Nơm Nti 9 - Nau Brah Ndu Ngơi 2023

Bunuyh blau mĭn maak dơn nau yô̆ Brah Ndu ăn

¹ Gâp hŏ ŭch nti rvê lĕ rngôch nau nây, jêh ri saơ rah vah pô aơ bunuyh sŏng srăng jêh ri blau mĭn ndrel đah kan ƀư khân păng gŭ tâm ti Brah Ndu da dê; geh nau rŏng mâu lah geh nau tâm rmot, kon bunuyh mâu dơi gĭt. Lĕ rngôch prăp ma du nar kăndơ̆ da dê.

² Ăp nau kan geh tât ăn ma lĕ rngôch bunuyh du ai tâm ban, nsum du mrô tâm nal: Bunuyh sŏng srăng tâm ban ma phung djơh mhĭk, Bunuyh ueh tâm ban ma phung mhĭk, Bunuyh geh nau kloh tâm ban ma phung ƀơ̆ ƀơch, Bunuyh nhhơr mpa ƀư brah tâm ban phung mâu nhhơr, Bunuyh sŏng tâm ban ma phung nau tih, Bunuyh tâm ton tâm ban phung mâu nănh tâm ton.

³ Aơ jêng nau mhĭk tât tâm lĕ rngôch moh nau geh tât tâm dâng nar: Yorlah ăp bunuyh dơn nsum du mrô tâm nal yor ri nuih n'hâm kon bunuyh bêng ma nau janh ƀai, jêh ri nau brŭt ndrăng chiă uănh nau mĭn khân păng du bông nau rêh, gay nglĕ dŭt mra hăn lăp tâm ma nau khĭt.

⁴ Knŏng mbu nơm du huê gŭ tâm phung rêh ri mơ geh nau kâp gân, yorlah so rêh rlau lơn ma yau mŭr khĭt!

⁵ Bunuyh rêh gĭt ma nau păng nơm mra khĭt, Ƀiălah phung khĭt mâu mra gĭt du ntil ôh; Mâu hôm geh nau nkhôm ăn ma khân păng, Yorlah nau ndray ma khân păng hŏ tŭp tâm nau chuêl jêh.

⁶ Nđâp ma nau rŏng, nau tâm rmot, Jêh ri nau mâu nach khân păng ăt roh rai da dê. Khân păng mâu hôm geh du kô̆ Tâm lĕ kan nau tât geh tâm dâng nar.

⁷ Pônây, sông sa hom ma nau maak jêh ri nhêt ndrănh ndrel nuih răm rhơn, yorlah Brah Ndu hŏ dơn jêh lĕ ma nau may ƀư.

⁸ Nsoh ƀaƀơ hom nâm bu tâm nar rƀŭn mpôl jêh ri lơi chuêl ôh mhĭng dak ƀâu kah ta klơ bôk may.

⁹ Gŭ rêh hâk răm hom ndrel ur may rŏng jêh ri rêh lôch lĕ rngôch nar dơm dam ăn jêh ma may, tâm dâng nar. Yorlah nây jêng kô̆ bu pă ma may tâm nau rêh, jêh ri tâm nau kan may ƀư hŏt ra-ah tâm dâng nar, dôl tâm lĕ nar dơm dam ma may.

¹⁰ Lĕ kan ti may dơi ƀư, ƀư hom lĕ nau ktang may; yorlah tâm ƀon phung khĭt, jêng ntŭk dôl may hăn tât, mâu geh nau kan, nau nchră, nau gĭt rbăng mâu lah jêng nau blau mĭn.

¹¹ Gâp saơ tay tâm dâng nar: Mâu di lĕ ngăch jâng jêng blau nchuăt, Suan ktang jêng dơi nau tâm lơh, Ăt mâu di lĕ blau mĭn jêng hơm tŏng, Gĭt rbăng jêng ndrŏng kuăng, Jêh ri blau ngăn jêng nau yô̆; Yorlah mông găl jêh ri nau ƀŭn lap tât da dê ăn ma lĕ rngôch bunuyh.

¹² Kon bunuyh mâu gĭt nôk găl ma păng nơm. Nâm bu ka geh nhuăl mhĭk ngăn, Nâm bu sĭm geh tâm dăk sân, Kon bunuyh ăt geh dăk sân Nau mhĭk ƀât lât jŭr ma khân păng.

Nau blau mĭn ueh lơn ma nau rluk

¹³ Gâp ăt saơ du nau ntĭt tât geh tâm dâng măt nar, nau blau mĭn dŭt khlay đah gâp.

¹⁴ Geh du rplay ƀon jê̆ ri, ndrel djê̆ ƀon lan, geh du huê hađăch dăng ktang djôt tahan tât nchueng jŭm jêh ri bât pôih prêh gay rduh lơh.

¹⁵ Tâm ƀon toyh nây geh du huê bunuyh o ach blau mĭn, jêh ri bunuyh nây hŏ dŏng nau blau mĭn păng nơm rklaih ƀon. Ƀiălah rlet ô klak mbu mâu hôm kah gĭt tât ma bunuyh o ach nây đŏng.

¹⁶ Pônây, gâp ngơi pô aơ: “Nau blau mĭn ueh lơn suan ktang, ƀiălah nau blau mĭn bunuyh o ach bu mưch rmot, jêh ri nau ngơi nơm nây bu mâu geh iăt ôh.”

¹⁷ Nau bunuyh blau mĭn dơi iăt ntŭk răk klăk Rlau lơn nau nter rgât grap tă bơh nơm ƀĭt gai phung bunuyh rluk.

¹⁸ Nau blau mĭn ueh lơn ma lĕ rngôch moh ndô ndơ tâm lơh, Ƀiălah du huê bunuyh tih ƀư rai lơi âk ntil kan ueh.