Samƀŭt Pôl Njuăl Ăn Ma Phung Nsing Ta Ƀon Rôm 10 - Nau Brah Ndu Ngơi 2023

Nau tâm chuai ma lĕ rngôch bunuyh

¹ Hơi phung oh nâu, nau ŭch tâm nuih n'hâm gâp jêh ri nau gâp mbơh sơm đah Brah Ndu jêng gay ma phung Israel geh nau tâm rklaih.

² Gâp mbơh nkoch ma khân păng geh nau duh nđơr ma Brah Ndu, ƀiălah nau duh nđơr nây pưt nau gĭt rbăng.

³ Dôl khân păng mâu gĭt năl nau sŏng srăng Brah Ndu jêh ri joi nau njêng nau sŏng srăng êng khân păng nơm, pôri khân păng mâu tông ma nau sŏng srăng Brah Ndu ôh;

⁴ yorlah Brah Krist jêng nglĕ ma nau vay, gay lĕ rngôch bunuyh chroh dơi kơp sŏng srăng.

⁵ Y-Môis nchih jêh nau sŏng srăng tât tă bơh nau vay pô aơ mbu nơm ƀư tĭng lĕ nau nây mra geh nau rêh tă bơh nĕ.

⁶ Ƀiălah nau sŏng srăng luh tă bơh nau chroh lah pô aơ: “Lơi lah ôh tâm nuih n'hâm pô aơ: ‘Mbu mra hao klơ trôk?’ đah nau mĭn jêng gay djôt leo Brah Krist jŭr;

⁷ mâu lah: ‘Mbu mra jŭr tâm brŏng jru?’ đah nau mĭn gay djôt leo Brah Krist hao tă bơh nau khĭt.”

⁸ Ƀiălah moh nau nây lah? “Nau chroh gŭ dăch ngăn ma khân may, Tâm trôm mbung jêh ri tâm nuih n'hâm khân may,” Nây jêng nau chroh yơh hên nti lah.

⁹ Pôri tơlah bâr mbung may mbơh Brah Yêsu jêng Kôranh Brah, jêh ri tâm nuih n'hâm may chroh ma Brah Ndu ƀư ăn Păng dâk rêh tay tă bơh nau khĭt, may mra rklaih yơh.

¹⁰ Yorlah mbu nơm chroh tâm nuih n'hâm dơi kơp sŏng srăng, mbu nơm mbơh ma bâr mbung geh nau rklaih.

¹¹ Nau Brah Ndu Ngơi lah: “Mbu nơm chroh ma Păng mâu mra bêk prêng ôh.”

¹² Mâu geh kơp rnglah êng ta nklang phung Yuđa jêh ri phung Grek, yorlah nsum ndrel nguay Kôranh Brah jêng Kôranh Brah ma lĕ rngôch bunuyh, Nơm ăn nau yô̆ âk rmeh ma lĕ rngôch bunuyh kuăl Păng.

¹³ Yorlah: “mbu nơm kuăl dăn amoh Kôranh Brah mra dơi rklaih.”

¹⁴ Ƀiălah khân păng ê chroh, mâm ƀư khân păng kuăl dăn? Khân păng ê mâp iăt nau bu nkoch ma Păng, mâm ƀư khân păng dơi chroh? Mâu geh bunuyh mbơh nkoch, mâm khân păng dơi iăt?

¹⁵ Tơlah mâu geh bunuyh bu njuăl nsong, mâm ƀư geh bunuyh hăn mbơh nkoch? Tĭng nâm nau nchih jêh: “Ueh lăng âk ngăn mpang jâng phung hăn mbơh nkoch Nau Mhe Mhan Ueh!”

¹⁶ Ƀiălah mâu di lĕ rngôch bunuyh tông tĭng Nau Mhe Mhan Ueh ôh; Y-Êsai hŏ lah: “Ơ Kôranh Brah, mbu nơm chroh nau hên mbơh nkoch?”

¹⁷ Pôri, nau chroh luh bơh lĕ nau bu iăt, jêh ri bu tăng jêng nôk bu mbơh nkoch ma nau Brah Krist ngơi.

¹⁸ Ƀiălah gâp ôp: Bu mâu hŏ mâp tăng hĕ? Ngăn khân păng lĕ tăng jêh, yorlah: “Bâr phung mbơh hŏ huy lam neh ntu, Jêh ri nau khân păng hŏ mbơh jêh tât ta dŭt bri dŭt neh.”

¹⁹ Gâp ôp tay: Di lĕ phung Israel ê mâp gĭt nau aơ? Lor lơn, Y-Môis lah jêh: “Gâp mra ƀư ma khân may keh nach ma lĕ phung ƀon lan mâu di jêng phung ƀon lan. Gâp mra ƀư ma khân may ji nuih ma du phung ƀon lan rluk.”

²⁰ Y-Êsai lah ma nau janh ktang pô aơ: “Phung bunuyh mâu joi Gâp, hŏ mâp jêh đah Gâp; Gâp mpơl jêh Gâp nơm ma phung bunuyh mâu kuăl ôp ôh ma Gâp.”

²¹ Ƀiălah ma phung Israel, Păng lah: “Lĕ nar Gâp yơr ti mpeh du phung ƀon lan mâu tông jêh ri dăng bôk.”