Philip 3 - Nau Brah Ndu Ngơi 2023

Nau sŏng srăng ngăn

¹ Nau nglĕ dŭt, hơi phung oh nâu gâp, maak hom tâm Kôranh Brah! Gâp mâu klach rkê̆ch tay lĕ nau nây ma khân may, yor nây jêng nau đăp mpăn ma khân may.

² Uănh njrăng hom ma phung so, uănh njrăng hom ma phung pah kan djơh mhĭk, uănh njrăng hom ma phung dơn nau koh ntâu nklă!

³ Yorlah he yơh jêng phung koh ntâu ngăn, phung bunuyh pah kan ma Brah Ndu tă bơh ma Brah Huêng Ueh, khư tâm Brah Yêsu Krist, jêh ri mâu mâp rnơm nsing ma nglay săk ôh.

⁴ Nđâp tơlah săk jăn gâp geh nau rnơm nsing ma nglay săk. Tơlah mbu nơm mĭn geh nau rnơm nsing ma nglay săk, gâp lơ hô geh nau rnơm âk lơn:

⁵ Gâp dơn nau koh ntâu nar rơh pham, jêng noi deh Israel, ndŭl mpôl Benjamin, jêng phung Hêbrơ, kon bunuyh Hêbrơ; ma nau vay, gâp jêng du huê bunuyh Pharisi;

⁶ ma nuih n'hâm duh nđơr, gâp jêng nơm ƀư mhĭk ma Phung Ngih Brah Ndu; bi ma nau sŏng srăng tĭng nâm nau vay gâp mâu geh nau nduyh.

⁷ Ƀiălah yor Brah Krist, gâp uănh lĕ drăp ndơ geh ma gâp nơm tâm ban ma nau roh rai.

⁸ Rlau ma nây, gâp uănh đŏng lĕ ntil ndơ tâm ban ma nau roh rai, yor nau gĭt năl Brah Yêsu Krist, Kôranh Brah gâp, jêng khlay lơn. Yor Păng, gâp dơn nau roh rai ma lĕ rngôch, jêh ri uănh lĕ nau nây nâm bu ndŏk, gay geh Brah Krist,

⁹ jêh ri dơi gŭ tâm Păng. Dơi nâm nđĕ mâu di tă bơh nau sŏng srăng gâp nsing tâm nau vay, ƀiălah bơh nau chroh tâm Brah Krist, nau sŏng srăng luh bơh Brah Ndu nsing ma nau chroh,

¹⁰ gay ma gâp dơi gĭt năl Păng, nau brah bơh nau Păng dâk rêh tay, dơi tâm pă nau Păng rêh ni, jêh ri plơ̆ jêng tâm ban ma Păng tâm nau păng khĭt;

¹¹ kâp gân pô aơ gâp dơi geh nau dâk rêh tay tă bơh nau khĭt.

¹² Nây mâu di gâp hŏ pit sŏk jêh ôh nau nkhôm, mâu lah hŏ plơ̆ jêng ma dŭt ueh ngăn ôh, ƀiălah gâp ăt dôl nchuăt, gay dơi pit sŏk, yorlah Brah Yêsu Krist pit sŏk gâp jêh.

¹³ Hơi oh nâu, gâp mâu mĭn ôh gâp lĕ pit sŏk jêh;

¹⁴ ƀiălah gâp ăt ƀư du ntil nau; chuêl lơi lĕ nau pakơi, rduh ran ma lĕ nau panăp, gâp ntrâng nau ŭch nchuăt gay pit sŏk nau nkhôm ma nau Brah Ndu kuăl bơh klơ tâm Brah Yêsu Krist.

¹⁵ Pôri, ăn lĕ rngôch phung văch ma toyh geh nau mĭn aơ, bi tơlah khân may mĭn ma nau êng, Brah Ndu ăt mra ƀư tâm mpơl ma khân may.

¹⁶ Nđâp lah kơt nĕ, ta moh keh he dơi tât, nhuat hăn hom kơt nây.

Y-Pôl nkah bu tĭng kơt păng nơm

¹⁷ Hơi phung oh nâu, kơt hom ndrel gâp, jêh ri mĭn rvê tât phung bunuyh gŭ rêh tĭng nâm nau kơt khân may saơ tâm hên.

¹⁸ Yorlah gâp ngơi ƀaƀơ jêh nau nây ma khân may, aƀaơ aơ gâp nhĭm jêh ri ngơi đŏng: Geh âk bunuyh hŏ gŭ rêh tâm ban phung rlăng đah si tâm rkăng Brah Krist.

¹⁹ Nau nglĕ dŭt khân păng jêng nau rai roh. Khân păng sŏk ndŭl khân păng nơm jêng kôranh brah khân păng nơm, sŏk nau đit prêng jêng nau chrêk rmah, jêh ri knŏng mĭn ma lĕ nau kan tâm neh ntu.

²⁰ Ƀiălah he jêng phung ƀon lan klơ trôk; bơh ntŭk nây, he kâp Kôranh Brah jêh ri Nơm Tâm Rklaih jêng Brah Yêsu Krist.

²¹ Păng mra tâm rgâl săk jăn jê̆ jănh he plơ̆ jêng nâm bu săk jăn chrêk rmah Păng, dŏng nau brah ƀư ăn lĕ rngôch ndơ plơ̆ sĭt tông ma Păng.