Nơm Nti 11 - Nau Brah Ndu Ngơi 2023

Piăng let ta klơ măt dak

¹ Srih hom piăng let may ta klơ măt dak, Yorlah âk nar pakơi, may mra dơi joi tay.

² Tâm pă hom kô̆ may ăn ma pơh mâu lah pham bunuyh, Yorlah may mâu gĭt ôh moh nau mhĭk mra tât geh ta klơ neh.

³ Tơlah tŭk bêng ma dak Mih mra jŭr hoch ta klơ neh; Dôl geh du tơm si cha lôt mpeh pa dâng mâu lah mpeh pa lơ, Ntŭk rlet tơm si chôt mra gŭ ta nây ro.

⁴ Mbu nơm knŏng gŭ kâp sial mâu mra srih ôh, Bi nơm ăt dâk uănh tŭk mâu mra rek.

⁵ May mâu gĭt ôh trong sial khôm, Ăt mâu gĭt lĕ mâm bu ntreo njêng săk jăn tâm trôm ndŭl mê̆; Tâm ban nây lĕ, may mâu dơi gĭt rbăng ôh nau kan Brah Ndu Jêng Nơm rhăk njêng lĕ ntil mpô mpa.

⁶ Ơm ôi, hăn hom srih ntil, Mhaơ tât lơi rlu ôh ti; Yorlah may mâu gĭt ôh moh rơh srih mra dơi jêng, Rơh srih kêng ôi mâu lah kêng mhaơ, Mâu lah lĕ bar hon ueh tâm ban da dê.

⁷ Nau ang jêng rdơ̆ rbăn ngăn; Jêng maak răm ngăn ăn trôm măt saơ ang nar!

⁸ Tơlah du huê bunuyh dơi rêh jŏ năm, Maak dơn hom lĕ rngôch ăp năm nây. Ƀiălah ăn kah gĭt hom pô aơ du bông nar ngo klĕng mra hôm jong; Jêh ri lĕ nau geh tât jêng dơm dam da dê.

Nau nkah ma phung mom ndăm

⁹ Hơi bunuyh mom ndăm, maak răm hom tâm năm ndăm rah! Maak dơn hom nôk may hôm mom ndăm. Hăn tĭng hom trong nuih n'hâm may ŭch jêh ri măt may ŭch kơnh. Ƀiălah ăn gĭt pô aơ yorlah lĕ rngôch kan nây, Brah Ndu mra djôt leo may ma nau phat dôih.

¹⁰ Pôri, ngluh lơi hom nau rŭng răng tă bơh nuih n'hâm, jêh ri mƀăr lơi nau ji tă bơh săk jăn may; yorlah năm ndăm rah jêh ri nôk mom ndăm jêng dơm dam da dê dơm.