Nơm Nti 1 - Nau Brah Ndu Ngơi 2023

Lĕ rngôch ndơ dơm dam da dê

¹ Nau ngơi bơh nơm nti, kon bu klâu Y-Đavit, hađăch ta ƀon Yêrusalem.

² Nơm nti ngơi: Nau dơm dam ma nau dơm dam, Nau dơm dam ma nau dơm dam! Lĕ rngôch dơm dam da dê.

³ Kon bunuyh moh ndơ khlay Dôl kan hŏt rơah tâm dâng nar?

⁴ Rô̆ nuyh aơ hŏ lôch, rô̆ nuyh ri lŏ tât, Ƀiălah rplay neh ăt gŭ mro mrăng.

⁵ Nar luh, nar nhâp, Jêh ri ndal ngăn plơ̆ sĭt ntŭk păng luh.

⁶ Sial khôm sĭt mpeh pa dâng, Jêh ri ndăch rgăn mpeh pa lơ; Sial ndăch hăn rvang tay mâu rlu, Jêh ri plơ̆ sĭt rvang ơm păng.

⁷ Lĕ rngôch dak krong nkhŭt tâm dak mƀŭt da dê, Ƀiălah dak mƀŭt mâu bêng ôh. Ntŭk dak krong vay hoch tât jêh, Ta nây yơh dak krong thoi đŏng hoch luh.

⁸ Lĕ rngôch ndơ hŏt rgănh da dê, Kon bunuyh mâu dơi nkoch lĕ ôh; Măt uănh mro ăt mâu mpay, Tôr iăt mro ăt mâu geh nau khlay lĕ.

⁹ Moh nau lĕ tât jêh mra tât đŏng, Moh nau bu hŏ ƀư jêh, bu mra ƀư tay đŏng; Mâu geh nau mhe ôh gŭ tâm dâng nar.

¹⁰ Tơlah geh nau bu lah: “Uănh hom, ndơ aơ mhe!” N'hêl nanê̆ nau nây hŏ geh jêh, Tâm rnôk lĕ rô̆ êlor ma phung he.

¹¹ Bu mâu kah gĭt tât bunuyh ma rô̆ ơm; Jêh ri ndrel đah phung bunuyh rô̆ pakơi, Jêng phung bunuyh mâu hŏ mpơl, tâm ban đŏng, Phung bunuyh pakơi khân păng ăt mâu kah gĭt tât khân păng.

Nau dơm dam ma nau blau mĭn

¹² Gâp jêng nơm nti hŏ ƀư hađăch Israel ta Yêrusalem.

¹³ Gâp joi gĭt lĕ nuih n'hâm jêh ri dŏng nau blau mĭn gâp nơm gay sek uănh lĕ rngôch kan tât geh tâm dâng trôk. Nây jêng nau kan hŏt rgănh Brah Ndu hŏ jao ăn ma kon bunuyh rvê ƀư.

¹⁴ Gâp hŏ treng uănh lĕ rngôch nau tât geh tâm dâng nar; ri, lĕ rngôch dơm dam da dê tĭng rlong sial khôm.

¹⁵ Moh ndơ hŏ kue mâu dơi ƀư ăn sŏng tay ôh, Jêh ri ndơ hŏ pưt mâu dơi kơp ăn tŏng.

¹⁶ Gâp mĭn êng: “Aơ, gâp hŏ geh nau blau mĭn rlau lơn ma lĕ rngôch phung hađăch chiă uănh ta ntŭk Yêrusalem; nanê̆, gâp hŏ rgăn jêh âk nau tât đah nau blau mĭn jêh ri nau gĭt rbăng.”

¹⁷ Gâp nsrôih nti gĭt nau blau mĭn, nti gĭt nau rluk jêh ri nau brŭt ndrăng. Gâp dơn saơ nau nây knŏng jêng tĭng rlong sial khôm.

¹⁸ Yorlah lơ hâu âk nau blau mĭn, lơ hâu ntop nau ji nuih, Mbu nơm ntop nau gĭt rbăng jêng ntop nau rngot rvê.