Samƀŭt Pôl Njuăl Ăn Ma Phung Nsing Ta Ƀon Rôm 6 - Nau Brah Ndu Ngơi 2023

Nau rêh rgâl ( 6:1 – 8:39 ) Khĭt đah nau tih jêh ri rêh đah Brah Krist

¹ Pôri mâm he mra lah? He ăt hôm gŭ rêh tâm nau tih gay geh nau yô̆ âk rmeh lĕ?

² Mâu di kơt nây ôh! He khĭt jêh yor nau tih, mâm he dơi gŭ rêh tâm nau tih đŏng?

³ Khân may mâu gĭt hĕ ma lĕ rngôch phung he dơn jêh nau ƀaptem tâm Yêsu Krist, tâm ban ma dơn jêh nau ƀaptem tâm nau Păng khĭt?

⁴ Pôri, ma nau ƀaptem, bu tâp jêh he tâm nau păng khĭt ndrel ma Păng, gay ma nâm bu Brah Krist hŏ dâk rêh tay jêh bơh nau khĭt ma nau chrêk rmah Mbơ̆ tâm ban lĕ, he dơi rêh đŏng tâm nau rêh mhe nâm pônây.

⁵ Yorlah tơlah he jêng nguay ndrel ma Păng tâm nau khĭt tâm ban ma nau Păng khĭt, nanê̆ ngăn he ăt mra jêng nguay ndrel ma Păng tâm nau dâk rêh tay tâm ban ma nau Păng dâk rêh tay.

⁶ He gĭt jêh ma bunuyh ơm he pâng kđĭn jêh ta si tâm rkăng ndrel ma Păng, gay ma kon bunuyh tih geh nau ƀư rai lơi, jêh ri he mâu hôm jêng dĭk ma nau tih ôh.

⁷ Yorlah mbu nơm khĭt jêh, klaih jêh bơh nau tih.

⁸ Ƀiălah tơlah he khĭt jêh ndrel ma Brah Krist, he chroh he mra dâk rêh ndrel ma Păng lĕ.

⁹ He gĭt Brah Krist hŏ dâk rêh tay bơh nau khĭt mâu mra hôm khĭt đŏng ôh; nau khĭt mâu hôm chiă uănh Păng ôh.

¹⁰ Yorlah Păng khĭt, jêng khĭt ma nau tih du tơ̆ tŏng jêh; ƀiălah Păng rêh, jêng gŭ rêh ma Brah Ndu.

¹¹ Pôri, khân ay may kơp hom khân may nơm khĭt jêh đah nau tih jêh ri dôl gŭ rêh ma Brah Ndu tâm Yêsu Krist.

¹² Pôri, lơi ăn nau tih chiă uănh tâm săk jăn blau khĭt khân may ôh, ƀư ma khân ay may tông tĭng ma nau nglay săk ŭch.

¹³ Lơi nhhơr lĕ kô̆ săk jăn khân may ƀư ndơ dŏng djơh mhĭk ma nau tih, ƀiălah nhhơr hom khân may nơm ma Brah Ndu tâm ban ma phung bunuyh hŏ dâk rêh tay jêh bơh nau khĭt, jêh ri nhhơr lĕ kô̆ săk jăn khân may nơm ƀư ndơ dŏng nau sŏng srăng ma Brah Ndu.

¹⁴ Yorlah nau tih mâu mra hôm chiă uănh khân may ôh, yorlah khân may mâu gŭ tâm dâng nau vay ôh, ƀiălah tâm dâng nau yô̆.

Ƀư dĭk ma nau sŏng srăng

¹⁵ Pôri mâm ƀư? Di lĕ yorlah he mâu gŭ tâm dâng nau vay, ƀiălah gŭ tâm dâng nau yô̆, rĭ dĭng he mra hôm ƀư tih? Mâu mâp tâm ban pô nây!

¹⁶ Khân may mâu gĭt hĕ tơlah khân may djôt leo săk jăn khân may nơm jêng dĭk gay tông bâr ma du huê bunuyh khân may hŏ jêng jêh dĭk ma bunuyh khân may tông bâr lĕ ƀơh? Mâu lah ƀư dĭk nau tih njŭn leo ma nau khĭt, mâu lah ƀư dĭk ma nau tông bâr njŭn leo ma nau sŏng srăng.

¹⁷ Ƀiălah lah ueh ma Brah Ndu, yorlah khân may hŏ tă ƀư dĭk ma nau tih, ƀiălah nar aơ tông bâr lĕ nuih n'hâm ma nau di ntĭm nti hŏ jao ăn jêh ma khân may,

¹⁸ jêh ri khân may geh nau klaih jêh bơh nau tih, plơ̆ jêng dĭk ma nau sŏng srăng.

¹⁹ Yorlah nglay săk khân may rdja, rĭ dĭng gâp ngơi tĭng nau kon bunuyh. Khân may hŏ tă nhhơr lĕ kô̆ săk jăn khân may jêng dĭk nau ƀơ̆ ƀơch jêh ri nau djơh mhĭk bun tâm ban lĕ, aƀaơ aơ, nhhơr hom lĕ kô̆ săk jăn khân may jêng dĭk ma nau sŏng srăng gay ma geh nau kloh ueh tâm ban lĕ.

²⁰ Dôl khân may jêng dĭk ma nau tih, khân may geh nau kon me ma nau sŏng srăng.

²¹ Nôk nây moh play aƀaơ aơ khân may geh nau bêk prêng? Play ƀư prêng khân ay may aƀaơ! Nau nglĕ dŭt lĕ nau nây jêng nau khĭt.

²² Ƀiălah aƀaơ khân may hŏ geh nau tâm rklaih jêh bơh nau tih jêh ri plơ̆ jêng ƀư dĭk ma Brah Ndu, khân may geh play kao jêng nau kloh ueh, jêh ri nglĕ dŭt geh nau rêh n'ho ro.

²³ Yorlah rnoh nkhôm bơh nau tih jêng nau khĭt, ƀiălah nau Brah Ndu ăn jêng nau rêh n'ho ro tâm Brah Yêsu Krist, Kôranh Brah he.