Samƀŭt Pôl Njuăl Ăn Ma Phung Nsing Ta Ƀon Rôm 11 - Nau Brah Ndu Ngơi 2023

Nuih n'hâm ueh Brah Ndu đah phung Israel

¹ Pônây gâp dăn ôp, Brah Ndu mâp lơi lĕ phung ƀon lan Păng? Mâu, mâu mâp ôh! Yorlah gâp nơm jêng bunuyh Israel, bơh noi deh Y-Abraham, bơh ndŭl mpôl Benjamin.

² Brah Ndu mâu mâp lơi ôh phung păng gĭt năl jêh bơh lor. Khân may mâu gĭt hĕ ma Nau Brah Ndu Ngơi nchih ma nau Y-Êli phong ma phung Israel tanăp Brah Ndu?

³ “Ơ Kôranh Brah, khân păng nkhĭt jêh phung nơm mbơh lor May, ƀư rai nơng ƀư brah May; hôm knŏng êng du huê gâp, jêh ri khân păng joi ŭch nkhĭt gâp.”

⁴ Ƀiălah moh nau Brah Ndu plơ̆ lah ma păng? “Gâp njrăng prăp jêh ma Gâp nơm pơh rbăn nuyh ê mâp chon kômâk tanăp brah Baal.”

⁵ Nar aơ tâm ban lĕ, geh du kô̆ hôm e klen dơi săch yor ma nau yô̆.

⁶ Ƀiălah tơlah ma nau yô̆ mâu hôm ŭch nau kan đŏng ôh; tơlah mâu, nau yô̆ mâu hôm jêng nau yô̆ ôh.

⁷ Mâm ƀư pônây? Phung Israel mâu dơi geh nau khân păng joi. Phung bunuyh dơi săch geh jêh nau nây, ƀiălah phung hôm plơ̆ jêng dăng nuih n'hâm,

⁸ nâm bu nau bu nchih jêh pô aơ: “Brah Ndu ăn jêh ma khân păng huêng nuih n'hâm rluk mâl, Măt chieh, jêh ri tôr tê̆k, tât ta nar aơ.”

⁹ Y-Đavit lah: “Ŭch ma sưng sông sa khân păng plơ̆ jêng dăk sân jêh ri nhuăl drăng, Lŭ chêh jâng jêh ri nau plơng bôk ma khân păng;

¹⁰ Ŭch ngăn măt khân păng chieh gay mâu dơi saơ ôh, Jêh ri ndŭr kơi khân păng kuăt krô mro.”

Tâm rklaih văch ma phung bu năch

¹¹ Pôri gâp dăn ôp, di lĕ phung Israel chêh prah kŏ tât prah? Mâu mâp! Mâu di pônây ôh! Ƀiălah yor nau tih khân păng, nau tâm rklaih văch tât jêh ma phung bu năch gay ƀư ma khân păng tâm rlong.

¹² Tơlah nau ƀư tih khân păng ƀư ndrŏng jêh ma neh ntu, jêh ri tơlah nau rai yot khân păng hŏ ƀư ndrŏng ma phung bu năch, nau bêng ler khân păng mra lơ hô ƀư ndrŏng rlau lơn âk ngăn!

¹³ Gâp lah ma khân may jêng phung bu năch: ndah jŏ gâp hôm jêng du huê kôranh oh mon ma phung bu năch, gâp mra ƀư chrat ang ma nau pah kan gâp nơm

¹⁴ gay tâm nsônh nuih n'hâm tâm rlong ma phung ndŭl mpôl gâp, jêh ri ma nau tâm rklaih ƀaƀă tâm phung khân păng.

¹⁵ Yorlah tơlah nau mƀăr lơi ma khân păng hŏ njŭn leo nau tâm rnglăp ma neh ntu, pôri moh nau khân păng sŏk dơn mâu di hĕ jêng nau rêh tât tă bơh nau khĭt?

¹⁶ Tơlah kô̆ rnih lor lơn nhhơr jêng kloh ueh, lĕ rngôch mbŭch rnih jêng kloh ueh tâm ban lĕ; tơlah reh jêng kloh ueh, đơ n'gĭng păng kloh ueh tâm ban lĕ.

¹⁷ Ƀiălah tơlah geh n'gĭng ƀaƀă bu koh lơi, jêh ri may ơm jêng du tơm ôlive bri tâm ndop lĭr ta ntŭk lĕ n'gĭng nây gay ma dơi tâm pă dak rêh bơh reh tơm ôlive

¹⁸ pôri lơi n'hao êng đah lĕ n'gĭng nây. Tơlah may n'hao êng may nơm, ăn may gĭt, mâu di may ôh nsrôih dơn reh, ƀiălah reh nsrôih dơn ma may.

¹⁹ May mra lah: “Đơ lĕ n'gĭng bu koh lơi jêh, gay ma bu dơi ndop gâp.”

²⁰ Di ngăn. Bu koh lơi jêh lĕ n'gĭng nây, yorlah nuih n'hâm khân păng mâu chroh, bi may knŏng dâk nâp yor nau chroh. Lơi sưr rlau, ƀiălah klach hom.

²¹ Yorlah tơlah Brah Ndu mâu nhhuach ma đơ n'gĭng păng nơm, Păng mâu đŏng nhhuach ma may ôh.

²² Ăn may uănh hom nau ueh jêh ri nau dăng ngăn Brah Ndu: Nau dăng ngăn ma mbu nơm tŭp jêh, ƀiălah nau ueh ma may, knŏng tơlah may gŭ nâp mro tâm nau ueh Păng; tơlah mâu, Păng ăt mra koh chalơi may đŏng.

²³ Bi ma phung Yuđa, tơlah khân păng lơi nau mâu chroh, Brah Ndu mra ndop khân păng, yorlah Păng geh nau dơi ndop tay khân păng.

²⁴ Yorlah tơlah êng may, may ơm jêng tơm ôlive bri, Păng koh jêh ri ndop tâm tơm ôlive ueh, êng đah nau mơng, rlau lơn ma khân păng ơm jêng phung n'gĭng mơng khư dơi ndop lăp tơm ôlive khân păng nơm rlau lơn.

Phung Israel dơn nau tâm rklaih

²⁵ Hơi oh nâu, gâp ŭch ma khân may gĭt rbăng ma nau khlay ndâp aơ, gay ma khân may mâu kơp êng săk khân may nơm jêng blau mĭn, nây jêng: Du kô̆ tâm phung Israel dăng nuih n'hâm gay tât ta rnoh phung bu năch dơi lăp rĭng jêh.

²⁶ Pôri lĕ rngôch phung Israel mra dơi rklaih, nâm bu geh nau nchih jêh: “Nơm Rklaih mra văch tă bơh Siôn, Sŏk lơi nau mâu chroh bơh ngih Y-Yakôp”;

²⁷ “Jêh ri aơ jêng nau tâm rnglăp Gâp ƀư đah khân păng, Tơlah Gâp jut lơi nau tih khân păng.”

²⁸ Ma Nau Mhe Mhan Ueh, khân păng jêng phung rlăng Brah Ndu, nau nây geh ndơ khlay ma khân may; ƀiălah tĭng nau săch, khân păng geh nau rŏng yor phung chô yau khân păng;

²⁹ yorlah Brah Ndu mâu rgâl ôh nau Păng ăn jêh ri ma nau Păng kuăl.

³⁰ Nâm khân may kăl e mâu tông bâr ma Brah Ndu, ƀiălah aƀaơ khân may geh nau yô̆ nđach yorlah nau khân păng mâu tông bâr,

³¹ tâm ban lĕ, aƀaơ aơ khân păng mâu tông bâr, gay ma yor nau yô̆ nđach tâm mpơl jêh ma khân may, khân păng dơi geh nau yô̆ nđach.

³² Yorlah Brah Ndu krŭng jêh lĕ rngôch bunuyh tâm ntŭk mâu tông bâr gay yô̆ nđach ma lĕ rngôch.

³³ Ơ! Nau ndrŏng, blau mĭn jêh ri nau gĭt rbăng Brah Ndu khlay ndâp âk ngăn! Nau Păng phat dôih, mbu nơm mâu dơi gĭt, trong Păng mbu nơm mâu dơi gĭt rbăng!

³⁴ “Yorlah mbu nơm gĭt nau mĭn Kôranh Brah, Mbu nơm jêng nơm kơl nchră ma Păng?”

³⁵ Mâu lah “mbu nơm hŏ ăn lor ma Kôranh Brah, Gay Păng mplơ̆ sĭt tay?”

³⁶ Yorlah lĕ rngôch ndơ tă bơh Păng, yor ma Păng, jêh ri rle mpeh Păng. Nau chrêk rmah jêng nau Păng n'ho ro mâu blau dŭt! Amen.