Nơm Nti 6 - Nau Brah Ndu Ngơi 2023

Geh drăp ndơ ma mâu sa ăt jêng dơm dam

¹ Gâp saơ tay du nau mhĭk êng tât geh tâm dâng nar, nây jêng du nau mhĭk toyh ma kon bunuyh:

² Geh du huê Brah Ndu dơi ăn nau ndrŏng kuăng, drăp ndơ jêh ri nau lư amoh, kŏ tât păng mâu pưt lĕ ndơ nuih n'hâm păng ŭch. Ƀiălah Brah Ndu mâu ăn păng dơn đŏng lĕ ntil nây, ƀiălah ăn du huê bu êng dơi dơn. Nây jêng dơm dam, du nau tât rêh ni.

³ Tơlah geh du huê bunuyh deh du rhiăng kon sau jêh ri rêh jŏ du rhiăng năm, ƀiălah nuih n'hâm mâu mpay nau ŭch ma nau ueh lăng, jêh ri khĭt mâu lĕ geh tâp, gâp dơi lah du huê kon se jê̆ khĭt nôk mhe deh hôm e geh nau ueh lăng rlau bunuyh nây.

⁴ Yorlah păng tât tâm nau dơm dam, păng plơ̆ sĭt tay ndrel nau ngo; amoh săk năm deh păng bu tâp brôi tâm nau ngo klĕng.

⁵ Păng mâu prot saơ, ăt mâu prot gĭt tât ma nar; ƀiălah, păng geh nau rlu lơn ma bunuyh ri.

⁶ Ntĭt lah bunuyh ri rêh tât bar rbăn năm ƀiălah mâu dơi dơn đê̆ nau ueh maak mâm dơi geh nau khlay? Mâu di lĕ rngôch bunuyh sĭt ndrel du ntŭk da dê hĕ?

⁷ Lĕ rngôch nau hŏt rgănh kon bunuyh jêng yor mbung păng nơm, ƀiălah nuih n'hâm kơnh ji hir mâu mra dơi mpay ôh.

⁸ Bunuyh blau mĭn moh geh ndơ khlay lơn ma nơm rluk? Bunuyh o ach gĭt nau gŭ ngao geh nau khlay lĕ?

⁹ Nau măt saơ ueh lơn jêng nau ŭch mâu nanê̆. Nau nây ăt jêng dơm dam, tĭng rlong sail khôm.

¹⁰ Moh ndơ geh aƀaơ hŏ dơi ntơ amoh bơh jŏ jêh, kon bunuyh mâm mra jêng hŏ dơi ăn gĭt bơh saơm; pôri kon bunuyh mâu dơi tâm rlăch ôh đah Nơm ktang lơn ma păng.

¹¹ Lơ hâu âk nau lơ hâu ntop nau dơm dam; pônây ngơi âk moh geh ndơ khlay ăn ma kon bunuyh?

¹² Yorlah mbu dơi gĭt moh nau jêng ueh ma kon bunuyh tâm du bông nar dơm dam jêh ri gơnh rlau nâm bu du mlâm gui? Mbu nơm dơi ngơi lor ăn ma kon bunuyh moh nau geh tât tâm dâng nar dôl pakơi păng chalơi nau gŭ rêh?