Samƀŭt Pôl Njuăl Ăn Ma Phung Nsing Ta Ƀon Rôm 2 - Nau Brah Ndu Ngơi 2023

Nau Brah Ndu phat dôih

¹ Pônây, hơi bunuyh ri, nđâp tơlah mbu moh may jêng kđôi, tơlah may phat dôih bunuyh êng, may mâu dơi koh dŏng may nơm; yorlah dôl may phat dôih khân păng, may tâm rmal may nơm yơh, yorlah may phat dôih bu ƀiălah may ƀư tâm ban ma bu đŏng.

² He gĭt nau Brah Ndu phat dôih ma phung bunuyh ƀư lĕ nau tâm ban pônây jêng di ma nau nanê̆ ngăn.

³ Hơi bunuyh ri, nôk may phat dôih bunuyh êng ƀư lĕ nau pônây ƀiălah may ăt ƀư tâm ban, may mĭn may mra klaih bơh nau Brah Ndu phat dôih hĕ?

⁴ Mâu lah may uănh dơm dam lĕ ma nau âk rmeh nuih n'hâm ueh, nau srôih jêh ri nau yô̆ Păng? May mâu gĭt hĕ nuih n'hâm ueh Brah Ndu njŭn leo may tâm rmal nau tih may nơm?

⁵ Ƀiălah nuih n'hâm may dăng, mâu rmal nau tih, may prăp nkrem tâm may nơm nau ji nuih hâu ngăn tâm nar Brah Ndu ji nuih, jêng nôk Brah Ndu phat dôih sŏng mra tâm mpơl,

⁶ yorlah păng mra mplơ̆ ma ăp nơm tĭng nâm kan khân păng ƀư.

⁷ Mbu nơm nâp nuih n'hâm ƀư nau ueh, tĭng joi nau chrêk rmah, nau yơk jêh ri nau mâu blau khĭt, Păng mra ăn nau rêh n'ho ro.

⁸ Bi ma mbu nơm mbeh, mâu tông bâr nau ngăn, ƀiălah tông bâr nau kue, mra sŏk dơn nau ji nuih hâu ngăn jêh ri nau ji nuih.

⁹ Nau rêh ni jêh ri nau rngot klâng mra nkhŭt jŭr ma lĕ rngôch bunuyh ƀư mhĭk, lor lơn ma phung Yuđa, pakơi ma phung Grek.

¹⁰ Ƀiălah nau chrêk rmah, nau yơk jêh ri nau đăp mpăn mra tât ma lĕ rngôch bunuyh ƀư ueh, lor lơn ma phung Yuđa, pakơi ma phung Grek.

¹¹ Yorlah Brah Ndu mâu gŭ du ding ma bu ôh.

¹² Lĕ rngôch mbu nơm mâu geh nau vay ƀiălah ƀư tih, mra rai roh tâm păng mâu geh nau vay ôh; bi lĕ rngôch mbu nơm geh nau vay ƀiălah ƀư tih, nau vay nây mra phat dôih păng.

¹³ Yorlah mâu di bunuyh iăt rŏ nau vay dơi kơp jêng sŏng srăng tanăp Brah Ndu, ƀiălah bunuyh ƀư tĭng nau vay jêng bunuyh dơi kơp sŏng srăng.

¹⁴ Phung bu năch ơm mâu geh nau vay, ƀiălah khân păng mơng ƀư tâm ban ma nau vay ntĭm nti, nđâp tơlah mâu geh nau vay, khân păng jêng nau vay ma khân păng nơm.

¹⁵ Khân păng tâm mpơl moh kan nau vay ntăm nchih kach jêh tâm nuih n'hâm khân păng; nuih n'hâm sŏng khân păng ƀư nanê̆ nau nây, bi nau mĭn khân păng geh tơ̆ mbơh kât, geh tơ̆ koh dŏng ma khân păng.

¹⁶ Ta nar nây, Brah Ndu ăn Yêsu Krist mra phat dôih lĕ nau kan ndâp kon bunuyh bơh Brah Yêsu Krist, tĭng nâm Nau Mhe Mhan Ueh gâp nti.

Nau tâm gop ta nklang phung Yuđa jêh ri nau vay

¹⁷ Ƀiălah tơlah may geh amoh phung Yuđa; may nsing ma nau vay; may tâm rnê ma may nơm yor Brah Ndu;

¹⁸ may gĭt nau Păng ŭch jêh ri may kơp rnglah êng nau ueh nau di, yorlah nau vay sâm nti may;

¹⁹ jêh ri tơlah may kơp êng săk may nơm jêng nơm njŭn trong ma phung chieh măt, jêng nau ang ma phung gŭ tâm nau ngo klĕng,

²⁰ jêng nơm nti ma phung rluk mâl, jêng nơm nti ma phung kon se. May ntôn lah tâm mpơl nau gĭt rbăng jêh ri nau ngăn geh tâm nau vay,

²¹ pôri mâm ƀư may nti ma bu ƀiălah mâu nti ma may nơm? May nti lah lơi ntŭng, ƀiălah mâm ƀư may ntŭng?

²² May lah lơi ƀư tih nau văng tĭr, ƀiălah mâm ƀư may văng tĭr? May tâm rmot ngăn ma rup brah, ƀiălah mâm ƀư may ntŭng ndô ndơ lĕ jây rhŏ brah?

²³ May rnê êng ma nau vay, ƀiălah mâm ƀư may ƀư tih nau vay, ƀư bêk Brah Ndu?

²⁴ Tâm ban geh nau nchih: “Yor khân may yơh phung bu năch ngơi mưch rmot ma amoh Brah Ndu.”

²⁵ Tơlah may tông prăp nau vay, nau koh ntâu jêng rnoh khlay; ƀiălah tơlah may ƀư tih nau vay, nđâp tơlah may geh nau koh ntâu tâm ban ma mâu geh koh ntâu.

²⁶ Pôri, tơlah du huê mâu ŭch koh ntâu, ƀiălah tông prăp lĕ nau vay ntăm tâm nau vay, pôri nau bunuyh nây mâu ŭch koh ntâu mâu dơi kơp tâm ban ma lôch koh ntâu jêh hĕ?

²⁷ Phung bunuyh ơm mâu koh ntâu ta săk jăn, ƀiălah tông prăp nau vay, mra phat dôih may, jêng nơm geh samƀŭt nau vay jêh ri nau koh ntâu, ƀiălah ƀư tih đah nau vay.

²⁸ Yorlah du huê bunuyh knŏng padih jêng phung Yuđa, păng mâu jêng phung Yuđa ngăn ôh, bi nau koh ntâu ta săk jăn padih mâu di jêng nau koh ntâu ngăn ôh.

²⁹ Ƀiălah du huê bunuyh tâm trôm jêng phung Yuđa, rĭ mơ ngăn jêng phung Yuđa; nau koh ntâu ngăn luh tă bơh tâm nuih n'hâm, yor ma Brah Huêng Ueh, mâu di tĭng rplay samƀŭt ôh. Du huê bunuyh tâm ban pônây mra dơi nau tâm rnê, mâu di tă bơh kon bunuyh ôh, ƀiălah tă bơh Brah Ndu.