Nêhêmi 8 - Nau Brah Ndu Ngơi 2023

Y-Êsra răk nau vay tanăp phung ƀon lan

¹ Rnôk nây, lĕ rngôch phung ƀon lan tâm rƀŭn ndrel nâm bu du huê nuyh, ta nkual toyh tanăp ƀon mpông pêr Dak. Khân păng lah ma Y-Êsra jêng kôranh nchih samƀŭt djôt leo ndrom samƀŭt nau vay Y-Môis; nây jêng nau vay Brah Yêhôva hŏ ntĭm nti jêh ma phung Israel.

² Pôri, ta năng nguay khay pơh, kôranh ƀư brah Y-Êsra djôt leo nau vay tanăp phung tâm rƀŭn, phung bu klâu jêh ri phung bu ur, jêh ri lĕ rngôch phung gŭ iăt dơi gĭt rbăng.

³ Păng dâk ta nkual toyh tanăp mpông pêr Dak, rŏ tâm ndrom samƀŭt nây ntơm ƀhit rvi ang tât ma nklang bôk nar, lĕ bu klâu jêh ri bu ur nđâp lĕ rngôch dơi gĭt rbăng. Lĕ rngôch phung ƀon lan rkêng tôr iăt nau rŏ tâm ndrom samƀŭt nau vay.

⁴ Kôranh nchih samƀŭt Y-Êsra dâk ta klơ gre ƀư ma ndap si bu ƀư rnôk nây; Y-Matithia, Y-Sêma, Y-Maseya, Y-Anaya, Y-Urija, Y-Hilkia, jêh ri Y-Maseya dâk dăch păng, bi mpeh pa chiau păng geh: Y-Pêdaya, Y-Misaêl, Y-Malkija, Y-Hasum, Y-Hasbadana, Y-Sakari, jêh ri Y-Mêsulam

⁵ Y-Êsra pơk ndrom samƀŭt tanăp lĕ rngôch phung ƀon lan, yorlah păng dâk prêh lơn khân păng; jêh ri tơlah păng pơk ndrom samƀŭt lĕ rngôch ƀon lan dâk da dê.

⁶ Y-Êsra tâm rnê ma Yêhôva Brah Ndu dŭt prêh, jêh ri lĕ rngôch phung ƀon lan yơr ti klơ gay plơ̆ lah pô aơ: “Amen, Amen,” jêh nây khân păng kŭnh bôk, păn muh măt ta neh gay yơk mbah ma Brah Yêhôva.

⁷ Y-Jêsua, Y-Bani, Y-Sêrêbia, Y-Jamin, Y-Akup, Y-Sabêthai, Y-Hôdia, Y-Maseya, Y-Kêlita, Y-Asaria, Y-Jôsaƀat, Y-Hanan, Y-Pêlaya jêh ri phung Lêvi rblang ma phung ƀon lan gĭt rbăng nau vay, bi phung ƀon lan hôm e dâk ta ntŭk khân păng.

⁸ Khân păng răk rah vah tâm ndrom samƀŭt nau vay bơh Brah Ndu jêh ri rblang rah vah ăn bu gĭt nau ngơi khân păng răk.

⁹ Y-Nêhêmi, kôranh mât uănh, Y-Êsra kôranh ƀư brah jêng kôranh nchih samƀŭt, nđâp phung Lêvi nti ntĭm phung ƀon lan, nti lah ma lĕ rngôch phung Israel, lah đah lĕ rngôch bunuyh Israel pô aơ: “Nar aơ jêng kloh ueh ma Yêhôva Brah Ndu khân may. Lơi klâng khĭt mâu lah nhhiăng nhĭm.” Yorlah lĕ rngôch phung ƀon lan nhĭm da dê tơlah gŭ iăt nau ngơi tâm nau vay.

¹⁰ Y-Nêhêmi lah ma khân păng: “Hăn hom sa ndơ rmŏng-ngi, nhêt dak njŭng jêh ri njuăl du kô̆ ndơ nây ma nơm bu mâu geh nkra ôh; yorlah nar aơ jêng nar prăp êng kloh ueh ma Kôranh Brah he. Lơi ta rngot klâng ôh, yorlah nau răm maak bơh Brah Yêhôva jêng nau ktang khân may.”

¹¹ Pôri, phung Lêvi ăn lĕ rngôch phung ƀon lan gŭ răk klăk jêh ri lah: “Gŭ rklăk hom, yorlah nar aơ jêng kloh ueh, lơi rngot klâng ôh!”

¹² Lĕ rngôch ƀon lan hăn sông sa nhêt jêh ri njuăl kô̆ ndơ sa ma bunuyh mâu geh. Khân păng sông sa tâm nau răm maak ngăn, yorlah khân păng gĭt rbăng jêh lĕ nau ngơi bu hŏ ntĭm nti jêh ma khân păng.

Mât mray nau rƀŭn Ngih Bok

¹³ Tât nar tal bar, phung kôranh ndŭl mpôl tâm phung ƀon lan, phung kôranh ƀư brah jêh ri phung Lêvi, tâm rƀŭn da dê ndrel ma kôranh nchih samƀŭt Y-Êsra gay iăt lĕ nau ngơi tă bơh nau vay.

¹⁴ Khân păng saơ jêh nau bu nchih tâm nau vay Brah Yêhôva ntăm jêh ma Y-Môis ăn phung ƀon lan Israel gŭ tâm lĕ ngih bok dôl nau rƀŭn tâm khay pơh

¹⁵ jêh ri khân păng nkoch mbơh tâm ăp ƀon jêh ri tâm Yêrusalem pô aơ: “Hăn joi hom tâm gôl yôk n'gĭng ôlive jêh ri tơm ôlive bri, n'gĭng tơm mirtơ, n'ha đung jêh ri lĕ n'gĭng tơm si pŭm n'ha gay ƀư ngih ndưp” tĭng nâm nau hŏ nchih jêh.

¹⁶ Pôri phung ƀon lan hăn joi jêh ri djôt sĭt lĕ ntil n'ha si nây jêh ri ăp nơm ƀư ngih ndưp ta klơ chor ngih khân păng nơm, padih ndring, tâm nkual nhuang ngih Brah Ndu, tâm nkual toyh tanăp mpông pêr Dak jêh ri nkual toyh tanăp mpông pêr Êphraim.

¹⁷ Lĕ rngôch phung tâm rƀŭn phung ƀư bu nă lĕ plơ̆ sĭt, ƀư lĕ ngih ndưp jêh ri gŭ tâm ngih ndưp nây. Ntơm bơh rô̆ Y-Yôsuê, kon bu klâu Y-Nun, n'ho tât ma nar nây, phung ƀon lan Israel mâu mâp ƀư toyh nâm bu pônây ôh. Khân păng bêng nau rhơn răm ngăn ngên.

¹⁸ Ăp nar, ntơm bơh nar ntơm ma tât nar nglĕ dŭt, bu rŏ tâm ndrom samƀŭt nau vay Brah Ndu. Khân păng nhêt sa nau rƀŭn tâm pơh năng nar, jêh ri tât năng pham geh nau rƀŭn ma nau khư yơk tĭng nâm nau vay ƀư.