Samƀŭt Pôl Njuăl Ăn Ma Phung Nsing Ta Ƀon Rôm 14 - Nau Brah Ndu Ngơi 2023

Nau yô̆ ma phung oh nâu

¹ Rom hom nơm rdja tâm nau chroh, lơi tâm rlăch đah khân păng ma nau mĭn êng êng.

² Bunuyh aơ mĭn dơi sa lĕ rngôch ndơ; bi bunuyh rdja sa knŏng trau dơm.

³ Bunuyh sa lơi mưch rmot ôh ma nơm mâu geh sa, jêh ri bunuyh mâu geh sa, lơi nduyh ôh ma nơm sa; yorlah Brah Ndu rom păng jêh.

⁴ Mbu moh may phat dôih oh mon bu? Păng gŭ dâk mâu lah chôt, nây jêng nau kan kôranh păng. Ƀiălah păng mra gŭ dâk, yorlah Kôranh Brah geh nau dơi ăn păng gŭ dâk.

⁵ Bunuyh aơ mĭn nar aơ ueh lơn ma nar êng, bi bunuyh êng mĭn lĕ rngôch nar tâm ban da dê; ăp nơm gĭt n'hêl nanê̆ tâm nau păng mĭn.

⁶ Bunuyh prăp nar jêng prăp yor Kôranh Brah; bunuyh sa, sa đŏng yor Kôranh Brah, yorlah khân păng lah ueh ma Brah Ndu; bunuyh mâu sa đŏng mâu sa yor Kôranh Brah lĕ, jêh ri khân păng lah ueh đŏng ma Brah Ndu.

⁷ Mâu geh du huê tâm phung he gŭ rêh yor păng nơm, mâu đŏng geh du huê tâm phung he khĭt yor păng nơm;

⁸ yorlah tơlah he gŭ rêh, jêng rêh ma Kôranh Brah, jêh ri tơlah he khĭt, jêng khĭt ma Kôranh Brah. Yor nây nđâp tơlah gŭ rêh mâu lah khĭt, he ăt jêng phung Kôranh Brah da dê.

⁹ Yor ri yơh Brah Krist khĭt jêh ri dâk rêh tay gay ma dơi jêng Kôranh Brah ma phung khĭt nđâp ma phung rêh.

¹⁰ Ƀiălah may, mâm ƀư may phat dôih oh nâu may? Mâu lah mâm ƀư may rmot ma oh nâu may? Yorlah lĕ rngôch he mra gŭ tanăp ta ntŭk ngih phat dôih Brah Ndu.

¹¹ Yorlah nau nchih: “Kôranh Brah lah: Nanê̆ ngăn Gâp gŭ rêh mro mrăng, lĕ rngôch kômâk mra chon mon tanăp Gâp, Jêh ri lĕ rngôch mpiăt mra tâm rnê ma Brah Ndu.”

¹² Tâm ban pônây, ăp nơm phung he mra mbơh kan he nơm đah Brah Ndu.

Mâu ƀư chêh prah ndrăng nơm

¹³ Pôri he lơi phat dôih ndrăng he nơm đŏng ôh, ƀiălah ueh lơn mâu dơm lŭ ƀư chêh jâng mâu lah lơi ƀư king ma phung oh nâu he nơm.

¹⁴ Tâm Brah Yêsu, gâp gĭt jêh ri chroh n'hêl mâu geh moh ndơ êng păng nơm jêng ƀơ̆ ƀơch ôh; ƀiălah păng jêng ƀơ̆ ƀơch ma mbu nơm uănh păng jêng ƀơ̆ ƀơch.

¹⁵ Tơlah yorlah ndơ may sông sa ƀư rngot rvê ma phung oh nâu may, may mâu gŭ ngao di tĭng nâm nau rŏng ôh. Lơi yor ndơ may sông sa ƀư roh du huê ôh Brah Krist khĭt jêh yor păng.

¹⁶ Pônây lơi ăn nau ueh khân may bu gơm mưch ma khân may.

¹⁷ Yorlah ƀon bri hađăch Brah Ndu mâu di jêng nau sông sa nhêt ôh, ƀiălah jêng nau sŏng srăng, nau đăp mpăn, nau răm maak tâm Brah Huêng Ueh.

¹⁸ Mbu nơm pah kan ma Brah Krist tâm ban pônây ƀư maak nuih n'hâm Brah Ndu jêh ri bu yơk ma bunuyh nây.

¹⁹ Pônây yơh, ăn he tĭng joi lĕ nau djôt leo tât nau đăp mpăn jêh ri ndâk njêng ndrăng phung he.

²⁰ Lơi yor ndơ sông sa ƀư rai ôh kan Brah Ndu. Di yơh lĕ rngôch ndơ kloh da dê, ƀiălah mbu nơm yor du ntil ndơ sông sa ƀư ma bunuyh êng chêh prah jêng tih ngăn.

²¹ Ueh lơn jêng lơi sa puăch, mâu nhêt ndrănh mâu lah ƀư moh nau ƀư chêh prah ma oh nâu he nơm.

²² Mâm nau chroh may geh, ăn djôt prăp hom ma may nơm nâm nây tanăp Brah Ndu. Ueh maak yơh ma mbu nơm mâu phat dôih păng nơm ma lĕ nau păng dơn!

²³ Ƀiălah mbu nơm hôm đing, ƀiălah ăt sa, păng geh nau tâm rmal jêh, yorlah păng mâu ƀư tĭng nâm nau chroh. Lĕ rngôch nau kan mâu luh bơh nau chroh jêng nau tih.