Samƀŭt Pôl Njuăl Ăn Ma Phung Nsing Ta Ƀon Rôm 4 - Nau Brah Ndu Ngơi 2023

Nau kơt nau chroh Y-Abraham

¹ Pôri, mâm he mra lah ma Y-Abraham, chô yau tĭng nâm nglay săk he, moh ndơ păng hŏ dơn jêh?

² Tơlah Y-Abraham dơi kơp sŏng srăng bơh nau kan, păng geh nau dơi tâm rnê ma păng nơm, ƀiălah tanăp Brah Ndu mâu di pônây ôh.

³ Yorlah moh lah tâm Nau Brah Ndu Ngơi? “Y-Abraham chroh ma Brah Ndu, jêh ri tă bơh nĕ păng dơi kơp jêng sŏng srăng jêh.”

⁴ Pôri ma mbu nơm pah kan, prăk nkhôm mâu di nau yô̆ ôh, ƀiălah kơp tâm ban ma rnon;

⁵ bi ma phung mâu ƀư pah kan, ƀiălah chroh ma Nơm kơp sŏng srăng ma bunuyh tih, nau păng chroh dơi kơp jêng sŏng srăng.

⁶ Yor ri, nôk ngơi tât nau ueh maak ma phung bunuyh Brah Ndu kơp jêng sŏng srăng mâu di bơh kan khân păng ƀư, Y-Đavit lah:

⁷ “Ueh maak ngăn ma bunuyh geh nau yô̆ an ma nau tih păng, Nau tih dơi nkŭm brôi an jêh!

⁸ Ueh maak ngăn ma bunuyh Kôranh Brah mâu kơp nau tih păng ôh!”

⁹ Pôri nau ueh maak nây knŏng prăp ma phung koh ntâu, mâu lah nđâp ma phung mâu koh ntâu? Yorlah he lah ma nau chroh, Y-Abraham dơi kơp jêng sŏng srăng jêh.

¹⁰ Ƀiălah mâm nau păng dơi kơp jêng sŏng srăng? Lor mâu lah pakơi păng koh ntâu? Mâu di jêng pakơi, ƀiălah lor păng koh ntâu.

¹¹ Păng dơn jêh nau tâm mbên ma nau koh ntâu tâm ban tâp pŏng nau sŏng srăng păng geh jêh ma nau chroh ntơm bơh păng ê hŏ koh ntâu. Tâm ban pônây păng plơ̆ jêng mbơ̆ ma lĕ rngôch phung chroh ƀiălah mâu geh koh ntâu, khân păng dơi kơp jêng sŏng srăng tâm ban lĕ,

¹² jêh ri păng jêng mbơ̆ ma phung koh ntâu, jêng phung nây mâu di knŏng koh ntâu dơm, ƀiălah hôm hăn tĭng têl nau chroh Y-Abraham, chô yau he, hŏ geh lor ma păng koh ntâu.

Nau Brah Ndu ton ƀư bơh nau chroh

¹³ Nau ton ma Y-Abraham jêh ri phung kon sau păng dơi dơn neh ntu jêng drăp ndơn, mâu di tât tă bơh nau vay ƀiălah tât tă bơh nau sŏng srăng ma nau chroh.

¹⁴ Yorlah tơlah ma nau vay dơi dơn drăp ndơn, nau chroh plơ̆ jêng mâu khlay jêh ri nau ton mâu geh khlay đŏng.

¹⁵ Yorlah nau vay djôt leo tât nau ji nuih, ƀiălah moh ntŭk mâu geh nau vay mâu đŏng geh nau rlau nau vay ôh.

¹⁶ Pônây, yor ma nau chroh rĭ dĭng nau ton bơh nau yô̆ dơi mât mray ma lĕ noi deh Y-Abraham, mâu di ôh knŏng ma noi deh tâm dâng nau dơi nau vay, ƀiălah nđâp ma lĕ noi deh geh nau chroh Y-Abraham, ăt jêng chô yau lĕ rngôch he,

¹⁷ nâm bu geh nau hŏ nchih jêh: “Gâp hŏ ndâk jêh may jêng mbơ̆ ma âk phung ndŭl mpôl.” Tanăp Brah Ndu, Nơm păng chroh jêh, jêng Nơm ăn nau rêh ma phung khĭt, jêh ri kuăl lĕ ndơ mâu geh tâm ban ma hŏ geh jêh.

¹⁸ Păng kâp gân nđâp tơlah mâu hôm geh nau gay ma kâp gân; păng ăt chroh jêh ri plơ̆ jêng mbơ̆ ma âk phung ndŭl mpôl, tĭng nâm nau ngơi jêh ma păng pô aơ: “Noi deh may mra kơt nĕ.”

¹⁹ Păng saơ săk jăn păng dăch khĭt, yorlah hŏ dăch tât du rhiăng năm, jêh ri saơ H'Sara mâu hôm dơi geh kon ôh, ƀiălah nau chroh mâu jêng rdja ôh

²⁰ Păng mâu ăn ma nuih n'hâm mâu chroh ƀư ma păng vĭ vĕ ma nau Brah Ndu ton, ƀiălah lơ ktang lơn tâm nau chroh jêh ri tâm rnê Brah Ndu,

²¹ păng chroh moh n'hêl nanê̆ Brah Ndu geh nau dơi gay ma ăn tât lĕ nau Păng ton jêh.

²² Yor nây, nau chroh păng dơi kơp jêng sŏng srăng.

²³ Ƀiălah trong: “nau chroh dơi kơp jêng sŏng srăng” mâu di knŏng dơi nchih tay ma êng du huê păng

²⁴ ƀiălah nđâp ma he đŏng. Nau chroh mra dơi kơp jêng sŏng srăng ma he, phung bunuyh chroh ma Nơm hŏ ƀư jêh Brah Yêsu, Kôranh Brah he, dâk rêh tay tă bơh nau khĭt,

²⁵ Bu jao Păng ma nau mhĭk yor nau tih he, jêh ri Păng hŏ ăn dâk rêh tay jêh gay ma he dơi kơp sŏng srăng.