ផីលេមោន 1 - Nau Brah Ndu Ngơi 2023

Nau mbah jô̆ khâl

¹ Y-Pôl, bunuyh gŭ ndrung Brah Yêsu Krist, jêh ri Y-Timôthê, oh nâu he, samƀŭt njuăl ma Y-Philêmôn, nơm hên rŏng jêh ri nơm pah kan ndrel ma hên,

² njuăl đŏng ma H'Apia, oh ruh hên, ma Y-Archipus, bunuyh tâm lơh ndrel ma hên, jêh ri ma Phung Ngih Brah Ndu tâm ngih may:

³ Mbơh sơm dăn Brah Ndu, Mbơ̆ he, jêh ri Brah Yêsu Krist ăn nau yô̆ jêh ri nau đăp mpăn ma khân may.

Nau chroh jêh ri nau rŏng Y-Philêmôn

⁴ Gâp lah ueh ma Brah Ndu gâp ƀaƀơ, ăp tơ̆ kah gĭt ma may dôl gâp mbơh sơm,

⁵ yorlah gâp tăng jêh nau may chroh ma Kôranh Brah jêng Brah Yêsu, jêh ri nau may rŏng ma lĕ rngôch phung kloh ueh.

⁶ Gâp mbơh sơm ma nau tâm pă ma nau may chroh mra tâm n'hao nau gĭt rbăng ma lĕ rngôch nau ueh he geh jêh tâm Brah Krist.

⁷ Ơ nâu, nau may rŏng hŏ njŭn leo tay nau bonh leng jru ngăn ma gâp, yorlah tă bơh may nuih n'hâm phung kloh ueh geh nau ndrêh mhe.

Y-Pôl kơl n'gang ma Y-Ônêsim

⁸ Yor nây, nđâp tơlah tâm Brah Krist, gâp geh nau dơi ntăm ma may nau may ƀư,

⁹ ƀiălah yor nau rŏng, gâp vơh vơl pô aơ. Gâp nơm, Y-Pôl, lĕ ranh jêh ri aƀaơ jêng bu nă yor Brah Yêsu Krist,

¹⁰ vơh vơl ma may kơl Y-Ônêsim, kon gâp, nơm gâp deh jêh tâm rse rvăk.

¹¹ Kăl e ri, bunuyh aơ mâu jêng khlay ma may ôh, ƀiălah aƀaơ păng jêng khlay jêh ma may jêh ri ma gâp.

¹² Gâp mplơ̆ bunuyh aơ ma may tâm ban njuăl nuih n'hâm gâp nơm.

¹³ Gâp ŭch kân bunuyh aơ ndrel ma gâp, gay tâm tang ma may pah kan ma gâp dôl gâp gŭ tâm rse rvăk yor Nau Mhe Mhan Ueh.

¹⁴ Ƀiălah gâp mâu ŭch ƀư ôh moh nau tơlah may ê hŏ dơn nau, gay ma nau ueh may ƀư mâu bơh nau nchâp ôh, ƀiălah bơh nau nđơr êng.

¹⁵ Klăp lah yor nau aơ păng tâm nkhah đah may ƀât lât, gay ma may dơi geh păng n'ho ro,

¹⁶ mâu di nâm bu du huê dĭk dơm, ƀiălah rlau lơn ma du huê dĭk, jêng du huê oh nâu he rŏng ngăn ngên. Đah gâp, bunuyh aơ khlay rŏng ngăn ngên, ƀiălah đah ma may, hô lơ rŏng rlau lơn, nđâp ma tâm nglay săk jêh ri tâm Kôranh Brah.

¹⁷ Pôri, tơlah may kơp gâp jêng mĭt jiăng pah kan ndrel, rom dơn hom bunuyh aơ nâm bu gâp nơm đŏng.

¹⁸ Tơlah bunuyh aơ ƀư nau mhĭk ma may, mâu lah iang rnon ma may, may ăt kơp ma gâp.

¹⁹ Gâp nơm, Y-Pôl, nchih nau aơ ma ti gâp nơm, gâp mra mplơ̆ sĭt ma may. Ƀiălah gâp mâu ŭch nkah ma nau may iang rnon gâp ma săk jăn may nơm.

²⁰ Di ngăn, ơ nâu, dăn may ăn gâp geh nau răm maak aơ tâm Kôranh Brah, jêh ri ƀư ndrêh mhe tay nuih n'hâm gâp tâm Brah Krist.

²¹ Gâp nchih ma may đah nau rnơm jêng may mra dơn, jêh ri gâp gĭt may mra ƀư rlau lơn ma nau gâp dăn đă.

²² Tâm ban lĕ, ndrăp hom du ntŭk gŭ ma gâp, yorlah gâp kâp gân yor nau khân may mbơh sơm, gâp mra plơ̆ sĭt ma khân may.

Nau mbah jô̆ khâl nglĕ dŭt samƀŭt njuăl

²³ Y-Êpapras, nơm gŭ ndrung ndrel ma gâp tâm Brah Yêsu Krist, mbah jô̆ khâl đah may;

²⁴ Y-Markôs, Y-Aristarkus, Y-Đêmas jêh ri Y-Luk, phung pah kan ndrel ma gâp tâm ban lĕ.

²⁵ Mbơh sơm dăn nau yô̆ bơh Kôranh Brah jêng Brah Yêsu Krist gŭ ndrel ma huêng nuih n'hâm khân may!