Nơm Nti 7 - Nau Brah Ndu Ngơi 2023

Nau rvê mĭn ma nau rêh

¹ Amoh geh nau lư n'găr jêng ueh lơn ma dak ngi khlay, Nar khĭt rlau lơn nar deh.

² Hăn tât ngih ndrê klâng Ueh lơn tât ma ngih nhêt sa, Yorlah nau nây jêng ntŭk nglĕ dŭt ma lĕ rngôch bunuyh, Jêh ri bunuyh rêh ăn nuih n'hâm klâng rvê.

³ Rngot ueh lơn ma nau gơm maak, Yorlah ma măt rngot nuih n'hâm geh nau maak.

⁴ Nuih n'hâm nơm blau mĭn gŭ tâm ngih ndrê klâng, Bi nuih n'hâm bunuyh rluk gŭ tâm ntŭk pâl rlưn.

⁵ Iăt nau nduyh nkra bunuyh blau mĭn Ueh lơn jêng iăt nau mprơ rnê phung rluk.

⁶ Yorlah nau gơm phung rluk Nâm bu nteh long lok rtoh rĕk ƀrĕk tâm dâng glah. Nây ăt jêng nau dơm dam.

⁷ Nau tŭn jot ƀư bunuyh blau jêng rluk, Ndơ bu blŏl ƀư djơh nuih n'hâm bunuyh.

⁸ Nglĕ dŭt du ntil kan ueh lơn ntơm saơm kan nây; Nau nsrôih ueh lơn ma nau sưr.

⁹ Lơi ir ngăch ăn nuih n'hâm he ji nuih, Yorlah nau ji nuih ơm gŭ tâm ndŭl phung rluk.

¹⁰ Lơi ta ôp: “Mâm dĭng kăl e ueh lơn ma rnôk aƀaơ?” Yorlah ôp nâm bu pônây mâu di jêng nau blau mĭn.

¹¹ Nau blau mĭn di khlay nâm bu dơn drăp ndơn, Jêh ri djôt tay nau khlay ăn ma phung bunuyh saơ nar.

¹² Yorlah krap tâm dâng gui nau blau mĭn ăt nâm bu krap tâm dâng gui prăk rêl; Ƀiălah nau khlay gĭt rbăng dơi jêng nau blau mĭn mât njrăng nau rêh mbu nơm dơi geh păng.

¹³ Mĭn rvê hom ma nau kan Brah Ndu; Mbu nơm mra dơi ƀư ăn sŏng ndơ Păng hŏ nkê̆ch kue?

¹⁴ Tâm nar ndrŏng, maak dơn hom, Tâm nar nau mhĭk, mĭn rvê hom; Yorlah Brah Ndu ăn lĕ bar ntil nây tât Gay ma kon bunuyh mâu dơi gĭt moh nau mra tât tâm du nar kăndơ̆.

Lĕ nau ndâp ma nau rêh

¹⁵ Tâm lĕ nar dơm dam gâp, gâp hŏ saơ lĕ rngôch ăp ntil nau: Bunuyh sŏng srăng gơnh khĭt, nđâp lah rêh sŏng srăng; Bi phung djơh mhĭk dơi rêh jŏ năm, nđâp lah gŭ rêh djơh mhĭk.

¹⁶ Lơi ta mpơl rlau ir nau sŏng srăng, Ăt mâu lĕ mpơl ir nau blau mĭn; Moh nau ƀư roh rai ma may nơm?

¹⁷ Lơi djơh mhĭk ir, ăt mâu lĕ rêh brŭt rluk; Mâm dĭng may khĭt lor panăp năng nal?

¹⁸ Ueh lơn, may djôt prăp nau aơ Ăt mâu lĕ mƀơk ti tă bơh nau ri, Yorlah bunuyh klach yơk ma Brah Ndu der bơh nau nây.

¹⁹ Nau blau mĭn ƀư ăn bunuyh blau geh nau dăng ktang Rlau lơn lĕ rngôch jât nuyh kôranh chiă uănh tâm ƀon.

²⁰ N'hêl nanê̆, mâu geh du huê bunuyh sŏng srăng ta klơ neh Ƀư nau ueh ƀaƀơ mâu mâp tih ôh.

²¹ Lơi ta iăt lĕ rngôch nau bu ngơi, Klach lah may iăt nđâp ma nau rak rtăp oh mon may đŏng!

²² Yorlah nuih n'hâm may gĭt jêh pô aơ: May nơm hŏ âk tơ̆ rak rtăp bu êng.

²³ Gâp hŏ dŏng nau blau mĭn gay rlong uănh lĕ nau nây, jêh ri gâp ngơi: “Gâp mra plơ̆ jêng blau mĭn,” Ƀiălah nau blau mĭn ăt hôm ngai ma gâp.

²⁴ Moh ndơ ngai ngăn jêh ri jru ir ngăn, Mbu mra dơi joi saơ?

²⁵ Gâp nsrôih joi gay ma gĭt, sek uănh, Jêh ri tĭng joi nau blau mĭn ndrel nau di lĕ rngôch ndơ; Gâp gĭt năl pô aơ nau djơh jêng nau rluk, Nau rluk mâl jêng nau brŭt ndrăng.

²⁶ Gâp joi saơ du ntil nau rngot lơn ma nau khĭt, Nây jêng bu ur geh nuih n'hâm nâm bu ndơm jal, ti nâm bu rse rvăk. Mbu nơm rêh ueh nuih n'hâm Brah Ndu mra klaih bơh bu ur nây, Bi ma nơm geh tih mra geh păng nhŭp sŏk.

²⁷ Nơm nti ngơi: “Lôch sek uănh tâm lĕ du ntil nau gay joi saơ nau di lĕ rngôch ndơ, aơ jêng nau gâp dơi joi.

²⁸ Nây jêng nau gâp hôm e joi mâu saơ nau rblang: ‘Tâm du rbăn nuyh bu klâu, Gâp hŏ dơi joi du huê bunuyh; Bi tâm lĕ rngôch bu ur, Gâp mâu dơi joi du huê nơm lĕ.’

²⁹ Ƀiălah aơ jêng nau knŏng nguay gâp dơi joi: ‘Brah Ndu hŏ rhăk njêng kon bunuyh sŏng, Ƀiălah khân păng nơm hŏ joi âk ndơm.’”