Philip 1 - Nau Brah Ndu Ngơi 2023

Nau mbah jô̆ khâl

¹ Y-Pôl jêh ri Y-Timôthê, oh mon Brah Yêsu Krist, nchih njuăl ma lĕ rngôch phung kloh ueh tâm Brah Yêsu Krist ta ƀon Philip ndrel ma phung kôranh chiă uănh jêh ri ma phung bunuyh kơl kan.

² Dăn Kôranh Brah, Mbơ̆ he, jêh ri Kôranh Brah jêng Brah Yêsu Krist ăn nau yô̆ jêh ri nau đăp mpăn ma khân may.

Nau Y-Pôl rŏng đah phung chroh ta ƀon Philip

³ Ăp tơ̆ gâp kah gĭt ma khân may, gâp lah ueh ma Brah Ndu gâp.

⁴ Tâm ăp tơ̆ mbơh sơm ma lĕ rngôch khân may, gâp mbơh sơm ƀaƀơ ma nau răm rhơn,

⁵ yorlah bơh nar khân may ntơm tăng tât aƀaơ, khân may hŏ tâm rnglăp ndrel ma gâp tâm nau nkoch mbơh ma Nau Mhe Mhan Ueh.

⁶ Gâp chroh ngăn ma Nơm ntơm kan ueh tâm phung khân may mra ƀư lôch kan nây ma tât nar Brah Yêsu Krist.

⁷ Gâp mĭn ma lĕ rngôch khân may kơt nĕ jêng di ngăn, yorlah khân may gŭ tâm nuih n'hâm gâp. Nđâp tơlah bu hôm nkông ma rse rvăk, mâu lah tâm nau n'gang jêh ri nau koh dŏng ma Nau Mhe Mhan Ueh, khân may geh kô̆ tâm nau yô̆ hŏ ăn ma gâp.

⁸ Yorlah Brah Ndu mbơh nkoch ma gâp pô aơ gâp rŏng ngăn ngên ma lĕ rngôch khân may ma nau rŏng tă bơh Brah Yêsu Krist.

⁹ Tâm nau gâp dăn mbơh sơm, nây jêng nau rŏng khân may lơ nar lơ hao lơn, ndrel ma nau gĭt rbăng jêh ri lĕ rngôch gĭt vât jru ngăn,

¹⁰ kơl ma khân may gĭt rnglah êng moh nau jêng dŭt ueh, gay tâm nar Brah Krist khân may geh nau kloh, mâu geh ntŭk dơi nduyh ôh,

¹¹ geh bêng ma play nau sŏng srăng bơh Yêsu Krist gay mât ton jêh ri nau tâm rnê ma Brah Ndu.

Gŭ rêh yor Brah Krist

¹² Hơi oh nâu, gâp ŭch ma khân may gĭt lĕ nau tât jêh ma gâp jêng n'hêl nanê̆ ngăn kơl Nau Mhe Mhan Ueh hao toyh;

¹³ kŏ tât lĕ rngôch phung tahan gak tâm ngih kôranh n'gor jêh ri lĕ rngôch bunuyh êng gĭt gâp da dê yor Brah Krist gâp dơn rse rvăk;

¹⁴ âk bunuyh tâm phung oh nâu tă bơh nau gâp dơn rse rvăk, nau chroh khân păng lơ hô nâp lơn tâm Kôranh Brah, jêh ri nănh janh mbơh nkoch nau ngơi Kôranh Brah mâu klach ôh.

¹⁵ Nanê̆ ngăn, geh ƀaƀă bunuyh mbơh nkoch Brah Krist yor ma nau keh nach jêh ri nau tâm pit, ƀiălah geh đŏng phung bunuyh yor ma nau mĭn ueh mbơh nkoch.

¹⁶ Phung bunuyh aơ mbơh nkoch yor ma nuih n'hâm rŏng, khân păng gĭt bu njêng gâp gay ngơi n'gang Nau Mhe Mhan Ueh;

¹⁷ bi phung nây mbơh nkoch Brah Krist yor ma nau mbeh, mâu ngơi ngăn ôh jêh ri ntôn lah kơt nĕ mra ƀư nau rêh ni ntop âk lơn ma gâp dơn rse rvăk.

¹⁸ Ƀiălah mâu geh ôh! Kđôi moh nau tât, mâu lah ndra ƀư mâu lah nau ngăn, Brah Krist ăt bu mbơh nkoch. Nây jêng nau gâp răm maak, jêh ri mra hôm răm maak đŏng!

¹⁹ Yorlah gâp gĭt tă bơh nau khân may mbơh sơm jêh ri tă bơh Brah Huêng Ueh Brah Yêsu Krist kơl, nau nây mra djôt tay nau tâm rklaih ma gâp.

²⁰ Nau gâp ŭch kâp jêh ri nau kâp gân mâu mra geh du ntil nau bêk prêng ôh, ƀiălah bêng ma nuih n'hâm nănh, gay aƀaơ tâm ban đŏng tâm lĕ rngôch ntŭk, nđâp tơlah gŭ rêh mâu lah khĭt, Brah Krist ăt geh tâm rnê tâm nau gŭ rêh gâp.

²¹ Yorlah ma gâp, rêh jêng Brah Krist, bi khĭt jêng nau ueh lơn ma gâp.

²² Ƀiălah tơlah gâp hôm gŭ rêh tâm nglay săk nau gâp kan ăt dơi jêng play, pôri gâp mâu gĭt ôh moh nau gâp mra săch.

²³ Gâp geh nau mpet bar đah: Gâp ŭch luh du jêh ri plơ̆ sĭt gŭ ndrel ma Brah Krist jêng nau ueh lơn âk ngăn.

²⁴ Ƀiălah gâp hôm gŭ rêh tâm nglay săk, nây jêng nau khlay lơn ma khân may.

²⁵ Chroh n'hêl nanê̆ nau aơ, gâp gĭt ma gâp mra hôm gŭ rêh jêh ri hôm gŭ ndrel đah lĕ rngôch khân may gay kơl khân may hao toyh jêh ri răm maak tâm nau chroh.

²⁶ Kơt nĕ tơlah gâp plơ̆ sĭt chop khâl, khân may mra geh âk nau hâk răm ma gâp tâm Brah Yêsu Krist.

²⁷ Nau khlay jêng ăn khân may gŭ rêh tâm di đah Nau Mhe Mhan Ueh Brah Krist, gay ma tơlah gâp hăn khâl khân may mâu lah gâp ndŭt măt, gâp tăng lĕ ma khân may hôm dâk nâp, du ai nau mĭn, du nuih n'hâm tâm lơh ndrel yor nau chroh Nau Mhe Mhan Ueh,

²⁸ jêh ri mâu klach du ntil ndơ tă bơh phung rlăng. Nây jêng nau mbơh gay saơ khân păng mra geh nau rai yot, bi khân may geh nau tâm rklaih; jêh ri nau nây luh bơh Brah Ndu.

²⁹ Yor tă Brah Krist, khân may geh bu ăn nau yô̆ mâu di knŏng gay chroh dơm, ƀiălah ăn khân may dơn nau rêh ni yor Păng tâm ban lĕ,

³⁰ yorlah khân may dơn ndrel nau tâm lơh nâm bu khân may saơ jêh tâm gâp, jêh ri aƀaơ ăt hôm tăng tâm gâp.