Nơm Nti 3 - Nau Brah Ndu Ngơi 2023

Lĕ ntil nau geh mông da dê

¹ Lĕ ntil nau kan geh mông da dê, lĕ nau tâm dâng trôk geh nal năng da dê ma păng:

² Geh năng deh, geh năng khĭt; Geh năng srih tăm, geh năng rôk ndơ hŏ tăm;

³ Geh năng nkhĭt, geh năng ƀư bah; Geh năng rơih lơi, geh năng ndâk;

⁴ Geh năng nhhiăng nhĭm, geh năng gơm maak; Geh năng ndrê klâng, geh năng pâl ntalơ̆;

⁵ Geh năng klŭp lŭ, geh năng rgum lŭ; Geh năng ut rơ u, geh năng chalơi;

⁶ Geh năng tĭng joi, geh năng ƀư roh; Geh năng prăp tay, geh năng mƀăr lơi;

⁷ Geh năng hêk sat, geh năng jĭm njĭr; Geh năng gŭ rklăk, geh năng ngơi;

⁸ Geh năng rŏng, geh năng rmot; Geh năng tâm lơh, geh năng đăp mpăn.

Nau kan Brah Ndu jao ăn ma kon bunuyh

⁹ Moh ndơ nau khlay ma nơm pah kan đah nau hŏt rgănh păng nơm?

¹⁰ Gâp hŏ saơ jêh nau kan Brah Ndu jao ăn ma kon bunuyh ƀư nsrôih n'hâm suan.

¹¹ Lĕ rngôch kan Brah Ndu hŏ ƀư jêng ueh da dê tâm rnôk păng. Nđâp tơlah Brah Ndu n'gân nau n'ho ro tâm nuih n'hâm kon bunuyh, ƀiălah khân păng ăt mâu dơi gĭt rbăng nau kan Păng ƀư ntơm bơh saơm tât nglĕ dŭt.

¹² Pônây, gâp gĭt năl pô aơ mâu geh ndơ ueh lơn ăn ma kon bunuyh jêng răm maak jêh ri ƀư ueh lôch du njăr rêh khân păng.

¹³ Rlau ma nây đŏng, ăn ăp nơm sa hom, nhêt jêh ri dơn nau ueh maak bơh kan păng, yor nây ăt jêng nau Brah Ndu ăn.

¹⁴ Gâp saơ pô aơ lĕ kan Brah Ndu hŏ ƀư mra hôm e tât n'ho ro; bu mâu dơi ntop đŏng ôh, mâu đŏng dơi n'hŭch lơi. Mâm Brah Ndu ƀư kơt nây gay kon bunuyh klach yơk ma Păng.

¹⁵ Moh ntil nau geh aƀaơ hŏ geh ntơm ƀơh saơm, Moh nau mra tât hŏ tât jêh bơh saơm; Brah Ndu ăn jêng tay lĕ kan hŏ găn jêh.

Nau phat dôih jêh ri nar kăndơ̆ jêng Brah Ndu

¹⁶ Gâp hôm saơ tay tâm dâng nar: Ntŭk phat dôih geh nau djơh mhĭk, Ntŭk nau di geh nau mâu sŏng.

¹⁷ Gâp mĭn êng: “Brah Ndu mra phat dôih bunuyh sŏng srăng jêh ri phung djơh mhĭk, yorlah geh năng tâm nal ăn lĕ ntil nau, lĕ rngôch kan.”

¹⁸ Gâp mĭn êng tay: “Nau tât nâm bu pônây, yorlah Brah Ndu ŭch rlong kon bunuyh, jêh ri ntĭm ăn khân păng gĭt pô aơ khân păng mâu lĕ rlau nâm bu mpô mpa.

¹⁹ Yorlah nau mra tât ăn ma kon bunuyh jêh ri ma mpô mpa tâm ban da dê; mpô mpa aơ khĭt, mpô mpa ri ăt khĭt đŏng. Lĕ rngôch bar ntil aơ nsôr nsum du ntil n'hâm nsôr; kon bunuyh mâu rlau nâm bu mpô mpa, yorlah lĕ rngôch dơm dam da dê.

²⁰ Lĕ rngôch nsum du ntŭk da dê; lĕ rngôch luh bơh ndruyh neh, lĕ rngôch mra plơ̆ sĭt ma ndruyh neh.

²¹ Mbu dơi gĭt, mâu lah huêng kon bunuyh hao leo klơ, mâu lah huêng mpô mpa trŭnh tâm dâng neh?”

²² Pôri, gâp mâu saơ geh ndơ ueh lơn ăn ma kon bunuyh jêng maak dơn nau kan păng nơm; nây jêng prăp êng tâm ăp nơm, yorlah mbu mra djôt păng nơm plơ̆ tay gay saơ nau mra tât kăndơ̆ taơ?