Samƀŭt Pôl Njuăl Ăn Ma Phung Nsing Ta Ƀon Rôm 8 - Nau Brah Ndu Ngơi 2023

Nau rêh mhe tâm Brah Huêng Ueh

¹ Pôri aƀaơ aơ, mbu nơm gŭ tâm Brah Yêsu Krist mâu mra hôm geh nau tâm rmal ôh;

² yorlah nau vay Brah Huêng Ueh nau rêh tâm Brah Yêsu Krist tâm rklaih jêh gâp bơh nau vay nau tih jêh ri nau khĭt.

³ Yorlah moh nau vay mâu dơi ƀư, yor nglay săk ƀư păng rdja, Brah Ndu ƀư jêh: Păng njuăl Kon Păng nơm geh nglay săk tâm ban ma nglay săk tih gay ma dăp nkra nau tih; Păng tâm rmal jêh nau tih tâm nglay săk,

⁴ gay nau vay dăn nau sŏng srăng dơi ƀư bêng tŏng tâm he, jêng phung mâu rêh tĭng nâm nglay săk, ƀiălah rêh tĭng nâm Brah Huêng Ueh.

⁵ N'hêl nanê̆ yơh, mbu nơm rêh tĭng nâm nglay săk ŭch mĭn ma lĕ nau kan ma nglay săk; ƀiălah mbu nơm rêh tĭng nâm Brah Huêng Ueh ŭch mĭn lĕ nau kan ma Brah Huêng Ueh.

⁶ Yor nau mĭn ŭch tĭng nglay săk jêng nau khĭt, ƀiălah mĭn ŭch tĭng Brah Huêng Ueh jêng nau rêh jêh ri nau đăp mpăn;

⁷ yorlah nau mĭn let ma nglay săk jêng rlăng đah Brah Ndu, yorlah păng mâu tông nau vay Brah Ndu; ngăn, păng mâu geh nau dơi ma gay tông ôh.

⁸ Mbu moh gŭ rêh tĭng nâm nglay săk mâu dơi ueh nuih n'hâm Brah Ndu ôh.

⁹ Ƀiălah tơlah Brah Huêng Ueh Brah Ndu gŭ ngăn tâm khân may, khân may mâu gŭ rêh tĭng nâm nglay săk ôh, ƀiălah gŭ rêh tĭng nâm Brah Huêng Ueh; ƀiălah mbu nơm mâu geh Brah Huêng Ueh Brah Krist, păng mâu jêng phung Brah Krist ôh.

¹⁰ Pôri, tơlah Brah Krist gŭ tâm khân may, nđâp tơlah săk jăn khân may khĭt jêh yor nau tih, huêng khân may ăt hôm rêh yor nau sŏng srăng.

¹¹ Tơlah Brah Huêng Ueh Nơm hŏ ƀư ăn ma Brah Yêsu dâk rêh tay tă bơh nau khĭt gŭ tâm khân may, Nơm hŏ ƀư ma Brah Krist dâk rêh tay tă bơh nau khĭt ăt mra yor Brah Huêng Ueh Păng gŭ tâm khân may ăn nau rêh ma săk jăn blau khĭt khân may.

¹² Hơi oh nâu, he mâu hôm iang rnon nglay săk gay gŭ rêh tĭng nâm nglay săk ôh.

¹³ Yorlah tơlah khân may gŭ rêh tĭng nâm nglay săk, khân may mra khĭt; ƀiălah tơlah ma Brah Huêng Ueh ƀư ăn khĭt kan tĭng nâm săk jăn, khân may mra rêh.

¹⁴ Yorlah lĕ rngôch phung geh Brah Huêng Ueh Brah Ndu njŭn leo, jêng kon Brah Ndu.

¹⁵ N'hêl nanê̆ ngăn, khân may mâu sŏk dơn huêng jêng dĭk gay gŭ mro tâm nau klach, ƀiălah khân may sŏk dơn jêh huêng jêng kon mât rong, jêh ri tă bơh nĕ, he kuăl pô aơ: “Aƀa! Mbơ̆!”

¹⁶ Brah Huêng Ueh nơm mbơh ma huêng nuih n'hâm he, ma he jêng phung kon Brah Ndu.

¹⁷ Tơlah he jêng phung kon ăt jêng phung ndơn drăp, ndrel jêng phung ndơn drăp Brah Ndu, ndrel jêng phung ndơn drăp ndrel ma Brah Krist; tơlah n'hêl nanê̆ ngăn he dơn nau rêh ni ndrel ma Păng, he mra geh nau chrêk rmah ndrel ma Păng.

Nau phung kon Brah Ndu kâp gân

¹⁸ Gâp mĭn ma lĕ nau rêh ni rnôk aơ mâu khư tâm rđĭl ma nau chrêk rmah tâm nar kăndơ̆ mra dơi tâm mpơl ma he.

¹⁹ Yorlah lĕ rngôch ndơ ma nuih n'hâm, nđơr ŭch gŭ kâp ma nau tâm mpơl phung Kon Brah Ndu.

²⁰ Lĕ rngôch ndơ tâm dâng nau dơm dam, mâu di ŭch mĭn êng, ƀiălah yor Nơm ŭch khân păng gŭ tâm dâng, tâm nau kâp gân pô aơ

²¹ lĕ rngôch ndơ geh jêh aơ mra geh nau rklaih bơh nau rêh ƀư dĭk ma nau rai yot, gay ndrel dơn nau kon me tâm chrêk rmah phung kon Brah Ndu.

²² Yorlah he gĭt lĕ rngôch ndơ rhăk njêng rđêng da dê jêh ri ji kruăt tât ta nar aơ;

²³ mâu di knŏng êng lĕ rngôch ndơ, ƀiălah nđâp ma he jêng phung bunuyh geh Brah Huêng Ueh jêng play bôk yan, rđêng lĕ tâm nuih n'hâm dôl gŭ kâp gân nau jêng kon mât rong, jêng nau tâm chuai ma săk jăn he.

²⁴ Tâm nau kâp gân yơh, he geh nau rklaih. Ƀiălah tơlah bu dơi saơ jêh nau khân păng kâp gân, mâu hôm jêng nau kâp gân đŏng. Yorlah mbu moh kâp gân ma nau păng nơm hŏ saơ jêh?

²⁵ Ƀiălah tơlah he n'gân nau kâp gân tâm nau he mâu dơi saơ, he ăt srôih gŭ kâp ma nau nây.

²⁶ Tâm ban lĕ, Brah Huêng Ueh kơl nau rdja he, yorlah he mâu gĭt moh nau di he dăn dôl mbơh sơm, ƀiălah Brah Huêng Ueh nơm mbơh sơm kơl an ma he ma nau rđêng mâu dơi rblang tâm nau ngơi gay kơl mbơh sơm ma phung he.

²⁷ Nơm sek uănh nuih n'hâm bunuyh, gĭt rah vah nau mĭn Brah Huêng Ueh, yorlah Brah Huêng Ueh tĭng nâm nau mĭn Brah Ndu ŭch, mbơh sơm kơl an ma phung kloh ueh.

²⁸ He gĭt lĕ rngôch nau rgum ƀư khlay ma phung rŏng ma Brah Ndu, nâm bu ntĭt ma phung bunuyh dơi kuăl tĭng nâm nau mĭn Păng ŭch.

²⁹ Yorlah phung bunuyh Păng gĭt năl jêh bơh lor, Păng tâm nal jêh ma khân păng plơ̆ jêng tâm ban ma rup Kon Păng, gay ma Kon nây jêng Kon bôk rah ma âk oh nâu.

³⁰ Bi phung Păng tâm nal jêh, Păng lĕ kuăl jêh, phung Păng kuăl jêh Păng hŏ kơp sŏng srăng jêh, jêh ri phung Păng hŏ kơp sŏng srăng jêh, Păng hŏ ăn nau chrêk rmah ma khân păng đŏng.

Nau rŏng Brah Ndu tâm Brah Yêsu Krist

³¹ Pôri, moh nau he mra lah ma lĕ nau nây? Tơlah Brah Ndu gŭ mpeh ma he, mbu mra tâm rdâng đah he?

³² Brah Ndu mâu nhhuach Kon Păng nơm, ƀiălah Păng jao jêh Kon nây ma lĕ rngôch he, mâm ƀư Păng mâu ăn lĕ ntil ndơ ndrel Kon nây ma he?

³³ Mbu nơm mra phong ma phung Brah Ndu săch, nôk Brah Ndu jêng Nơm kơp sŏng srăng ma phung bunuyh nây?

³⁴ Mbu mra jêng bunuyh tâm rmal khân păng, nôk Brah Yêsu Krist jêng Nơm hŏ khĭt jêh ri hŏ dâk rêh tay, Nơm gŭ mpeh pa ma Brah Ndu jêh ri mbơh sơm kơl an ma phung he?

³⁵ Mbu mra nkhah he bơh nau Brah Yêsu Krist rŏng? Di lĕ nau rêh ni toyh, nau rngot klâng, nau ƀư mhĭk, nau ji ngot ji hir, gŭ săk hưl, nau jêr, mâu lah tak đao ƀơh?

³⁶ Tâm ban geh nchih jêh: “Yor ma Kôranh Brah bu ŭch nkhĭt hên ăp nar; Bu uănh hên tâm ban ma biăp djôt hăn ƀư puăch.”

³⁷ Ƀiălah, tâm lĕ nau nây phung he yor Nơm rŏng ma he, he dơi mro mrăng.

³⁸ Yorlah gâp gĭt nanê̆ ngăn, nđâp tơlah nau khĭt, nau rêh, phung tông mpăr, phung kôranh chiă uănh, nau aƀaơ, nau rnôk kăndơ̆, nau dơi ktang,

³⁹ ndah jong, ndah jru, mâu lah du ntil ndơ rhăk njêng mâu dơi ôh tâm nkhah he bơh nau Brah Ndu rŏng tâm Brah Yêsu Krist, Kôranh Brah he.