Nơm Nti 10 - Nau Brah Ndu Ngơi 2023

Nau sek uănh ƀaƀă

¹ Rhuay khĭt ƀư ôm dak ƀâu kah ma nơm njêng dak ƀâu kah, Du djê̆ nau nkhơng brŭt rluk ƀư roh lĕ nau blau mĭn jêh ri lư n'găr.

² Nuih n'hâm bunuyh blau mĭn rle mpeh nau di, Bi nuih n'hâm phung rluk rle mpeh nau rlơ̆.

³ Nđâp tơlah hăn ta trong, phung rluk pưt nau gĭt mĭn, Jêh ri ngơi ăn ăp bunuyh pô aơ păng jêng nuyh rluk.

⁴ Tơlah nơm chiă uănh hao ji nuih đah may lơi chalơi ôh, Yorlah nau rdơ̆ rbăn dơi der lĕ nau tih toyh jêh.

⁵ Geh du nau mhĭk ngăn gâp hŏ saơ jêh tâm dâng nar; Du nau vĭ vĭr ntơm bơh nơm chiă uănh:

⁶ Nây jêng nơm rluk dơi n'gân gŭ ntŭk dŭt prêh, Bi bunuyh ndrŏng gŭ ntŭk tâm dâng.

⁷ Gâp ăt saơ phung dĭk bu ncho seh, Tâm dôl lĕ phung kôranh mra hăn jâng nâm bu dĭk.

⁸ Nơm kuyh ntu mra tŭp tâm ntu, Bi nơm ƀư rai mpir mra bêh chôk.

⁹ Mbu nơm rlă lŭ mra ƀư sôt rmanh; Mbu nơm rlah long klăp lah geh long ƀư nau mhĭk.

¹⁰ Măt sung lĕ ƀâl jêh lah mâu tôl drep ăn hơr, Păng mra nsan dŏng nau dăng suan âk lơn; Ƀiălah nau blau mĭn kơl bu geh nau dơi jêng.

¹¹ Tơlah bêh chôk êlor bu gru nđơh, Pôri nơm gru nđơh bêh mâu jêng khlay ôh.

¹² Bâr mbung bunuyh blau mĭn ngơi luh nau bu yô̆, Ƀiălah nơm rluk ƀư rai păng nơm.

¹³ Ntơm saơm păng ngơi đah nau brŭt ndrăng, Jêh ri nglĕ dŭt đah nau ngơi djơh mhĭk brŭt ndrăng.

¹⁴ Bunuyh rluk vay ngơi âk; Ƀiălah kon bunuyh mâu dơi gĭt ôh moh nau mra geh tât, Jêh ri mbu nơm dơi ngơi ăn bunuyh gĭt nau tâm nar kăndơ̆?

¹⁵ Nau kan dŭt hŏt ma nơm rluk ƀư păng huăr ngăn Kŏ tât mâu hôm gĭt trong sĭt ma ƀon toyh.

¹⁶ Rêh ni ăn ma bri dak geh hađăch hôm ndăm ngăn, Jêh ri geh lĕ phung kôranh mhe ang hŏ rvê nau nhêt sa!

¹⁷ Ueh maak ăn bri dak geh hađăch jêng noi deh lư rnam, Jêh ri geh phung kôranh chiă uănh sông sa nhêt geh di mông, Gay geh nau dăng ktang mâu di mâu yor nau nhŭl ndrănh!

¹⁸ Yor nau ƀlao dĭng chor ngih trŭnh văm, Yor ti kơr ƀlao ăn ngih truh.

¹⁹ Nkra nhêt sa gay rvăt nau maak, Ndrănh ƀư ăn nau rêh răm maak, Jêh ri prăk rêl dơi tŏng nau ŭch.

²⁰ Nđâp tâm nau mĭn may, lơi rak rtăp hađăch ôh, Nđâp tơlah tâm jrô bê̆ch, may ăt lơi rak rtăp bunuyh ndrŏng kuăng; Yorlah sĭm klơ trôk mra rƀiah bâr ngơi, Jêh ri mpa geh nting năr mra nkoch tay nau nây.