Nêhêmi 9 - Nau Brah Ndu Ngơi 2023

Phung ƀon lan ât sông sa jêh ri mbơh nau tih

¹ Ta nar bar jât ma puăn khay nây, phung Israel tâm rƀŭn ma nau ât sông sa, nsoh ƀau jêh ri sui neh muy klơ bôk khân păng.

² Phung Israel hŏ nkhah bơh phung bu năch, dâk da dê mbơh nau tih khân păng nơm jêh ri nau djơh mhĭk bơh phung chô yau khân păng.

³ Khân păng dâk du ntŭk jêh ri rŏ tâm ndrom samƀŭt nau vay Yêhôva Brah Ndu du kô̆ tâm puăn nar, jêh ri prăp du kô̆ tâm puăn êng gay khân păng mbơh nau tih jêh ri yơk mbah Yêhôva Brah Ndu khân păng.

Phung Lêvi mbơh sơm

⁴ Rnôk nây Y-Jêsua, Y-Bani, Y-Katmiêl, Y-Sêbania, Y-Buni, Y-Sêrêbia, Y-Bani, jêh ri Y-Kênai dâk ta klơ gre prăp ma phung Lêvi jêh ri kuăl dăn bâr huy ma Yêhôva Brah Ndu khân păng.

⁵ Phung Lêvi jêng Y-Jêsua, Y-Katmiêl, Y-Bani, Y-Hasapnia, Y-Sêrêbia, Y-Hôdia, Y-Sêbania, jêh ri Y-Pêthahia lah: “He dâk hom, tâm rnê ma Yêhôva Brah Ndu he, Jêng Nơm n'ho ro! Mât ton tâm rnê amoh chrêk rmah May, Amoh geh nau yơk lơn ma lĕ rngôch nau mât ton jêh ri nau tâm rnê.

⁶ Vư, knŏng du huê Kôranh Brah jêng Brah Yêhôva geh nguay mâu hôm geh bar ôh; Kôranh Brah hŏ rhăk njêng lĕ ndâr trôk jêh ri trôk ma lĕ ndâr trôk ndrel ma lĕ rngôch phung tahan khân păng, Neh nđâp ma lĕ rngôch mpa tâm ta klơ neh ntu, dak mƀŭt jêh ri ma lĕ rngôch mpa geh tâm dak mƀŭt. Kôranh Brah mât njrăng lĕ rngôch ndơ nây Jêh ri phung tahan tâm trôk yơk mbah May da dê.

⁷ Hơi Kôranh Brah! Kôranh Brah jêng Yêhôva Brah Ndu hŏ săch jêh Y-Abram, Djôt leo păng luh tă bơh Ur phung ƀon lan Kaldê Jêh ri rgâl amoh păng jêng Y-Abraham.

⁸ Kôranh Brah saơ nuih n'hâm păng răp jăp tanăp măt Kôranh Brah Jêh ri May hŏ ƀư jêh nau tâm rnglăp đah păng Ton ăn ma noi deh păng tâm n'gor phung ƀon lan Kanaan, phung ƀon lan Hitit, phung ƀon lan Amôrit, phung ƀon lan Pêrisit, phung ƀon lan Jêbusit, jêh ri phung ƀon lan Girgasit. Kôranh Brah hŏ ƀư tât di ngăn jêh nau Kôranh Brah ton, yorlah Kôranh Brah jêng sŏng srăng.

⁹ Kôranh Brah hŏ saơ jêh nau rêh ni phung chô yau hên ta n'gor bri Êjipt, Hŏ tăng jêh bâr khân păng kuăl dăn ta meng Dak Mƀŭt Chăng.

¹⁰ Păng ƀư mpơl nau mbên âk ntil jêh ri nau mbên mha tâm rdâng đah Pharaôn, Jêh ri phung oh mon păng jêh ri lĕ rngôch phung ƀon lan tâm bri dak, Yorlah Kôranh Brah gĭt khân păng hŏ ƀư djơh rlau keh ir ma chô yau hên. Kôranh Brah ƀư ăn lư n'găr amoh Kôranh Brah tât nâm bu ta nar aơ.

¹¹ Kôranh Brah tâm nkhah dak mƀŭt tanăp măt phung ƀon lan May Gay ăn khân păng hăn rgăn ta klơ neh sơh ta nklang dak mƀŭt. Bi ma phung hăn tĭng pakơi, Kôranh Brah klŭp khân păng tâm dâng brŏng jru Nâm bu klŭp lŭ tâm dak toyh.

¹² Nôk nar Kôranh Brah njŭn leo khân păng ma n'gâng tŭk Jêh ri bri măng ma n'gâng ŭnh gay nchrat ang tâm trong khân păng hăn rgăn.

¹³ Kôranh Brah jŭr ta klơ yôk Sinai, Tă bơh trôk Kôranh Brah hŏ ngơi jêh ma khân păng. Kôranh Brah ăn nau vay ƀư jêh ri nau vay di jêh ri sŏng srăng; Lĕ nau vay dăp ueh jêh ri nau vay ntăm ueh.

¹⁴ Kôranh Brah ƀư ăn khân păng gĭt nar saƀat kloh ueh Kôranh Brah. Jêh ri ăn jêh ma khân păng lĕ nau vay ntăm, lĕ nau vay ƀư jêh ri nau vay Ma Y-Môis jêng oh mon Kôranh Brah.

¹⁵ Tă bơh klơ trôk Kôranh Brah ăn jêh piăng let nôk khân păng ji ngot, Ƀư ăn lŭ rdŭl dak nôk khân păng ji hir, Ntăm khân păng lăp sŏk bri Kôranh Brah hŏ ton ăn jêh ma khân păng.

¹⁶ Ƀiălah chô yau hên gŭ ngao ma nau sưr jêh ri dăng ko, Mâu iăt ôh lĕ nau vay ntăm bơh May ntĭnh.

¹⁷ Khân păng mâu tông bâr ôh jêh ri mâu kah gĭt ma nau mbên khlay ngăn ngên Kôranh Brah hŏ ƀư jêh ta nklang khân păng, Ƀiălah khân păng dăng ko jêh ri tâm nôk tâm rdâng, Khân păng săch du huê kôranh chiă uănh gay leo ma khân păng plơ̆ sĭt tay nau ƀư dĭk. Ƀiălah Kôranh Brah jêng Brah Ndu rơm ndrăp yô̆ an, vay ƀư nau yô̆, jêh ri yô̆ nđach, Mâu gơnh ji nuih jêh ri bêng ma nuih n'hâm ueh. Kôranh Brah mâu chalơi khân păng ôh.

¹⁸ Nđâp tơlah khân păng hŏ tŏ jêh du mlâm rup ndrôk nkuăng jêh ri lah: ‘Aơ jêng brah hŏ njŭn khân may luh bơh Êjipt’ Jêh ri ngơi sưr ma Kôranh Brah,

¹⁹ Kôranh Brah ăt yô̆ nđach, mâu chalơi ôh khân păng tâm bri rdah. N'gâng tŭk njŭn trong nôk nar, mâu nkhah bơh khân păng, N'gâng ŭnh nchrat ang dôl bri măng ta klơ trong ăn khân păng dơi hăn.

²⁰ Kôranh Brah hŏ ăn jêh Brah Huêng ueh bơh Kôranh Brah, gay ntĭm nti khân păng. Kôranh Brah mâu dun ăn mana ma trôm mbung khân păng jêh ri ăn dak nhêt nôk khân păng ji hir.

²¹ Kôranh Brah mât siăm khân păng puăn jât năm tâm bri rdah: Khân păng mâu pưt du ntil ndơ, Kho ao khân păng mâu sat rai ôh jêh ri jâng khân păng mâu geh môr lĕ.

²² Khân păng hŏ pit sŏk jêh n'gor Hêsbôn hađăch Y-Sihôn, Jêh ri n'gor Basan hađăch Y-Ôk. Kôranh Brah hŏ ăn jêh ma khân păng âk bri dak Jêh ri tâm pă lĕ bri ngai nây ăn ma khân păng.

²³ Kôranh Brah hŏ ƀư jêh ma noi deh khân păng âk nâm bu mănh klơ trôk, Jêh ri njŭn khân păng tât ta n'gor Kôranh Brah hŏ ton ăn jêh ma phung chô yau khân păng ăn khân păng mra lăp pit sŏk n'gor bri nây.

²⁴ Pôri phung kon sau khân păng lăp sŏk chăm bri. May ƀư ăn phung tâm n'gor nây jêng phung Kanaan lăp gŭ tâm dâng khân păng, Jao phung nây jêh ri phung hađăch khân păng Nđâp ma lĕ ntil mpôl bunuyh êng tâm n'gor nây tâm ti khân păng, Gay ma khân păng dơi ƀư ma lĕ ntil mpôl bunuyh nây tĭng nâm nau mĭn khân păng ŭch.

²⁵ Khân păng sŏk jêh lĕ rplay ƀon pôih nâp ngăn, Neh ueh ngăn, ngih bêng ăp ntil ndơ ueh, Lĕ ntu dak kuyh jêh, Đang krăk ƀâu, đang ôlive jêh ri tơm play âk ngăn. Khân păng sa kŏ hơm jêh ri jêng lay ueh; Khân păng răm maak tâm nau ueh toyh ngăn bơh May.

²⁶ Nđâp lah pônây, khân păng mâu tông bâr lĕ jêh ri tâm rdâng đah May, Chalơi nau vay Kôranh Brah pakơi, Nkhĭt phung nơm mbơh lor May, jêng phung mbơh ăn khân păng gay ăn khân păng plơ̆ sĭt tay ma Kôranh Brah, Jêh ri khân păng ƀư rngot lơ hâu lơn ma May.

²⁷ Yor ri, Kôranh Brah jao jêh khân păng tâm ti phung rlăng, jêh ri phung nây tŭn jot khân păng. Tâm nau rêh ni, khân păng kuăl dăn ma Kôranh Brah. Yorlah, nuih n'hâm ueh toyh, tă bơh trôk Kôranh Brah iăt Jêh ri ăn jêh phung sâm rklaih gay rklaih khân păng tă bơh ti phung rlăng ma khân păng.

²⁸ Ƀiălah tơlah dơi gŭ đăp mpăn jêh Khân păng ƀư đŏng nau mhĭk tanăp măt Kôranh Brah. Yor ri, Kôranh Brah jao khân păng tâm ti phung rlăng gay chiă uănh khân păng. Ƀiălah tơlah khân păng plơ̆ sĭt, kuăl dăn ma Kôranh Brah Kôranh Brah tă tâm trôk tăng bâr. Jêh ri yor nuih n'hâm yô̆ nđach, Kôranh Brah hŏ tâm rklaih khân păng âk tơ̆ jêh.

²⁹ Kôranh Brah mbơh đŏng ăn khân păng njrăng, gay ƀư ăn khân păng plơ̆ sĭt ma nau vay May. Ƀiălah khân păng gŭ ngao ma nau sưr, mâu tông tĭng ôh ma nau vay ntăm bơh Kôranh Brah. Khân păng ƀư tih đah nau vay ƀư bơh Kôranh Brah, jêng nau vay ƀư ngăn tơlah mbu nơm tông, nanê̆ mra dơi rêh. Khân păng dăng bôk, dăng ko jêh ri mâu ŭch tông bâr ôh.

³⁰ Kôranh Brah srôih nuih đah khân păng âk năm. Jêh ri mbơh ăn khân păng njrăng đah Brah Huêng jêh ri phung nơm mbơh lor May. Ƀiălah khân păng mâu rkêng tôr iăt ôh Rĭ dĭng Kôranh Brah jao khân păng tâm ti lĕ ntil mpôl bunuyh rêh gŭ tâm n'gor.

³¹ Ƀiălah, yorlah nuih n'hâm yô̆ nđach toyh, Kôranh Brah mâu ƀư rai lĕ khân păng tâm ban đŏng mâu chalơi khân păng. Yorlah Kôranh Brah jêng Brah Ndu vay yô̆ nđach jêh ri geh nau ueh.

³² Pôri aƀaơ, hơi Brah Ndu hên, jêng Brah Ndu dŭt toyh, nơm brah, geh nau klach yơk, Djôt prăp nau tâm rnglăp jêh ri nuih n'hâm ueh, Dăn lơi uănh n'gơch nau rêh ni hŏ ăn tât ma hên, Ma phung hađăch, ma phung kôranh chiă uănh, ma phung kôranh ƀư brah, ma phung nơm mbơh lor, ma phung chô yau hên, Jêh ri ma lĕ rngôch phung ƀon lan Kôranh Brah tă bơh rnôk phung hađăch Asiri kŏ tât ta nar aơ.

³³ Tâm lĕ nau hŏ tât jêh ma hên, Kôranh Brah ăt sŏng srăng; yorlah Kôranh Brah ƀư nau di ngăn, Bi hên ƀư jêh ma nau djơh mhĭk.

³⁴ Phung hađăch, phung kôranh chiă uănh, phung kôranh ƀư brah jêh ri phung chô yau hên Mâu djôt prăp ôh nau vay Kôranh Brah, Mâu lĕ tông tĭng lĕ nau vay ntăm jêh ri lĕ nau mbơh Kôranh Brah lah jêh ma khân păng.

³⁵ Tâm nôk hôm gŭ tâm n'gor bri, Maak dơn âk ngăn nau ueh tâm n'gor huy ngăn jêh ri ndrŏng, Kôranh Brah hŏ ăn jêh ma khân păng, Khân păng mâu đŏng pah kan ma Kôranh Brah, jêh ri mâu chalơi lĕ nau kan djơh mhĭk khân păng.

³⁶ Aơ, nar aơ hên ƀư dĭk, Hên ƀư dĭk tâm bri Kôranh Brah hŏ ăn jêh ma chô yau hên Gay sa kao play jêh ri play bơh neh ueh tâm n'gor nây.

³⁷ Yor ma nau tih hên, kao play rmeh ler nây mpeh ma phung hađăch Kôranh Brah hŏ ƀư jêh ma hên. Khân păng geh nau dơi chiă uănh săk jăn hên jêh ri mpô mpa hên rong, ƀư moh nau tĭng nâm khân păng ŭch. Hên dôl gŭ tâm nau rêh ni toyh.

³⁸ Yorlah lĕ nau hŏ tât jêh, hên ntrâng nchih du nau tâm rnglăp nanê̆ ngăn nây, jêh ri phung kôranh chiă uănh, phung Lêvi jêh ri phung kôranh ƀư brah hên tâp pŏng samƀŭt nây.”