Nơm Nti 4 - Nau Brah Ndu Ngơi 2023

Nau tŭn jot, nau nđêh ni jêh ri nau gŭ êng

¹ Gâp plơ̆ sek uănh tay lĕ rngôch nau tŭn jot nau tât geh tâm dâng nar: Ri, phung bu tŭn jot hoch hor dak măt Mâu geh nơm bonh leng khân păng! Phung tŭn jot mƀin nsing ma nau dơi, Ƀiălah phung bu tŭn jot mâu geh nơm bonh leng!

² Yor ri, gâp kơp phung bunuyh khĭt, Phung bunuyh hŏ khĭt jêh, Geh nau ueh lơn ma phung bunuyh hôm e rêh, Phung bunuyh dôl hôm e rêh.

³ Ƀiălah geh nau ueh lơn lĕ bar bunuyh ri Jêng bunuyh ê hŏ deh, Ê hŏ saơ lĕ nau djơh Nau geh tâm dâng nar.

⁴ Gâp dơn saơ kon bunuyh pah kan đah nau hŏt rgănh jêh ri gĭt blau, knŏng yor ŭch nach bunuyh aơ đah nơm êng dơm yơh. Nau aơ nâm bu jêng nau dơm dam, tĭng rlong sial khôm.

⁵ Bunuyh rluk ut ti kơr ƀlao, Ƀư rai êng păng nơm

⁶ Ueh lơn bêng tâm mpang ti dơi geh nau rlu mpăn Rlau lơn jêng bêng lĕ bar mpang ti đah hŏt rgănh, Jêh ri nchuăt tĭng rlong sial khôm.

⁷ Gâp plơ̆ tay sek uănh tay du ntil dơm dam đŏng tâm dâng nar:

⁸ Geh du huê nơm rêh êng; Mâu geh kon, ăt mâu geh oh nâu, Ƀiălah nau hŏt rgănh păng mâu rlu, Măt uănh ma drăp ndơ mâu blau dĭl; Păng mâu ôp êng pô aơ: “Gâp mra dơn hŏt rgănh, Đă gâp nơm chalơi nau ueh maak ma mbu moh yor?” Aơ ăt jêng nau dơm dam, Nanê̆ ngăn jêng nau kan dŭt hŏt.

Nau khlay du huê mĭt jiăng

⁹ Bar hê rlau nguay, Yorlah khân păng mra dơi geh prăk kan ueh ma nau kan hŏt khân păng.

¹⁰ Tơlah bunuyh aơ cha lôt Bunuyh ri mra sâm rdâk ma mĭt jiăng păng. Ƀiălah rêh ni ngăn ma bunuyh rêh du huê geh nau cha lôt, Yorlah mâu geh nơm sâm rdâk an păng!

¹¹ Tâm ban pônây lĕ, tơlah bar hê bê̆ch nsum mra răm; Bi du huê mâm dơi răm?

¹² Rlau ma nây, tơlah gŭ êng du huê nơih bu êng lơh, Ƀiălah bar hê mra dơi tâm rdâng; Du mlâm rse păch pe băr jêr tăch ngăn.

Nau gơnh hao ăt jêng dơm dam

¹³ Du huê mom ndăm o ach ƀiălah blau mĭn, ueh lơn ma du huê hađăch ranh ƀiălah rluk, mâu hôm gĭt iăt ôh nau nkah buay.

¹⁴ Yorlah du huê ndăm nây luh tă bơh ndrung gay ƀư hađăch, nđâp lah bu deh ma păng o ach tâm ƀon bri hađăch păng.

¹⁵ Gâp saơ jêh lĕ rngôch phung rêh, hăn nsong tâm dâng nar, tĭng nơm mom ndăm rơh bar aơ da dê, jêng bunuyh mra hao ntrok hađăch ri.

¹⁶ Phung ƀon lan tĭng nơm hađăch mom ndăm aơ âk ngăn ngên. Ƀiălah kơt nây, lĕ phung rô̆ pakơi mâu hôm ŭch yơk hađăch aơ đŏng. N'hêl nanê̆ nau aơ ăt jêng nau dơm dam, tĭng rlong sial khôm.