Samƀŭt Pôl Njuăl Ăn Ma Phung Nsing Ta Ƀon Rôm 1 - Nau Brah Ndu Ngơi 2023

Nau tâm chuai bơh nau chroh ( 1:1-17 ) Nau mbah jô̆ khâl

¹ Y-Pôl, oh mon Brah Yêsu Krist, Brah Ndu kuăl jêh ăn jêng kôranh oh mon jêh ri prăp êng ma Nau Mhe Mhan Ueh Brah Ndu,

² jêng Nau Mhe Mhan Ueh Brah Ndu ton jêh bơh lor rgăn phung mbơh lor Păng tâm Nau Brah Ndu Ngơi.

³ Nây jêng Nau Mhe Mhan Ueh ma Kon Păng, jêng Nơm tâm nau nglay săk bu deh tă bơh ndŭl mpôl Y-Đavit;

⁴ tâm nau brah huêng kloh ueh, yorlah Păng dâk rêh tay jêh tă bơh nau khĭt, dơi mbơh nkoch jêng Kon Brah Ndu nau brah, jêng Brah Yêsu Krist Kôranh Brah he.

⁵ Yor ma Păng, hên hŏ dơn jêh nau yô̆ jêh ri nau pah kan kôranh oh mon, gay ma yor amoh Păng njŭn leo lĕ rngôch phung mpôl băl tông ma nau chroh.

⁶ Phung oh nâu gŭ đŏng tâm phung bunuyh dơi kuăl jêng phung Brah Yêsu Krist.

⁷ Gâp dăn njuăl ma lĕ rngôch phung Brah Ndu rŏng tâm ƀon Rôm, phung Brah Ndu kuăl jêh ăn jêng phung kloh ueh. Dăn Brah Ndu, Mbơ̆ he, jêh ri Kôranh Brah jêng Kôranh Yêsu Krist ăn ma nau yô̆ jêh ri nau đăp mpăn ma khân ay may.

Nau mbơh sơm jêh ri tâm rnê lah ueh

⁸ Lor lơn, tâm Brah Yêsu Krist, gâp lah ueh ma Brah Ndu gâp yor ma lĕ rngôch khân ay may, ma nau chroh khân ay may lư n'găr lam neh ntu.

⁹ Brah Ndu, Nơm gâp pah kan ma lĕ nuih n'hâm tâm nau mbơh nkoch Nau Mhe Mhan Ueh Kon Păng, jêng mbơh nkoch ma gâp kah gĭt ma khân may ƀaƀơ ăp tơ̆ gâp mbơh sơm

¹⁰ ăp tơ̆ mbơh sơm. Gâp vơl dăn ma Brah Ndu, tĭng nâm nau Păng ŭch mĭn, ăn gâp geh nar hăn tât ma khân may.

¹¹ Yor gâp ŭch ngăn hăn chop khâl khân may, gay tâm pă nau ăn brah huêng ma khân ay may, tă bơh nĕ ri mơ khân ay may dơi nâp ktang;

¹² nâm bu ntĭt gay ma he mra tâm n'hao nuih n'hâm ndrăng nơm ma nau he chroh, jêng nau chroh khân may jêh ri nau chroh gâp.

¹³ Hơi phung oh nâu, gâp ŭch ma khân may gĭt âk tơ̆ jêh gâp tâm nal hăn khâl khân may gay ma rek peh play kao âk ƀhôi tâm phung khân may, tâm ban đŏng ma phung mpôl băl bunuyh êng; ƀiălah gâp geh nau buay tât nar aơ.

¹⁴ Gâp iang rnon lĕ phung Grek nđâp ma phung bri, lĕ phung gĭt blau nđâp ma phung rluk mâl.

¹⁵ Yor ri, ma lĕ nuih n'hâm gâp ŭch mbơh nkoch Nau Mhe Mhan Ueh ma khân may, phung gŭ ta ƀon Rôm đŏng.

Nau brah tâm Nau Mhe Mhan Ueh

¹⁶ Nanê̆, gâp mâu bêk prêng ôh ma Nau Mhe Mhan Ueh, yorlah aơ jêng nau brah Brah Ndu gay ma rklaih lĕ rngôch bunuyh chroh, lor lơn jêng phung Yuđa, pakơi jêng phung Grek.

¹⁷ Yorlah tâm Nau Mhe Mhan Ueh aơ, tâm mpơl jêh nau sŏng srăng Brah Ndu geh bơh nau chroh njŭn leo nau chroh, tâm ban geh nau nchih: “Bunuyh sŏng srăng mra rêh yor nau chroh.”

Nau tih kon bunuyh jêh ri nau Brah Ndu phat dôih ( 1:18 – 3:20 ) Nau tih kon bunuyh

¹⁸ Nau Brah Ndu ji nuih mpơl jêh tă bơh klơ trôk gay ma tâm rdâng đah lĕ ntil mâu ƀư tĭng nau vay jêh ri ma phung djơh mhĭk dŏng nau djơh mhĭk tŭn jot nau ngăn.

¹⁹ Yorlah moh nau bu dơi gĭt năl Brah Ndu jêng rah vah, yorlah Brah Ndu hŏ mpơl jêh ma khân păng.

²⁰ Lĕ nau Brah Ndu măt kon bunuyh mâu dơi saơ, nâm bu ntĭt nau brah n'ho ro jêh ri nau brah Păng nơm, ntơm bơh rhăk njêng neh ntu, bu hŏ dơn gĭt jêh rah vah tơlah ntreng uănh lĕ ndơ Păng njêng; yor nây khân păng mâu dơi koh dŏng khân păng nơm ôh.

²¹ Yorlah nđâp tơlah hŏ gĭt năl jêh Brah Ndu, khân păng mâu ŭch tâm n'hao prêh ma Păng jêng Brah Ndu ôh jêh ri mâu lah ueh Păng, ƀiălah khân păng ăt mĭn mâu geh kô̆; nuih n'hâm rluk mâl khân păng plơ̆ jêng nau ngo klĕng.

²² Khân păng êng mbơh khân păng nơm jêng blau mĭn, ƀiălah plơ̆ jêng brŭt rluk.

²³ Khân păng tâm rgâl nau chrêk rmah Brah Ndu mâu blau khĭt gay ma sŏk rup kon bunuyh blau ôm rai, mâu lah rup sĭm, mpô mpa, mâu lah ntil mpa vơr.

²⁴ Yor ri, Brah Ndu hŏ jao ma khân păng ma lĕ nau kơnh tĭng nâm nuih n'hâm khân păng ŭch, tŭp tâm nau ƀơ̆ ƀơch gay ma ƀư bêk prêng ma săk jăn khân păng nơm,

²⁵ yorlah khân păng tâm rgâl nau ngăn Brah Ndu gay ma sŏk nau mƀruh; khân păng yơk mbah jêh ri pah kan ma ndơ njêng ntrok ma Nơm Rhăk Njêng, jêng Nơm khư tâm rnê n'ho ro! Amen.

²⁶ Yor nau nây Brah Ndu jao jêh ma khân păng ma nau kơnh ŭch khư ƀơ̆ ƀơch. Nđâp ma phung bu ur tâm rgâl jêh nau vay gŭ ur sai jêng nau mâu vay.

²⁷ Phung bu klâu tâm ban lĕ, chalơi nau vay gŭ ur sai, khân păng tâm di măt ndrăng khân păng nơm, bu klâu đah bu klâu ƀư nau tih ƀơ̆ ngăn, jêh ri khân păng dơn nau tâm rmal tĭng nâm nau vĭ nhhơt khân păng.

²⁸ Yorlah khân păng mâu ŭch gĭt năl Brah Ndu ôh, pônây Brah Ndu n'ho jao khân păng ma nau mĭn mhĭk gay ƀư âk nau mâu khư ôh.

²⁹ Khân păng bêng ma ăp ntil nau kue, nau tih mhĭk, nau kơnh, nau ƀai; nuih n'hâm bêng ma nau keh nach, nau nkhĭt bunuyh, nau tâm lah tâm djrel, nau mƀruh nchơt, nau hăt janh;

³⁰ ngơi kek, ngơi nchơt, tâm rmot ma Brah Ndu, nau ƀai, ngơi sưr, ngơi blă blơ, vay ƀư nau mhĭk, mâu iăt nau mê̆ mbơ̆;

³¹ rluk mâl, mâu gŭ răp jăp, mâu geh nuih n'hâm rŏng, mâu geh nuih n'hâm yô̆ nđach.

³² Khân păng rlau ma gĭt nau vay Brah Ndu hŏ nal pô aơ ma mbu nơm ƀư lĕ nau tih pônây jêng khư khĭt. Pôri, mâu di knŏng khân păng nơm ƀư lĕ nau nây, ƀiălah khân păng tâm di ndrel ma phung êng ƀư tâm ban đŏng.