơh nau chroh;

³¹ bi phung Israel hŏ srôih nsing tĭng nau vay gay ma joi nau sŏng srăng, khân păng mâu ƀư nŭm nau vay.

³² Mâm ƀư? Yorlah khân păng mâu joi ma nau chroh ôh, ƀiălah ma nau kan. Khân păng hŏ chêh prah ta mlâm lŭ nking,

³³ tâm ban geh nchih: “Aơ, Gâp dơm ta Siôn du mlâm lŭ nking, jêng lŭ toyh ƀư ma khân păng chêh prah; Ƀiălah mbu nơm chroh ma păng mâu mra geh nau bêk prêng ôh.”