Nơm Nti 5 - Nau Brah Ndu Ngơi 2023

Njrăng tâm nau ton

¹ Njrăng hom dôl may chuat tât ma ngih Brah Ndu. Ueh lơn tât dăch gŭ iăt rlau lơn jêng nhhơr mpa ƀư brah nâm bu phung rluk, yorlah khân păng nơm mâu gĭt năl ƀư nau mhĭk.

² May lơi ngăch ir hă mbung, Mâu lĕ ndal ir ngơi moh nau tanăp Brah Ndu, Yorlah Brah Ndu gŭ klơ trôk, Bi may gŭ tâm dâng neh. Pônây, djê̆ ngơi hom.

³ Âk nau mĭn rvê jêng nau mbơi; Bi ma âk ngơi jêng nau rluk.

⁴ Dôl may ton moh ntil nau ma Brah Ndu lơi jŏ jong ƀư lôch, yorlah Păng mâu maak ôh ma phung rluk. Pôri, ƀư lôch nau may ton.

⁵ Ueh lơn mâu ton rlau lơn đah nau ton mâu ƀư lôch.

⁶ Lơi ăn trôm mbung may ƀư ăn may tih, jêh ri lơi ngơi tanăp nơm mbơh Brah Ndu pô aơ: “Nây jêng vĭ.” Mâm may ƀư ăn Brah Ndu ji nuih yor nau ngơi may, jêh ri Păng ƀư rai kan ti may?

⁷ Ta ntŭk geh âk ir nau mbơi, ta nây geh âk nau dơm dam jêh ri âk nau ngơi. Pôri, klach yơk hom ma Brah Ndu.

Nau ndrŏng kuăng jêh ri drăp ndơ jêng dơm dam da dê

⁸ Dôl may saơ tâm du n'gor geh phung o ach bu tŭn jot, nau sŏng jêh ri nau di bu jot rchal, lơi ta hih rhâl ôh ma nau nây; yorlah du hê kôranh toyh geh kôranh toyh lơn nking n'gang jêh ri ta klơ khân păng hôm e geh kôranh toyh lơn đŏng.

⁹ Ƀiălah tâm lĕ rngôch nau geh, lĕ rngôch bunuyh sŏk play tă bơh mir, jêh ri hađăch tâm ban lĕ sŏk play nây đŏng.

¹⁰ Nơm rŏng ma prăk rêl kŏ mâu mpay ma prăk rêl; Nơm rŏng ma drăp ndơ kŏ mâu mpay lĕ ma nau sa kao. Nau aơ ăt jêng dơm dam.

¹¹ Drăp ndơ lơ hâu ntop âk, Bunuyh sa ndơ ăt bĭk rơ̆. Bunuyh geh drăp ndơ moh nau khlay, Rlau ma nau mêt uănh păng?

¹² Nơm pah kan hŏt r'ah bê̆ch hôm ueh ngăn, Nđâp tơlah sa âk mâu lah jê̆. Ƀiălah âk prăk âk drăp ndơ Ƀư bunuyh ndrŏng bê̆ch mâu dơi hăk.

¹³ Geh du nau mhĭk jru ngăn gâp saơ tât geh tâm dâng nar: Geh bunuyh prăp bun drăp ndơ Ƀiălah dơn nau rêh ni ma păng nơm.

¹⁴ Yor roh yot tâm nau tăch drăp, Nơm nây roh lĕ drăp ndơ; Nơm nây dơi deh du huê kon bu klâu, Ƀiălah mâu hôm geh ndơ ăn tay ma păng.

¹⁵ Dôl luh bơh ndŭl mê̆ mâm nau păng săk hưl Ăt mra luh hăn tâm ban pônây lĕ; Dôl hăn luh tâm ti păng mâu djôt leo du ntil ndơ ôh Tă bơh nau kan hŏt r'ah păng.

¹⁶ Aơ jêng tâm ban du nau mhĭk jru ngăn: Mâm nau păng lăp tâm nau rêh mra luh nâm bu pônây lĕ. Pôri, kon bunuyh dơn nau hŏt rgănh tĭng rlong sial khôm Geh ndơ khlay lĕ?

¹⁷ Rlau lơn đŏng, kon bunuyh mra rêh du bông rêh tâm nau ngo klĕng, Mra dơn âk nau rvê, nau rngot jêh ri nau ji nuih.

¹⁸ Ri, gâp saơ ngăn jêng nau ueh jêh ri jêng di ăn kon bunuyh sa, nhêt, jêh ri dơn nau maak lĕ rngôch kan hŏt păng ƀư tâm dâng nar du bông gŭ rêh Brah Ndu ăn jêh; yorlah nau nây jêng kô̆ ăn ma kon bunuyh dơi dơn.

¹⁹ Tâm ban pônây, lĕ rngôch mbu nơm dơi geh Brah Ndu ăn nau ndrŏng, drăp ndơ, tâm ban ăn nau dơi dŏng drăp ndơ nây mra sŏk dơn kô̆ păng, jêh ri maak dơn kan hŏt păng ƀư jêh. Nây jêng ndơ Brah Ndu ăn.

²⁰ Bunuyh nây mâu mra hôm kah gĭt âk ma nau rêh păng, yorlah Brah Ndu ƀư ăn nuih n'hâm păng bêng ler nau răm maak.