Phung Kôranh Phat Dôih 3 - Nau Brah Ndu Ngơi 2023

Phung ƀon lan hôm e tâm n'gor

¹ Brah Yêhôva hôm e om phung ƀon lan gay rlong uănh phung ƀon lan Israel jêng phung ê hŏ prot găn nau tâm lơh ta Kanaan.

² Păng knŏng ŭch ntăm nti ma lĕ rngôch rô̆ mhe phung Israel dơi gĭt nau tâm lơh, jêh ri nti đŏng ma phung ê hŏ prot gĭt nau tâm lơh.

³ Phung ntil mpôl bunuyh nây jêng phung Philistin jêh ri prăm nuyh hađăch khân păng, lĕ rngôch phung Kanaan, phung Sidôn, jêh ri phung Hivit gŭ ta yôk Liban, ntơm bơh yôk Baal-Hermôn tât ma sop Hamat.

⁴ Brah Yêhôva dŏng phung ƀon lan nây gay rlong uănh phung Israel, gay uănh khân păng tông mâu lah mâu lĕ nau vay Păng ntăm, hŏ đă Y-Môis ntăm ma phung chô yau khân păng.

⁵ Pônây, phung ƀon lan Israel gŭ rêh nsum đah phung Kanaan, phung Hitit, phung Amôrit, phung Pêrisit, phung Hivit, jêh ri phung Jêbusit.

⁶ Khân păng sŏk kon druh phung nây ƀư ur, văng kon bu ur khân păng nơm đah kon bu klâu phung nây, jêh ri pah kan ma brah phung nây.

Phung kôranh phat dôih Phung Israel ( 3:7 – 16:31 ) Y-Ôtniêl, Y-Êhut jêh ri Y-Samgar

⁷ Phung ƀon lan Israel ƀư nau mhĭk tanăp Brah Yêhôva, chuêl jêh Yêhôva Brah Ndu khân păng, jêh ri yơk mbah ma lĕ rup Baal jêh ri Asêrah.

⁸ Yor ri, Brah Yêhôva hao ji nuih ma phung Israel, Păng jao khân păng tâm ti Y-Kusan-Risathaim, hađăch Aram Naharadim. Ăn phung ƀon lan Israel pah kan Y-Kusan-Risathaim tâm pham năm.

⁹ Phung ƀon lan Israel nter ma Brah Yêhôva jêh ri Brah Yêhôva n'hao ma khân păng du huê nơm rklaih jêng Y-Ôtniêl, kon bu klâu Y-Kênas, oh Y-Kalep, jêh ri păng rklaih khân păng.

¹⁰ Huêng Brah Yêhôva jŭr ta păng jêh ri păng chiă uănh phung ƀon lan Israel. Păng hăn tâm lơh jêh ri Brah Yêhôva jao Y-Kusan-Risathaim, hađăch Aram, tâm ti păng. Păng lơh dơi đah Y-Kusan-Risathaim.

¹¹ N'gor geh nau đăp mpăn tâm puăn jât năm. Jêh nau nây, Y-Ôtniêl, kon bu klâu Y-Kênas, khĭt jêh.

¹² Phung ƀon lan Israel ƀư đŏng nau mhĭk tanăp măt Brah Yêhôva rĭ dĭng Brah Yêhôva ăn Y-Êglon, hađăch Môap, jêng janh ktang gay tâm rdâng đah phung Israel yorlah khân păng ƀư nau mhĭk tanăp măt Brah Yêhôva.

¹³ Pônây, Y-Êglon tâm rnglăp ndrel ma păng phung Ammôn jêh ri phung Amalek jêh ri hăn tâm lơh đah phung Israel jêh ri khân păng pit sŏk ƀon Tơm Đung.

¹⁴ Phung ƀon lan Israel pah kan ma Y-Êglon, hađăch n'gor Môap, tâm jât ma pham năm.

¹⁵ Phung ƀon lan Israel nter tay ma Brah Yêhôva, jêh ri Brah Yêhôva săch ăn ma khân păng du nơm rklaih jêng Y-Êhut, kon bu klâu Y-Gêra, bơh noi deh Benjamin, jêng bunuyh vay dŏng ti chiau. Phung ƀon lan Israel njuăl ma Y-Êhut djôt leo ndơ nhhơr ăn ma Y-Êglon, hađăch n'gor Môap.

¹⁶ Y-Êhut ƀư ma păng nơm du đao bar măt, jong du hăt jêh ri văn păng ta nglik pa ma tâm dâng ao păng nơm.

¹⁷ Pôri, păng djôt leo ndơ nhhơr chê̆ ma Y-Êglon, hađăch Môap, jêng du huê lay ngăn.

¹⁸ Jêh nây Y-Êhut chê̆ ndơ nhhơr, păng ăn phung djôt leo ndơ nhhơr nây hăn sĭt.

¹⁹ Hôm păng, nôk hăn tât ta rup lŭ gŭ dăch Gilgal, plơ̆ tay jêh ri lah: “Hơi hađăch, gâp geh du nau ndâp ŭch mbơh ma may.” Jêh ri hađăch ntĭnh: “Gŭ rklăk!” Lĕ rngôch phung kâp kơl păng hăn luh ro.

²⁰ Dôl nây, nôk hađăch dôl gŭ êng du huê tâm jrô nđik; Y-Êhut văch dăch jêh ri lah: “Gâp geh du nau mbơh bơh Brah Ndu ăn ma may.” Y-Êglon mhe dâk tă bơh sưng păng gŭ.

²¹ Y-Êhut yơr ti chiau tŏk đao văn ta pa ma jêh nây ntâp ta ndŭl hađăch.

²² N'gâr đao băm ndrel ma măt đao, ngi lĕ tâm jĭr jŭm măt đao yorlah păng mâu tŏk ôh đao luh bơh ndŭl jêh ri ndơ ƀơ̆ luh du.

²³ Y-Êhut hăn luh ta ndring ngih, jêh ri ntĭl mpông jrô nđik jêh ri khuă.

²⁴ Tơlah Y-Êhut lĕ hăn du luh jêh, phung oh mon păng văch tât, saơ lĕ mpông jrô nđik nây lĕ khuă ăn nâp, khân păng lah đah ndrăng khân păng pô aơ: “N'hêl nanê̆ păng dôl hăn ek tâm jrô nđik.”

²⁵ Khân păng gŭ kâp dŭt jŏ, kŏ tât nau rŭng răng, ƀiălah yorlah jŏ mâu saơ păng pơk mpông jrô, pôri khân păng sŏk keh khuă jêh ri pơk mpông jrô. Aơ, khân păng saơ kôranh khân păng hŏ khĭt jêh, gŭ lâng ta gre ngih.

²⁶ Tâm nôk khân păng hôm gŭ kâp, Y-Êhut hŏ klaih jêh găn mpeh rup lŭ trah jêh ri du rlet tât ta Sêira.

²⁷ Tơlah păng tât, păng uh nŭng lam tâm n'gor klơ dor yôk Êphraim. Phung ƀon lan Israel ndrel păng hăn trŭnh tă bơh klơ yôk jêh ri păng chiă uănh khân păng.

²⁸ Y-Êhut lah ma khân păng pô aơ: “Tĭng ndô̆ hom gâp, yorlah Brah Yêhôva jao jêh phung rlăng khân may jêng phung ƀon lan Môap tâm ti khân may.” Khân păng hăn tĭng păng gay trŭnh pit in lĕ ntŭk neh sơh dak krong Yurdan, jêng trong hăn tât ta Môap jêh ri mâu ăn ôh du huê rgăn dak krong.

²⁹ Nôk nây, phung ƀon lan Israel nkhĭt klăp lah jât rbăn phung Môap, lĕ rngôch jêng phung tahan ktang nâp săk jăn, jêh ri mâu geh ôh du klaih.

³⁰ Tâm nar nây, phung Môap gŭ tâm dâng ti phung Israel. N'gor geh nau đăp mpăn tâm pham jât năm.

Y-Samgar

³¹ Pakơi Y-Êhut, geh Y-Samgar, kon bu klâu Y-Anat. Păng sŏk du mlâm mâng ntrŭt ndrôk dong nkhĭt prao rhiăng nuyh phung Philistin. Pôri păng ăt jêng nơm rklaih Phung ƀon lan Israel.