Nơm Nti 2 - Nau Brah Ndu Ngơi 2023

Nau răm maak, nau ndrŏng kuăng jêh ri lĕ rngôch nau kan dơm dam da dê

¹ Gâp mĭn êng: “Aơ, gâp mra rlong nau răm maak jêh ri rlong nau maak!” Ri, nau nây ăt jêng dơm dam.

² Gâp lah: “Gơm jêng brŭt; răm maak mâm ƀư?”

³ Gâp mĭn êng mra nhêt ndrănh gay săk jăn răm tâm nau nhŭl ƀiălah djôt bôk rngok geh nau blau mĭn. Gâp mra rduh leo nau rêh brŭt rluk kŏ tât nôk gĭt năl nau ueh kon bunuyh dơi ƀư tâm dâng trôk du bông nar păng gŭ rêh.

⁴ Gâp hŏ ƀư lĕ nau kan ndâk toyh: ndâk ngih hađăch, njêng đang krăk ƀâu,

⁵ njêng ăn ma gâp nơm đang tơm si sa play jêh ri n'gar kao, tăm ăp ntil tơm si ta nây.

⁶ Gâp kuyh nglao prăp dak prăp gay djrah lĕ bri tơm si dôl toyh.

⁷ Gâp rvăt âk oh mon bu ur bu klâu; ăt geh âk phung dĭk geh kon tâm ngih gâp. Gâp geh phung ndrôk jêh ri biăp âk lơn ma lĕ rngôch phung rô̆ panăp gâp ta Yêrusalem.

⁸ Gâp ăt prăp nkrem prăk, mah jêh ri drăp ndơ khlay phung hađăch, jêh ri tă bơh lĕ n'gor. Gâp geh âk phung mprơ bu ur bu klâu. Bi nau bu klâu ŭch rŏng gâp geh âk ur yông jêh ri bu ur ueh.

⁹ Pôri, gâp jêng toyh jêh ri rlau lơn ma lĕ rngôch phung hađăch rêh panăp gâp ta Yêrusalem. Rlau ma nây, gâp ăt hôm dơi prăp nau blau mĭn.

¹⁰ Gâp mâu dun ntil nau măt gâp nơm ŭch kơnh, ăt mâu king ôh nau nuih n'hâm ŭch rŏng, yorlah nuih n'hâm gâp maak ma lĕ rngôch kan hŏt gâp pah; jêh ri nây jêng nau gâp dơi geh tâm lĕ kan hŏt gâp nơm.

¹¹ Jêh nây gâp mĭn êng lĕ rngôch kan ti gâp hŏ ƀư, jêh ri lĕ kan hŏt r'ah gâp hŏ dơn gay ƀư lĕ kan nây; ri, lĕ rngôch nau nây jêng nau dơm dam, tĭng rlong sial khôm, jêh ri mâu geh nau khlay ôh tâm dâng nar.

Nau blau mĭn jêh ri nau maak dơi ăn ma bunuyh ƀư ueh nuih n'hâm Kôranh Brah

¹² Gâp plăch mĭn rvê mpeh ma nau blau mĭn, nau rluk, jêh ri brŭt ndrăng; yorlah bunuyh chiă uănh ntrok hađăch moh mra dơi ƀư? Nĕ knŏng nau bunuyh êng hŏ ƀư bơh jŏ jêh.

¹³ Gâp saơ pô aơ nau blau mĭn geh nau khlay lơn ma nau rluk, nâm bu nau ang geh nau khlay lơn ma nau ngo.

¹⁴ Bunuyh blau mĭn geh trôm măt tâm bôk păng, Bi phung rluk chuat hăn tâm nau ngo. Ƀiălah, gâp saơ jêh lĕ bar hê mra hăn ndrel ma du ntŭk tâm nal.

¹⁵ Yor ri gâp mĭn êng: “Nau tât ăn ma phung rluk ăt mra tât đŏng ma gâp; pôri, gâp blau mĭn ăn âk moh nau gâp ƀư?” Gâp mĭn êng: “Nây ăt jêng nau dơm dam.”

¹⁶ Bu mâu hôm kah gĭt mro bunuyh blau mĭn tâm ban phung rluk; yorlah tâm lĕ nar mra dăch tât, lĕ rngôch chuêl da dê. Di yơh, bunuyh blau mĭn tâm ban phung rluk mra khĭt da dê!

¹⁷ Pôri, gâp tâm rmot nau rêh, yorlah đah gâp, lĕ rngôch kan pah luh tâm dâng nar mhĭk da dê; lĕ rngôch dơm dam da dê, tĭng rlong sial khôm.

¹⁸ Gâp ăt tâm rmot lĕ nau kan gâp hŏ hŏt r'ah ƀư bơh tâm dâng nar, yorlah mra om ăn ma bunuyh rêh pakơi gâp.

¹⁹ Mbu nơm dơi gĭt đŏng bunuyh nây blau mĭn mâu lah rluk? Nđâp tơlah păng mra mât uănh lĕ rngôch nau kan gâp hŏt rgănh jêh ri blau mĭn ƀư tâm dâng nar. Nau nây ăt jêng nau dơm dam.

²⁰ Yor nây, gâp plơ̆ jêng rdja nuih ma lĕ nau kan hŏt rgănh gâp hŏ ƀư jêh tâm dâng nar.

²¹ Yorlah geh bunuyh kan hŏt r'ah đah nau blau mĭn, nau gĭt rbăng jêh ri geh nau blau, jêh nây ăn drăp ndơn păng nơm ma nơm mâu mâp hŏt rgănh ma ndơ nây. Nau nây ăt jêng du nau dơm dam jêh ri du nau mhĭk toyh.

²² Pônây, moh ndơ kon bunuyh geh tă bơh nau kan ƀư hŏt jêh ri nuih n'hâm jâk jêr khân păng ƀư tâm dâng nar?

²³ Lĕ nar, păng knŏng mâp lĕ nau rngot rvê; nau kan păng bêng ma jâk jêr, kŏ tât dôl măng nau mĭn ăt mâu dơi geh rlu ôh. Nau nây tâm ban lĕ jêng nau dơm dam.

²⁴ Mâu geh nau ueh lơn ăn ma kon bunuyh jêng sa, nhêt, jêh ri dơn nau ueh maak tâm kan hŏt păng. Gâp saơ nau nây ăt tât bơh mpang ti Brah Ndu.

²⁵ Yorlah mbu jêng bunuyh dơi sa jêh ri geh nau maak lơn ma gâp?

²⁶ Yor Brah Ndu ăn nau blau mĭn, gĭt rbăng jêh ri nau maak ăn ma mbu nơm ƀư ueh nuih n'hâm Păng; Ƀiălah Păng ƀư ma nơm geh tih mra hŏt rgănh prăp nkrem gay jao tay ăn ma bunuyh ƀư ueh nuih n'hâm Brah Ndu. Nau nây ăt jêng dơm dam, tĭng rlong sial khôm.