Samƀŭt Pôl Njuăl Ăn Ma Phung Nsing Ta Ƀon Rôm 5 - Nau Brah Ndu Ngơi 2023

Dơi jêng nau kơp sŏng srăng bơh nau chroh

¹ Pôri, nôk dơi kơp sŏng srăng ma nau chroh, he geh nau đăp mpăn đah Brah Ndu tâm Kôranh Brah he jêng Brah Yêsu Krist.

² Tâm Păng, yor ma chroh he dơi lăp tâm nau yô̆ aơ jêng nau yô̆ tă bơh nĕ he dâk nâp jêh ri răm maak đah nau kâp gân dơi dơn nau chrêk rmah Brah Ndu.

³ Mâu di knŏng nau nây dơm, he răm maak đŏng tâm nau hŏt rgănh, yorlah he gĭt jêh nau hŏt rgănh luh nau srôih,

⁴ nau srôih luh nau ktang, nau ktang luh nau kâp gân,

⁵ jêh ri nau kâp gân mâu ƀư ăn ma he bêk prêng ôh, yorlah nau Brah Ndu rŏng hoch jêh tâm nuih n'hâm he ma Brah Huêng Ueh jêng Nơm ăn jêh ma he.

⁶ Dôl he hôm jêng rdja Brah Krist khĭt jêh ma phung geh nau tih tĭng nâm rnôk tâm nal jêh.

⁷ Jêr ngăn geh bunuyh khĭt ntrok an ma du huê bunuyh sŏng srăng, klăp lah geh lĕ bunuyh ŭch khĭt ntrok an ma du huê bunuyh ueh.

⁸ Ƀiălah Brah Ndu tâm mpơl nau Păng rŏng ma he, dôl he hôm jêng bunuyh tih, Brah Krist khĭt ntrok an ma he.

⁹ Pôri aƀaơ he hŏ rnơm mham Păng gay dơi kơp sŏng srăng jêh, nanê̆ he mra rnơm Păng rlau lơn gay geh nau tâm rklaih bơh nau Brah Ndu nuih.

¹⁰ Yorlah tơlah dôl he jêng bunuyh tâm rdâng đah Brah Ndu, ƀiălah yor ma nau khĭt Kon Păng, he hôm dơi geh tâm rnglăp đah Brah Ndu, pôri rlau lơn ma nar aơ hŏ geh nau tâm rnglăp jêh, he lơ hô dơi tâm rklaih yor nau rêh Kon Păng.

¹¹ Mâu knŏng kơt nây dơm, he hôm răm maak tâm Brah Ndu yor Kôranh Brah he jêng Brah Yêsu Krist, yor Păng yơh aƀaơ aơ he geh nau tâm rnglăp đah Brah Ndu.

Y-Ađam jêh ri Brah Krist

¹² Yor nây, tâm ban ntơm bơh du huê bunuyh nau tih lăp jêh tâm neh ntu, jêh ri bơh nau tih geh nau khĭt, pônây yơh nau khĭt hŏ hao lip tât ma lĕ rngôch bunuyh, yorlah lĕ rngôch bunuyh ƀư tih da dê.

¹³ Yorlah nau tih hŏ geh tâm neh ntu êlor geh nau vay; ƀiălah dôl ê hŏ geh nau vay, nau tih bu mâu kơp nau tih ôh.

¹⁴ Ƀiălah, nau khĭt chiă uănh ntơm bơh Y-Ađam tât ta Y-Môis, nđâp ma phung mâu geh nau tih tâm ban ma Y-Ađam, jêng bunuyh jêng nau tâm ntĭt ma Nơm mra văch.

¹⁵ Ƀiălah nau tih mâu tâm ban ma nau ăn ma tă bơh Kôranh Brah ôh. Yorlah tơlah bơh nau tih du huê bunuyh âk bunuyh khĭt jêh, ri mơ nau yô̆ lơ hô toyh lơn, jêh ri ndơ ăn tâm nau yô̆ luh tă bơh du huê Bunuyh jêng Brah Yêsu Krist lơ hô âk rmeh ma âk bunuyh êng êng đŏng.

¹⁶ Nau ndơ ăn aơ mâu di tâm ban ma nau tât yor nau tih du huê bunuyh. Yor nau phat dôih yor du nau tih njŭn leo tât nau tâm rmal; ƀiălah nau ăn ma tă bơh Kôranh Brah jêng pakơi âk tơ̆ ƀư tih tay njŭn leo tât nau kơp sŏng srăng.

¹⁷ Tơlah yor nau tih du huê bunuyh, jêh ri bơh bunuyh nây nau khĭt chiă uănh jêh tâm ban lĕ, ăt knŏng yor du huê bunuyh jêng Brah Yêsu Krist, gay ma phung bunuyh dơn rmeh ler nau yô̆ jêh ri ndơ ăn tâm nau sŏng srăng, mra lơ hô chiă uănh tâm nau rêh tâm ban lĕ.

¹⁸ Pônây, tă bơh nau tih knŏng du huê bunuyh ƀư ma lĕ rngôch bunuyh geh nau tâm rmal, tâm ban lĕ, yor nau kan sŏng srăng tă bơh du huê bunuyh ri mơ lĕ rngôch bunuyh dơi kơp sŏng srăng jêh ri dơi dơn nau rêh.

¹⁹ Yorlah, tă bơh du huê nau mâu tông bâr ƀư ăn ma âk bunuyh plơ̆ jêng bunuyh tih, tâm ban lĕ, yor du huê Bunuyh tông bâr ƀư ăn ma âk bunuyh mra plơ̆ jêng sŏng srăng.

²⁰ Nau vay tât jêh ƀư ma nau tih jêng âk lơn; ƀiălah moh ntŭk nau tih geh âk lơn, nau yô̆ geh âk rmeh lơn.

²¹ Pônây, nau tih chiă uănh jêh ma nau khĭt, bi nau yô̆ chiă uănh ma nau sŏng srăng gay djôt leo nau rêh n'ho ro tâm Brah Yêsu Krist, Kôranh Brah he.