Philip 4 - Nau Brah Ndu Ngơi 2023

Nau ntĭm ƀaƀă

¹ Pônây, hơi phung oh nâu gâp rŏng ngăn, jêng phung mĭt jiăng jêh ri klâng rvê, jêng nau maak jêh ri đon hađăch ma gâp, gŭ nâp hom tâm Kôranh Brah!

² Gâp nti nkah H'Êvôdi jêh ri nti nkah H'Sintich ăn gŭ du nau mĭn tâm Kôranh Brah.

³ Gâp dăn đŏng ma may, mĭt jiăng pah kan răp jăp ndrel ma gâp, kơl hom phung bu ur nây; khân păng dâk ndrel ma gâp tâm lơh yor ma Nau Mhe Mhan Ueh, ndrel ma Y-Klêmen jêh ri phung mĭt jiăng ndrel kan êng ma gâp; amoh khân păng Brah Ndu nchih jêh tâm ndrom samƀŭt nau rêh.

⁴ Răm maak mro hom tâm Kôranh Brah, gâp lah tay đŏng: Răm maak hom!

⁵ Ăn hom lĕ rngôch bunuyh gĭt nau rdơ̆ rbăn khân may. Kôranh Brah văch dăch jêh!

⁶ Lơi ta rngot rvê ma du ntil ndơ ôh, ƀiălah tâm lĕ ntil ndơ dŏng hom nau mbơh sơm, nau vơh dăn jêh ri nau lah ueh gay tâm mpơl lĕ nau khân may ŭch dăn ma Brah Ndu.

⁷ Nau đăp mpăn Brah Ndu, rlau lơn ma lĕ rngôch nau blau mĭn, mra mât mray nuih n'hâm jêh ri nau mĭn khân may tâm Brah Yêsu Krist.

⁸ Nau nglĕ dŭt, hơi oh nâu, moh ntil jêng nau nanê̆ ngăn, moh ntil jêng nau khư yơk, moh ntil jêng nau sŏng srăng, moh ntil jêng nau kloh rsang, moh ntil jêng nau khư rŏng, moh ntil jêng nau khư tâm rnê, lah nsum jêng moh ntil jêng nau mĭn ueh, nau khư tâm rnê, ăn khân may mĭn ma lĕ nau nây.

⁹ Moh nau khân may nti jêh, dơn jêh, tăng jêh jêh ri saơ jêh tâm gâp, ƀư hom, ri mơ nau đăp mpăn Brah Ndu mra gŭ ndrel ma khân may.

Lah ueh nau tâm kơl phung chroh ta ƀon Philip

¹⁰ Gâp răm maak ngăn tâm Kôranh Brah, yorlah nau nglĕ dŭt, khân may mĭn rvê ma gâp. Ngăn khân may ăt mĭn rvê, ƀiălah mâu geh mông găl tâm mpơl ôh.

¹¹ Gâp ngơi kơt nây mâu di yor gâp pưt kƀah ôh, ƀiălah yorlah gâp nti jêh gŭ rêh ma nau maak tâm lĕ rngôch nau tât ma gâp.

¹² Gâp gĭt gŭ tâm nau pưt kƀah, gŭ tâm nau rmeh ler. Tâm lĕ rngôch ntŭk, lĕ rngôch ntil nau gâp nti jêh nau khlay ndâp gay gŭ rêh, nđâp tơlah hơm mâu lah ji ngot, nđâp tơlah rmeh mâu lah pưt.

¹³ Gâp dơi ƀư lĕ ntil ndơ yor ma Brah Krist ăn n'hâm suan ma gâp.

¹⁴ Nđâp lah kơt nĕ, khân may kơl gâp tâm nau rêh ni jêng ƀư nau ueh.

¹⁵ Hơi phung ƀon Philip, khân may gĭt jêh tâm rnôk ntơm mbơh nkoch Nau Mhe Mhan Ueh, dôl gâp du luh tă bơh n'gor Masêđôn, knŏng phung khân may dơm kơl gâp, mâu geh Ngih Brah Ndu ƀaƀă dơi kơl nau dŏng tâm nau rêh gâp.

¹⁶ Yorlah ta ƀon Têsalônik, khân may njuăl bar pe tơ̆ jêh lĕ ndơ ma gâp ŭch dŏng.

¹⁷ Nây mâu di gâp ŭch ndơ ăn ôh, ƀiălah gâp ŭch play kao ntop nau hao ma khân may.

¹⁸ Gâp hŏ geh bêng tŏng jêh ri geh rmeh ler. Gâp hŏ dơn jêh bêng tŏng ndơ khân may njuăl ma gâp bơh Y-Êpaphôdit, nâm bu du ndơ nhhơr n'hôl ƀâu kah, du mpa ƀư brah Brah Ndu maak dơn jêh ri ueh nuih n'hâm ma Păng.

¹⁹ Brah Ndu gâp mra ăn ma khân may ăp ntil ndơ khân may ŭch tĭng nâm nau Păng ndrŏng tâm nau chrêk rmah tâm Brah Yêsu Krist.

²⁰ Mbơh sơm dăn nau chrêk rmah jêng ndơ Brah Ndu, jêng Mbơ̆ he ƀaƀơ n'ho ro! Amen.

Nau khâl nglĕ dŭt

²¹ Jô̆ khâl hom phung kloh ueh tâm Brah Yêsu Krist. Phung oh nâu gŭ ndrel ma gâp jô̆ khâl khân may.

²² Lĕ rngôch phung kloh ueh jô̆ khâl khân may, khlay ngăn ngên jêng phung gŭ tâm ngih Sêsar.

²³ Dăn nau yô̆ bơh Kôranh Brah jêng Brah Yêsu Krist gŭ ndrel ma huêng khân may!