Nơm Nti 8 - Nau Brah Ndu Ngơi 2023

¹ Mbu dơi nâm bu nơm blau mĭn? Mbu dơi rblang lĕ nau tât tâm nau rêh? Nau blau mĭn ƀư ăn muh măt ang rah vah Jêh ri rgâl lơi muh măt janh.

Yơk hom ma hađăch

² Gâp ntĭm djôt prăp hom nau ntrŭnh bơh hađăch ntăm, yorlah Brah Ndu geh sơm ton ma hađăch.

³ Lơi ir ngăch du bơh hađăch, mâu lĕ râng tâm nau nchră rdâng ma hađăch, yorlah hađăch geh lĕ rngôch nau dơi ƀư nau păng ŭch.

⁴ Nau hađăch geh nau dơi nanê̆ ngăn ngên, mbu nănh dơi ôp hađăch pô aơ: “Moh ndơ hađăch ƀư nây?”

⁵ Bunuyh tông nau ntrŭnh bơh hađăch mâu mra mâp nau mâu ueh, Jêh ri nuih n'hâm bunuyh blau mĭn dơi gĭt mông găl jêh ri gĭt nau ndrăp ƀư.

⁶ Yorlah lĕ rngôch nau kan geh tâm nal da dê jêh ri gĭt nau ndrăp, Nđâp tơlah geh âk nau rung răng jêr n'grŭn mpet jâk ta klơ kon bunuyh.

⁷ Mâu geh nơm dơi gĭt moh nau mra geh; Mbu moh dơi ngơi lor moh ntil nau?

⁸ Mâu mbu geh nau dơi ta klơ n'hâm rêh gay djôt prăp păng tay, Ăt mâu mbu geh nau dơi ta klơ nar khĭt. Mâu geh nơm dơi mâu kơp tâm nau tâm lơh nây; Jêh ri nau djơh mhĭk mâu dơi rklaih phung ƀư nau mhĭk.

⁹ Gâp hŏ saơ lĕ rngôch nau nây dôl nuih n'hâm ŭch mĭn đah lĕ nau kan tât geh tâm dâng nar. Geh tơ̆ bunuyh aơ chiă uănh ta klơ bunuyh ri, jêh ri ƀư ăn bunuyh nây geh nau mhĭk.

Ntil nau blau mĭn kon bunuyh mâu dơi rblang

¹⁰ Gâp saơ đŏng phung djơh mhĭk khĭt jêh ri dơi geh nau tâp brôi ueh djrêp; luh du tă bơh neh kloh ueh, phung ƀon lan tâm ƀon gơnh chuêl lĕ nau mhĭk bunuyh khĭt hŏ ƀư. Nây ăt jêng nau dơm dam.

¹¹ Yorlah nau phat dôih đah phung mhĭk mâu geh gơnh ro ôh rĭ dĭng nuih n'hâm kon bunuyh bêng ma nau djơh mhĭk.

¹² Nđâp tơlah nơm ƀư mhĭk rhiăng tơ̆ dơi geh nau rêh jŏ gâp hôm gĭt pô aơ bunuyh klach yơk ma Brah Ndu mra dơi geh nau ueh uĭn, yorlah bunuyh klach yơk ma Păng.

¹³ Ƀiălah phung mhĭk mâu mra dơi geh nau ueh uĭn, ăt mâu mra rêh jŏ ôh; nau rêh phung mhĭk rlau ngăch nâm bu gui yorlah khân păng mâu klach yơk ma Brah Ndu.

¹⁴ Hôm geh du ntil nau dơm dam aơ đŏng tât geh ta klơ neh: Geh âk phung sŏng srăng geh nau tât nâm bu nau tât ma phung djơh mhĭk; geh đŏng âk phung mhĭk dơi mâp nau ueh nâm bu khân păng hŏ ƀư nau sŏng srăng. Gâp ngơi pô aơ nau aơ ăt jêng nau dơm dam.

¹⁵ Gâp mprơ rnê nau răm maak, yor tâm dâng nar mâu geh ndơ ueh ăn ma kon bunuyh rlau lơn jêng sa, nhêt jêh ri răm maak. Nây jêng nau tâm nkrêp đah bông nar hŏt rgănh ma nau rêh Brah Ndu ăn ma kon bunuyh tâm dâng nar.

¹⁶ Gâp gay lĕ nuih n'hâm joi gĭt nau blau mĭn jêh ri treng uănh nau kan kon bunuyh hŏ ƀư lĕ rngôch nar nđâp ma măng ta klơ neh, mâu ăn măt păng rlu.

¹⁷ Gâp sek uănh lĕ rngôch nau kan Brah Ndu jêh ri dơn gĭt pô aơ kon bunuyh mâu dơi joi gĭt rbăng lĕ kan tât geh tâm dâng nar. Nđâp tơlah kon bunuyh hŏt r'ah tĭng joi ăt mâu dơi joi gĭt rbăng đŏng ôh. Nđâp lĕ bunuyh blau mĭn ntôn lah pô aơ păng mra dơi gĭt ăt mâu dơi joi gĭt rbăng.