Samƀŭt Pôl Njuăl Ăn Ma Phung Nsing Ta Ƀon Rôm 15 - Nau Brah Ndu Ngơi 2023

Nau rnglăp tâm Kôranh Brah

¹ He jêng phung dăng, ăn he anh lĕ nau rêh ni phung rdja, mâu knŏng gĭt ƀư maak ma he nơm dơm ôh.

² Ăn ăp nơm tâm phung he ƀư maak ma phung chiau meng he nơm gay kơl jêh ri ndâk njêng khân păng.

³ Yorlah Brah Krist mâu mâp ƀư maak ma Păng nơm, tâm ban geh nau nchih: “Nau suai rak tă bơh phung mưch rmot ma May, tŭp jêh ta gâp.”

⁴ Lĕ nau bu nchih jêh bơh kăl e jêng gay ma ntĭm nti he, gay ma tă bơh nau nâp jêh ri n'hao nuih n'hâm Nau Brah Ndu Ngơi he geh nau kâp gân.

⁵ Mbơh sơm dăn Brah Ndu ma nau nâp jêh ri n'hao nuih kơl khân may gŭ rêh nau tâm rnglăp ăn đăp mpăn ndrăng khân may tĭng leo trong Brah Yêsu Krist,

⁶ gay ma khân may geh du nuih n'hâm, du bâr gay tâm rnê Brah Ndu, jêng Mbơ̆ Kôranh Brah he jêng Brah Yêsu Krist.

⁷ Pôri, yorlah nau chrêk rmah Brah Ndu, khân may rom dơn hom ndrăng khân may nơm, tâm ban ma Brah Krist rom dơn jêh khân may.

⁸ Gâp lah, Brah Krist jêng nau ngăn Brah Ndu, ƀiălah plơ̆ jêng oh mon ma phung bunuyh koh ntâu, gay ƀư n'hêl nanê̆ lĕ nau ton ăn jêh ma phung chô yau,

⁹ jêh ri ƀư ăn phung bu năch tâm rnê Brah Ndu yor nau Păng yô̆ nđach. Tâm ban geh nau nchih: “Yor nây, Gâp mra tâm rnê ma Kôranh Brah ta nklang lĕ rngôch ntil mpôl bunuyh Jêh ri mprơ mât ton ma amoh Păng”

¹⁰ jêh ri geh nau nchih: “Hơi phung bu năch, maak hom ndrel ma phung ƀon lan Kôranh Brah”

¹¹ jêh ri lah: “Hơi lĕ rngôch phung bu năch, tâm rnê hom ma Kôranh Brah Jêh ri lĕ rngôch ntil mpôl bunuyh tâm rnê hom ma Păng!”

¹² Y-Êsai lah đŏng: “Ntơm bơh Y-Yêsê mra luh du mlâm reh, Jêng Nơm chiă uănh phung bu năch; Phung bu năch mra kâp gân tâm Păng.”

¹³ Mbơh sơm dăn ma Brah Ndu jêng tu kâp gân ƀư ma khân may bêng ler nau răm maak jêh ri nau đăp mpăn tâm nau chroh, gay ma nau brah Brah Huêng Ueh, khân may geh nau rmeh ler tâm nau kâp gân.

Nau rdŭt ( 15:14 – 16:27 ) Nau pah kan Y-Pôl

¹⁴ Hơi phung oh nâu, gâp mĭn khân may geh jêh nuih n'hâm bêng nau rŏng bu, bêng nau gĭt rbăng, jêh ri geh nau blau nti nkah ndrăng khân may nơm.

¹⁵ Ƀiălah, tâm samƀŭt nchih njuăl ma khân may geh ƀaƀă nau gâp lah ktang, ŭch nkah gĭt ma khân may, yor Brah Ndu ăn jêh nau yô̆ ma gâp

¹⁶ gay ma jêng oh mon Brah Yêsu Krist ta nklang phung bu năch, ƀư nau kan ndơ ƀư brah ma Nau Mhe Mhan Ueh Brah Ndu, gay ma phung bu năch plơ̆ jêng ndơ nhhơr ueh nuih n'hâm Kôranh Brah, dơi ƀư kloh ueh tă bơh Brah Huêng Ueh.

¹⁷ Pônây, tâm Brah Yêsu Krist gâp geh nau gay hâk răm nau gâp pah ma kan Brah Ndu.

¹⁸ Yorlah gâp mâu nănh ngơi du ntil nau êng, ƀiălah knŏng ngơi lĕ nau Brah Krist hŏ ƀư tâm gâp, gay ƀư ma phung bu năch tông bâr Păng. Ma nau ngơi jêh ri ma nau kan,

¹⁹ ma nau brah khlay ngăn jêh ri nau mbên khlay, ma nau dơi Brah Huêng Ueh Brah Ndu, gâp hŏ mbơh âk bunuyh gĭt Nau Mhe Mhan Ueh Brah Yêsu Krist lam ntŭk, tă bơh ƀon Yêrusalem jêh ri n'gor văr jŭm ma tât ta n'gor Iliri.

²⁰ Ƀiălah nau gâp ŭch jêng mbơh nkoch Nau Mhe Mhan Ueh ma lĕ ntŭk bu ê hŏ mbơh nkoch ôh amoh Brah Krist, gay ma mâu ndâk ôh ta mbon bunuyh êng,

²¹ tĭng nâm geh nau nchih: “Ma phung bunuyh bu ê hŏ mbơh ma Păng, khân păng mra saơ Păng, Ma phung bunuyh ê hŏ tăng ma Păng, khân păng mra gĭt rbăng Păng.”

Y-pôl mĭn chop khâl ta Rôm

²² Nây jêng mâm nau hŏ geh âk tơ̆ jêh nchăng king gâp hăn khâl khân may.

²³ Ƀiălah aƀaơ tâm lĕ ntŭk aơ mâu hôm geh ôh ma gâp; rlau lơn ma nĕ, jŏ năm jêh, gâp ŭch ngăn hăn khâl khân may.

²⁴ Gâp kâp gân mra hăn khâl khân may ta trong hăn tât ta n'gor Êspanh; jêh ri pakơi gâp geh nau maak yor gâp gŭ ndrel khân may djê̆ nar, gâp ŭch khân may kơl njŭn leo gâp tât ta n'gor nây.

²⁵ Ƀiălah aƀaơ, gâp hăn ta ƀon Yêrusalem gay ma pah kan phung kloh ueh;

²⁶ yorlah phung Masêđôn jêh ri phung Akai riu prăk maak ma lĕ nuih n'hâm gay kơl ma phung o ach hâu ngăn tâm phung kloh ueh gŭ ta ƀon Yêrusalem.

²⁷ Khân păng maak nuih n'hâm ƀư nau nây, ƀiălah nau di khân păng iang rnon phung nây lĕ; yorlah tơlah phung bu năch sŏk dơn jêh drăp ndơ ma nau rêh huêng, ri mơ ăn khân păng djôt leo drăp ndơ kơl an ma bu đŏng.

²⁸ Pôri, jêh lôch kan aơ, nây jêng nôk hŏ tâm pă jêh ndơ ma khân păng, gâp mra hăn trong, veh khâl khân may, jêh nây gâp hăn ta n'gor Êspanh.

²⁹ Gâp gĭt tơlah gâp hăn khâl khân may, gâp mra văch hăn ndrel ma nau ueh uĭn âk ngăn bơh Brah Krist.

³⁰ Hơi phung oh nâu, yor ma Kôranh Brah he jêng Brah Yêsu Krist jêh ri ma nau rŏng bơh Brah Huêng Ueh, gâp vơh vơl ma khân may ndrel ma gâp tâm lơh tâm nau mbơh sơm ma Brah Ndu yor gâp,

³¹ gay ma gâp dơi klaih bơh phung mâu chroh tâm n'gor Yuđa, jêh ri nau gâp pah kan dôl gâp hăn tât ta ƀon Yêrusalem mra dơi phung kloh ueh dơn.

³² Kơt nĕ, tơlah ueh nau mĭn Brah Ndu ŭch, gâp dơi răm maak văch ta khân may jêh ri ndrel gŭ rlu tâm nklang phung khân may.

³³ Mbơh sơm dăn ma Brah Ndu nau đăp mpăn gŭ ndrel lĕ rngôch khân may! Amen.