Samƀŭt Pôl Njuăl Ăn Ma Phung Nsing Ta Ƀon Rôm 7 - Nau Brah Ndu Ngơi 2023

Nau rklaih jêh bơh nau vay

¹ Hơi phung oh nâu — gâp ngơi đah phung gĭt nau vay — khân may mâu gĭt hĕ nau vay knŏng chiă uănh bunuyh dôl păng hôm gŭ rêh dơm lĕ ƀơh?

² Yor nây, du huê bu ur geh sai, tơlah sai păng hôm gŭ rêh ndah jŏ, bu ur nây hôm geh nau vay tâm nchâp gŭ rêh đah sai păng dŭm nĕ; ƀiălah tơlah sai păng khĭt jêh, păng mâu hôm geh nau vay tâm nchâp đah sai păng đŏng.

³ Pôri, tơlah dôl sai păng hôm rêh, ƀiălah bu ur gŭ bu klâu êng, bu mra rnha păng jêng bu ur văng tĭr. Ƀiălah tơlah sai păng khĭt, păng geh nau rklaih tă bơh ma nau vay, tơlah păng gŭ sai êng, păng mâu jêng bu ur văng tĭr ôh.

⁴ Tâm ban lĕ, hơi phung oh nâu gâp, Tă bơh tâm săk jăn Brah Krist khân may khĭt jêh ma nau vay jêh ri nar aơ khân may jêng ndơ bu êng, jêng Nơm nây hŏ dâk rêh tay tă bơh nau khĭt, gay ma he geh play ma Brah Ndu.

⁵ Dôl he hôm gŭ rêh tâm nglay săk, lĕ nau kơnh mhĭk ma nau tih tâm nau vay, ƀư tâm lĕ kô̆ săk jăn he gay ma geh play kao ma nau khĭt.

⁶ Ƀiălah aƀaơ he klaih jêh bơh nau vay, khĭt jêh ma nau hŏ krŭng he, gay ma he pah kan tĭng nau mhe tă bơh Brah Huêng Ueh, mâu di tĭng nau ơm rplay samƀŭt ôh.

Nau tih jêh ri nau vay

⁷ Pônây mâm ƀư he mra lah? Nau vay jêng nau tih lĕ? Mâu! Mâu di tâm ban pônây ôh! Ƀiălah tơlah mâu geh nau vay gâp mâu gĭt năl nau tih. Tơlah nau vay mâu lah: “Lơi may kơnh ir” pôri gâp mâu hŏ gĭt năl moh nau kơnh ir ôh.

⁸ Ƀiălah nau tih hŏ kuăn nau mông ueh tâm nau vay ntăm, nkah tâm gâp ăp ntil nau kơnh mhĭk, yorlah mâu geh nau vay, nau tih jêng nau khĭt.

⁹ Kăl e, mâu geh nau vay gâp dơi gŭ rêh; ƀiălah dôl geh nau vay ntăm, nau tih plơ̆ rêh,

¹⁰ bi gâp khĭt; di lah nau vay ntăm djôt leo nau rêh tât ma gâp, ƀiălah păng njŭn leo jêh gâp ma nau khĭt.

¹¹ Yorlah nau tih kuăn mông găl, dŏng nau vay ntăm ndơm gâp jêh ri yor nây păng nkhĭt jêh gâp.

¹² Pôri, nau vay jêng kloh, nau vay ntăm ăt jêng kloh, sŏng srăng, jêh ri ueh.

¹³ Pôri, di lĕ nau ueh nây djôt leo ma gâp nau khĭt? Mâu di tâm ban pônây! Ƀiălah nây jêng nau tih hŏ dŏng nau ueh ƀư ma gâp khĭt, gay nau ngăn ma nau tih dơi tâm mpơl, jêh ri yor tă nau vay ntăm, nau tih plơ̆ jêng mhĭk lơ hâu lơn.

Nau tâm lơh tâm trôm nuih n'hâm

¹⁴ He gĭt nau vay jêng brah huêng; ƀiălah gâp jêng bunuyh nglay săk hŏ tăch jêh ma nau tih.

¹⁵ Gâp mâu gĭt rbăng nau gâp ƀư. Yorlah gâp mâu ƀư nau gâp ŭch, ƀiălah ƀư nau gâp rmot.

¹⁶ Ƀiălah tơlah gâp ƀư nau gâp mâu ŭch, pôri gâp uănh dơn nau vay jêng ueh.

¹⁷ Rnôk nây, mâu di gâp ƀư nau nây đŏng ôh, ƀiălah nau tih gŭ tâm gâp.

¹⁸ Yorlah gâp gĭt nau ueh mâu gŭ tâm gâp, nâm bu ntĭt tâm nglay săk gâp. Gâp ŭch ƀư nau ueh, ƀiălah gâp mâu geh nau dơi gay ma ƀư.

¹⁹ Yorlah gâp mâu ƀư nau ueh gâp ŭch, ƀiălah ƀư nau mhĭk gâp mâu ŭch.

²⁰ Tơlah gâp ƀư nau gâp mâu ŭch, mâu di gâp ôh, ƀiălah nau tih gŭ tâm gâp ƀư nau nây.

²¹ Yor ri, gâp joi saơ tâm nau vay aơ: Tơlah gâp ŭch ƀư nau ueh, nau mhĭk iang ta gâp.

²² Yorlah tâm trôm nuih n'hâm, gâp răm maak ma nau vay Brah Ndu;

²³ ƀiălah gâp gĭt tâm săk jăn gâp du nau vay êng tâm lơh đah nau vay tâm nau mĭn gâp, nchâp gâp ƀư dĭk ma nau vay nau tih, jêng nau vay gŭ tâm săk jăn gâp.

²⁴ Rêh ni ngăn ma gâp! Mbu nơm mra rklaih gâp bơh săk jăn blau khĭt aơ?

²⁵ Lah ueh ma Brah Ndu, yor ma Brah Yêsu Krist, jêng Kôranh Brah he! Tâm ban pônây, gâp yơh dŏng nau mĭn gâp nơm pah kan ma nau vay Brah Ndu, ƀiălah sŏk nglay săk gâp nơm jêng dĭk ma nau vay nau tih.